Me 週刊 148 期鄭秀文“我一定有人愛” @ 明星靚相大分享☆

cover face
鄭秀文“我一定有人愛”
2009年10月16日
「佢叫 Mic Mic，女仔呀，好 cute好得意……（下刪二百字形容她那一副冧樣）」。
休息、工作、再工作，是鄭秀文新的生活方針，往昔拼了命的衝衝衝，今天已成為歷史，現在，每天收工，身體疲倦、精神飽足，回家仲有精力湊女——四個月大的英國短毛貓。
這一晚，我與她背對着中環夜景，相對閒聊。
閒聊前，已工作一整天的 Sammi，雙眼很倦，卻有神。
時間表排到明年，會出一張流行曲唱片、巡迴演唱會、兩部電影……還有，公開信主之後一直只聞樓梯響的福音碟，終於面世，尋愛歷程繼續進行。
「依家對愛有一種使命感，亦深信呢個世界總有人愛我。」
理由直接簡單，想愛，咪愛。
愛獨居不愛獨身，刻下，鄭秀文坦言密謀組織新家庭，成員包括一個瘦人（自己）、一隻小貓，遲啲唔排除再多一隻大狗，咦，唔知男人老狗算唔算呢呵？！
Sammi Cheng
黑色穿窿短袖衫$1,890 Andrea Crews
黑色珠片背心$1,750 Salasai
Both from Gallery de vie
黑白色斜間長頸巾
黑色絨面菱形格長頸巾（均未定價）
Both Plotz
黑色軟皮五吋高踭鞋$8,800
Pierre Hardy from Joyce
紫藍色襪褲、黑色魚網絲襪及腕錶
All stylist's own
原名：鄭秀雯
出生日期： 1972年 8月 19日（獅子座）
出生地：香港
身高： 5呎 4吋
體重： 48kg
語言：粵語、普通話及英語。
簡歷： 88年 16歲時參加《第七屆新秀歌唱大賽》，奪得銅獎後繼續學業。 90年正式加入樂壇即獲香港電台《十大中文金曲頒獎禮》最佳新人獎。之後分別於 96、 97及 01年，三度獲 TVB《十大勁歌金曲頒獎禮》最受歡迎女歌手獎。
主要作品：唱片《 Sammi》（ 90）、《捨不得你》（ 95）、《放不低》（ 96）；電影《飛虎精英之人間有情》（ 92）、《孤男寡女》（ 00）、《大搜查之女》（ 08）；電視劇《浪族闊少爺》（ 91）；廣告 Veeko（ 02）、 SK-II（ 2002-2008）。
唱片公司網頁： http://newsletter.esun.com
個人網誌： http://www.facebook.com/sammicheng819
我不是獨身主義者
天下女人一個腦，所想所諗大同小異，尤其面對「女人三十」這命題。
30至 33歲的鄭秀文，很想嫁，只是當時事業正值搏殺，愈做愈旺，唱歌拍戲順手拈來，既進取又好勝，這些都成為普羅大眾甚至當事人皆認同的成家障礙，但我數數手指，當年如果她嫁得成，新郎很可能正是許志安，「過咗去，冇再諗。」現在，二人即使同場演唱還是孖住參加別人婚禮，更自在。
活得比你好，鄭秀文大抵已做到。
緣份，從來不可強求，尋常女子如是，女明星尤甚，「家吓 37歲，驚都唔到我啦！」
講真，時下流行姐弟戀， Sammi市場更大，真係唔使驚，依家做女人，婚書等於影印紙， A3、 A4還是循環再用紙，大不了唔影，沒相干。「我絕非一個獨身主義者，但，亦唔同意別人所講，想建立家庭就要結婚的說法，生過仔才算真女人？我更加諗極都唔明點解！」
信主的，也渴望被人愛，求神賜福，人生大事，就有了後盾，甚至樂得輕鬆，「這種 unpredictable的感覺，幾得意。」
前陣子，鄭家的家庭結構起了變化，一向黐家的鄭小姐眼見連細佬都自立門戶，只剩下自己跟住父母，還來不及說聲唔好意思，鄭父先發制人，「請」她搬，畢竟三十幾歲，怕黑，不再是依賴的藉口了。
「爸爸說：『你咁大個，要試吓（獨居）啦！』到我搬，佢又好唔捨得。」
早就應該搬啦！咁大個人，自己住，有乜家居問題自己解決，至算真正自力更生。
獨居首晚，驚魂未定，但半年後的今日，她會偷閒在家點洋燭聽吓歌，又請朋友返屋企歎紅酒，不知幾寫意，「間屋連釘幅畫都係自己搞掂，好眷戀呢個空間，慣晒喇，阿爸聽到，應該會唔開心。」更何況，女大未嫁……「關咩事！我一拍拖，就會帶對方返屋企俾父母過目，最好大家坐埋一齊睇電視，所以，一齊住/分開住，冇關係。」

鄭秀文是潮州人、獅子座，兩者加埋，顧家到不得了，又精打細算，娶得過 o架！

2008
親自前往蒙古探望助養男孩，年尾福音唱片的收益，也希望捐給兒童慈善機構，「雖然我唔係媽咪，但對小朋友，好有承擔。」《蘋果日報》圖片

2009
去非洲埃塞俄比亞探訪，增廣見聞；近年愛上旅遊的她，還計劃完成演唱會就放假，去瑞士或布拉格旅行，實行放眼世界。《蘋果日報》圖片

2008
拍《大搜查之女》初期，寓工作於娛樂，現在的鄭秀文，已輕鬆自若得多了。

2008
去瑪嘉烈醫院傳道，講的比睇的更肉緊，「傳福音，需要好大信心，要願意接受別人的不同聲音和眼光，我依家已 ready。」《壹週刊》圖片

2009
早前為東亞華星演唱會準備，狀態大勇，綵排完依然精神奕奕。

上帝叫我唔好咁驕傲
人云，做明星，名利雙收，好過中金多寶；看人挑擔不吃力，但當人被金錢俘擄，就容易失控，得不償失。
「以前好介意唱片唔賣，拼命做，當自己係機械人，搞到好累，人稱自閉時期，心靈真係好自閉，就好似用泥塞住自己，唔願見人，感覺好困難。
「我用咗好長時間去走出困局。」
名利場，追逐的，還包括自己，當自我挑戰愈拉愈高，一條平衡線愈扯愈緊，最危險。情緒爆煲，倒瀉籮蟹，「我知道，好多人活在黑暗之中，有很多 struggle（鬥爭），其實，鄭秀文以前也是如此。」收拾心情，執番身彩，當日的苦，變成了今日的甜，「唱片賣唔好，咪算囉！或者，這就是上帝叫我唔好咁驕傲，唔好以為鄭秀文乜都得。」
福音唱片是 right timing做 right thing，「兩年前，唱片公司已叫我出碟，但佢哋完全出於商業考慮，我唔答應。」現在，身心進入完全 ready狀態，開放自己，就等於解放多年來的困擾，到時候，唱見證兼做善事，她會將唱片收益撥捐慈善機構，目前心水是兒童福利或男/女童院，「歌迷主要係 young generation，也想以年輕人為幫助對象，我諗， 80歲聽我嘅歌，領會點都冇咁深啩。」年尾又打算執筆出書，實行滲透性感染人，「只想祝福別人，唔諗賺錢。」
果然今非昔比。

Sammi Cheng
深藍銀紗釘鈕短褸$14,900
金色緞高腰褲$4,690
Both Marc Jacobs
黑色斜布背心$1,990
Pleasure Principle from Gallery de vie
金屬細釘頸飾及耳環（均未定價）
Both Plotz
腕錶 stylist's own
我愛 Mic Mic
出身於大家庭，嘈到慣，自己住，始終靜局，一個人睇電視、聽唱片、食零食，沒有分享，就沒有快樂，「有一下覺得寂寞，幾乎蚊螆飛過都聽到。」
鄭秀文說，一向不喜歡，甚至怕貓，獨居後，神推鬼擁養了一隻英國短毛貓，落手落腳照顧牠不特止，還將初生 baby嘜頭四圍公諸同好，包括初相識的記者，「我都估唔到自己會養貓，以前唔鍾意，依家好喜愛呀！」原本打算養狗，「我好鍾意大狗，好有安全感。」可惜在愛護動物協會揀唔中，反而，無意中睇中寵物店一隻小貓，造就母女情。「我當佢係寶貝，放工返屋企，好期待見到佢，我知道，這是愛。」
Sammi 12月尾的「 Love Mi世界巡迴演唱會」舉行在即， Mic Mic將暫託朋友家，自己專心迎戰。早於 8月 1日起，她已開始健身，每朝跑步個半鐘、緊接跟教練操多兩個鐘，「 schedule好慘烈。」身為減肥博士的她，堅持每日食量少於運動量， keep fit方法比從前「人性」得多，「有時夜晚想食粒朱古力，都 ok。」曾經滄海，健康重要啊。
「復出」後，講到明，每一年，拍幾多部戲、錄幾多張唱片、開幾多場演唱會，「想點行咪點行。」鬆緊自如，想開行 turbo又得，想收油又得，「工作模式，最合意。」這不是工作，想做就做唔想做就唔做，應該叫細藝。

Sammi Cheng
黑色短袖網衫$690
Creature de keis from Gallery de vie
幻彩珠片裙$38,000 Marios Schwab
七彩塑膠動物頸飾$7,850 Mctega
Both from Joyce
血紅鰻魚皮尖頭高踭鞋$6,790 YSL
鑽石手鏈$174,000 Chaumet
綠色絲襪、紅色絲襪、白色絲襪及銀色絲襪（ worn as glove）
All stylist's own
後記
「人已經跳咗出來好耐。」
鄭秀文說，情緒病好番晒咯。
閒聊接近尾聲，助手忽然報料，有台灣歌迷欲打尖買演唱會門票，「唔啱規矩喎……」、「佢哋特登坐飛機過嚟……」、「咁，你幫吓人啦！」。
我絕對相信，鄭小姐的號召力，然而，她的親切，冇錯，係親切，今日真的耳聞不如目見。「如果有人因為我嘅改變而更加鍾意我，可喜吖！」
唔知是否好奇心作祟，我愈諗愈有興趣，聽一聽她的福音唱片，看一看她的心路歷程，研究一下她的病歷。
畢竟，情緒病，邊個香港人冇？
Shop List:
Chaumet中環雪廠街 2號聖佐治大廈地下 2536 9338
Gallery de Vie中環歌賦街 45號地下 2851 1848
Joyce金鐘太古廣場 334號鋪 2523 5944
Marc Jacobs中環置地廣場 104號鋪 2868 9782
Plotz 9755 0824
YSL中環歷山大廈地下 G3號鋪 2868 0092
撰文:伍淑嫻
形象:朱榮
攝影: CK@secret9productionhouse
化妝: Ricky Lau@ZING the Makeup School
髮型: Billy Choi@Hair Culture
鳴謝:東亞娛樂