由李連杰創辦的壹基金，原定周日（15日）在上海舉行明星賽車慈善賽，因國務院宣布當天全國哀悼舟曲遇難同胞，大會臨時將賽事延期一天舉行。
上周六（14日），眾星陸續抵達賽車場，本刊記者獨家潛入車手訓話室。當大會宣布改期一刻，一心諗住上嚟鍊番轉的城城，即時在台下大嗌：「吓，要取消！」擔心一場嚟到冇車揸的城城，更將火頭辣向有份出賽而遲到的李珊珊。40度高溫再加躁爆城城，夠晒火辣辣。
李連杰的壹基金，今年揀選上海賽車場作為明星比賽場地。現場烈日當空、氣溫高達攝氏40度，每個車手出賽都要着住件比羽絨還焗身的制服，即使玩慣賽車的郭富城亦難免心火盛。
城城：姓李嗰個遲到囉！
上周六（14日）下午，眾星乘專車陸續抵達現場，有份參加三場賽事的城城，一早抵達車手訓話室。本刊記者獨家潛入房內，當大會宣布周日賽事因哀悼舟曲天災需要延期時，由於未察覺有記者在場，坐在台下的城城反應激烈，第一時間大嗌：「吓，要取消！」隨即與身旁的朋友說：「再等我未必度到期喎！」此時台上司儀解釋：「咁我哋都要為國家出一分力嘅！」城城又搶着說：「我都想為明星隊出一分力喎！」
其間，台下有人建議將周日賽事提早在周六舉行，問到是否所有明星車手到齊時，城城即提高聲浪說：「爭咁個囉。（邊個？）咪姓李嗰個遲到囉！（即係邊個？）李珊珊呀！」
未知是否太過心火盛影響心情，城城在下午參加的其中一項賽事，去年攞第一的他，今年卻輸到冇影，只得12名。
珊珊：唔使換衫咩！
事後城城接受傳媒訪問時，表示願意留低參加周一（16日）賽事，「我有留意甘肅事件，呢次件事太突然，我依家都聯絡緊贊助商，希望可以募捐善款幫到啲災民。」可惜城城在當天慈善明星賽賽事，僅得第三名。對於賽果，城城則硬撐是由於車子性能有問題，「今日我抽排位係第5，其實好快追到第3，不過架車性能唔好，速度唔夠快。我知我自己能力，今年唔得，惟有明年再嚟過！」
對於被城城當眾篤爆遲到，李珊珊事後坦白承認。「吓，我要換衫嘛，啲衫喺樓下，但又要上嚟聽安排，咁唔通我拎住啲內衣周圍走咩。其實我一早到咗，不過唔通唔使換衫咩……我諗城城係講笑啫！」（你同城城friend唔friend？）李即高八度說：「嘩！唔識答你呢個問題喎！」
眾星百態
炎炎夏日，除了城城躁底外，其他在場藝人亦有啲火，場面搞笑又抵死，比賽車比賽更精采。
鄭伊健 fing水髮
鄭伊健無時無刻呵護一頭長髮，除了經常掹掹o曾o曾左撥右撥外，戴頭盔時更棄用頭笠怕焗親個頭，惟有吓吓fing水髮，姿整過班女星。
葉璇 雷射眼
一早話自己「病病哋」的葉璇，賽前準備試車時，被一名男fans嗌住影相，男fans更狼死到將手搭落葉璇膊頭。葉璇雖然冇開口鬧，不過雙眼如同放火一樣，再用眼「厲一厲」助手，助手才醒水趕走fans。
吳家樂 擒拿手
明星賽奪得冠軍的吳家樂，由於過度興奮，當大會頒發iPad獎品時，他忽然脫手硬生生將iPad跌落地，好在他眼明手快，嗱嗱聲執番份獎品，仲繑實腳猛話：「冇事、冇爛！」
張智霖 一陽指
首次落場比賽的張智霖，在明星賽輸給同是新丁的劉心悠，撞到成塊車尾翼飛脫，口講話多謝劉心悠送咗個生日Kiss俾佢（當日是張智霖的農曆生日）。但在賽後記招時，張智霖猛用手指指實劉的背脊，向伊健發牢騷：「咪佢撞我囉，搞到我要包尾，佢就捧盃！」
咪姓李嗰個 遲到囉！（真實對白）
唔通我唔使換衫咩！（真實對白）
賽事延期一天舉行，被打亂行程的城城，難免心情煩躁，當眾指珊珊遲到。在跑道上，更索性用背脊「得」實對方，果然天王有火。
為改期㷫爆
上周六（14日），記者獨家潛入車手訓話室，發現手持摺扇的城城得知賽事要改期，即隔空向台上的發言人大嗌：「吓，要取消！」身旁的多位男士都即刻望住佢。
開完會後，城城更在房外捉實兩位工作人員詢問正式賽事的安排，明顯對比賽十分緊張。
對於城城當眾踢爆李珊珊遲到一事，事後珊珊承認遲到，但相信城城只係講笑。
一向愛揸超級跑車的城城，當日戴了個獨一無二，寫住「Aaron Kwok」的鮮黃頭盔，十分搶眼。
多次傳不和的城城和鄭伊健，雖然同場多番碰面，但記者觀察所見，兩人未有交談半句。
留言列表
