甄子丹一句「詠春、葉問」，加上喺戲中痛毆空手道及西洋拳高手，掀起觀眾民族丹心，更有後生仔的起心肝拜師學藝。小記冇咁好毅力投入這股功夫熱，其實買隻Enterbay出品1:6「葉問」Figure一樣得，唔只頭雕勁似「宇宙最強」，正式發售時仲會送一套詠春拳套路，跟住打日字衝拳，鬼佬見到一定以為我食過夜粥，幫Figure擺甫士時就更加神似啦！
Enterbay造李小龍Figure就出晒名，不過出咗咁多個，粉絲總會悶，為此廠方終於為1/6 Real Masterpiece添加新成員—葉問。不過與其說是葉問Figure，不如說是甄子丹Figure，事關原型完全參照電影角色嚟造。官方話，由開發到完成歷時八個月之久 ，丹爺更由頭到尾都畀足意見，因此出嚟嘅頭雕可謂維肖維妙，眼神、面形及多層軟膠頭髮跟足電影造型唔在講，戲中從容不迫的神態亦忠實表現出來，據知丹爺看到製成品後更一口氣掃走十個作收藏呢！ 詠春講求簡單直接，拳法不離小念頭、尋橋及標指三式，為此Figure的四對可換手掌都參照以上拳法而製，而且為了增加靈活性，今次更改用全新開發的ABS素體，可動關節比舊版多，擺問手或日字衝拳等甫士都冇難度。另外，練詠春當然少不了木人樁，廠商索性用此作為地台，底部鐵片更印滿佛山大宅內的地板圖案，設計有心思。其他配件包括雞毛掃及黑白唐裝衫各一件，最意外係送一套詠春套路，方便粉絲擺出正確姿勢，製作認真成咁，就算十個Figure埋身都打你唔贏啦！ 出開有條路，葉問之後，嚟緊仲有《精武風雲．陳真》Figure，提供白色中山裝及黑色皮革套裝，可換兩款造型，丹爺粉絲又要入手，售價暫定為$980。 Enterbay 1:6 Real Masterpiece葉問 零售價︰$1,180 查詢︰2332 3615（Enterbay）
丹爺一掃十
配件一覽，附送木人樁、四對可換嘅詠春手及雞毛掃一支。
不但頭雕似，連配件都似到爆，好似木人樁上的樁木兩旁都設有虛位，黐樁時真係識得郁！
腳掌有磁石，就算唔用支架，Figure都可企穩於鐵板地台上。
送四對詠春手
功夫衫兩側並非魔術貼，而係跟足真衫咁用綁繩繫上，換裝時要花啲心機。
幾時有永成嘅Figure出呢？
黑色唐裝長衫第一集成日着，白色功夫衫就喺第二集曝光最多，依家兩套有齊。
陳真接棒
放大圖片
Boxset送埋雞毛掃，不期然令人諗番葉師父初戰金山找的經典對白：「我唔係怕老婆，我係尊重老婆！」Enterbay會唔會出埋葉師母嘅Figure呢？
留言列表
