吵大鑊引爆驚恐症Sa基冷戰一個月

隨住Theresa發律師信出走，金牌風暴再度升級，一接掌公司就屢爆是非，鄭中基當然頭痕，早前就盛傳佢計劃搵女友阿Sa過檔救火，點知食檸檬。

據知，兩人為此事吵大鑊，有人更發晦氣話：「咁妳同公司結婚啦！」冷戰至今一個月，慘受情傷加上工作忙碌，阿Sa終於頂唔住，自爆患上驚恐症兼屋企暈倒，大打悲情牌向男友求和。週四（10月1日）記者向阿Sa追問冷戰疑雲，佢一聽「鄭中基」三隻字即掉頭走人。

Sa基戀撻五年，雖然期間太子基不時夜蒲攬女，贏得「無賴」稱號，但阿Sa一於少理，對愛郎依舊死心塌地，伊人更多番開腔希望30歲嫁得出，全心等做鄭太。

本來談情說愛冇問題，弊在一牽涉到公事就麻煩！自年中Paco被調職，太子基接掌金牌大風後，頻頻爆出是非風波，古巨基、Miki相繼出走，側田、Kary亦被指準備離開，最新連Theresa亦加入走佬兵團，令一度雄霸香港樂壇的金牌，面臨無兵可用的困局。

當中矛頭直指太子基用人唯親，搞太子黨清洗異己，早前更捲入Theresa的情場騙案，形象大插水。對於男友慘成箭靶，阿Sa多次唔避嫌挺身護郎：「我從來冇識過咩愛情騙子，我身邊朋友都好善良。」又私下向友人狂呻：「呢人小心有報應！」

眼見風暴愈鬧愈大，為解困局及轉移外界視線，在「軍師」建議下，太子基竟計劃撬阿Sa過檔，「早排Ronald好愁，佢四圍同人講唔想老竇盤生意衰自己手，有位高層叻唔切獻計，話不如叫阿Sa組情侶檔，點知Ronald真係覺得掂。」知情人透露。

雖則阿Sa平時聽晒太子基話，但講到要同娘家英皇決裂，阿Sa亦有所顧慮，紙包唔住火，有關過檔做「太子妃」的傳聞逐漸在圈中流傳，為免愈描愈黑，伊人急急澄清：「我同公司仲有好多年約，老闆、吳雨、Mani都好錫我，我冇諗過其他。」

女友割蓆送檸檬的舉動，令太子基極為不滿，加上最近備受醜聞困擾，令其狂躁復發，上月初，兩人在男方家中短聚時，一言不合吵大鑊，「雖然詳情唔知佢嘈乜，但事後Ronald猛同大家呻，話阿Sa唔體諒佢，又話阿Sa鍾意份工多過佢。」知情人稱。

據知，爭執期間，有人一怒之下爆出晦氣話：「咁妳同公司結婚啦！」令兩人關係陷入冷戰，至今一個月仍沒有和好跡象；以往阿Sa談及戀情例必甜絲絲，但近日不單封口不談金牌事、撐愛郎，對於有雜誌指她戴上婚戒，仲好嬲咁話：「唔好屈我！」足證兩人感情亮起紅燈。

本月中，記者發現太子基與助手到中環HMV掃碟，同緊女友冷戰，心情當然差，全程所見，佢黑口黑面，一臉鬚根再加滄桑殘Look，成個「Dry」字掛塊面度，揀足半粒鐘，佢買隻三級片《誰和誰和誰有路》，套戲係講夫妻間偷食問題，似乎係向阿Sa宣戰。

男友發難，阿Sa卻分身不暇，最近一個月，佢頻頻中、港兩邊走，廣告、宣傳、籌備新碟等工作浪接浪，令出名孱弱佢上月中出席《勁歌優秀選》時，患上嚴重流感，要戴口罩示人，歌都冇唱。







左右護法出席完澳門騷回港時，阿Sa在數名助手保護下離開碼頭，場面大陣仗，可見病情唔多樂觀。

聞「基」驚恐當記者提及鄭中基，原本仲有少少笑容阿Sa，隨即露出詫異表情，急急走人。

娛樂八掛大放送★ 為食譜識飲識食街★ 任逍遙旅行萬里路 ★
科技電玩一線通 ★ 寵物地帶 ★ 潮流男女打扮★ 健康之道★ 財經投資★ 五行玄學八卦風水★ 娛樂猛片放送站★ 伴我奔馳 賽馬貼士 提供★
明星靚相大分享(4月刊)★ 明星靚相大分享(5月刊)★ 明星靚相大分享(6月刊)★ 明星靚相大分享(7月刊)★明星靚相大分享(8月刊)★ 明星靚相大分享(9月刊)★ 過期 週刊 及 雜誌(4-10月刊)☆


 

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄