呢排舖位市場炒得火熱,舖價升幅三級跳,班舖位炒家閒閒哋兩三個禮拜就賺幾百萬。至於長線投資者,今年以來都開心,事關租金加完又加,回報好和味。不過,喺咁熾烈的市況下,竟然有投資者幾年前買入嘅舖非但冇錢賺,仲蝕咗一筆,而呢位投資者並非等閒之輩,竟然係有「賺錢之神」稱號嘅邱永漢。

一直以來,邱永漢最愛向外侃侃而談嘅戰績,就係九十年代初掃入太古城六百五十個單位,然後喺九七樓市大崩圍前幾乎悉數沽售,令地產界嘖嘖稱奇。大家都認為,邱老眼光奇準,對地產市道拿揑得法,有人更視佢為樓神。

點知賺錢之神都有蝕錢時,邱老○六年時睇中旺角東京銀座商場(原址是南華戲院),斥資七百一十二萬買入四個一樓商舖,原以為喺旺角咁多人流嘅舖實掂,豈料呢啲拆細舖位嘅商場,並唔容易搞得起,個場唔掂,小業主要求大業主同管理公司搞多啲推廣,有小業主唔交管理費,最終被斷水斷電,個場變了死場。最近業主希望可以將個場搞翻生,但到o衣家都係得幾個舖重新開業,當年買入嘅業主唔好話賺錢,想賣都唔易呀!

賺錢之神邱永漢

邱永漢揸住嘅四個舖現時正在市場放售。

旺角東京銀座令賺錢之神邱永漢都要一嘗失敗滋味。

興登堡凶兆冇料到

其實,投資真係冇長勝將軍,股票市場專收叻仔,乜嘢專家都唔可以盡信。你睇今年八月時,市場好多消息都睇淡九月個市,《華爾街日報》發表評論文章,列舉十大原因指股市隨時出現暴跌,例如市場估值過高呀、通縮又已成事實、債務依然沉重等等,總之講到似層層,好似個市隨時會大冧。

好多人話八月出現興登堡凶兆,九月美股不妙,結果錯晒。

同時,市場好多報道,話乜嘢「興登堡凶兆」已經出現,九月美股將會崩盤。創出呢個股市指標嘅失明數學家米耶卡講到言之鑿鑿,話每有呢個現象出現,幾大機會股市難逃劫數。結果點?美股升咗,港股更加係一洗頹風,所以市場好多評論,大家都唔需要太上心,參考吓就算喇。

謝國忠言論得啖笑

好似前摩根士丹利策略師謝國忠咁,部分傳媒對佢言論奉若神明,但係咪咁準,一言就好有疑問。你睇佢過去十年嘅分析,一味看淡,咁好自然會有一兩次中,但投資好講對時間的掌握;佢○六年講,話全球股市升浪將結束,熊市隨時出現,冇錯到○八年底確實大跌,但當中股市旺足兩年,若信佢講沽空,輸死都未等到個市跌。

再講樓市,○五年中,佢話香港樓市有機會步入長期熊市,若小市民當日信佢講唔敢買樓,今天樓價咁高,怕且都冇乜機會上車。同一年底,佢老哥又話中國出口下降,隨時引發樓市下滑,但之後幾年,大家有眼睇,國內大城市樓價以倍數上升。

謝國忠上月初又發表意見,信誓旦旦咁話,香港樓市最快喺九個月後爆煲,換言之明年五月後,樓市隨時大跌,佢仲估計跌幅更高達一半,一言今次又睇睇佢預測係點?

謝國忠話○九年恒指將會喺一萬至萬五點上落,結果恒指升過兩萬。

袁彌明股樓雙贏

有時講投資,只要市就,又夠膽,一個普通人都隨時可以賺大錢,好似近期準備參選議員嘅前港姐袁彌明,原來除咗言論出位外,投資斬獲都唔少。佢長揸一啲藍籌股票外,時不時仲玩吓期指同期金,成個基金經理咁。袁彌明主要玩細期多,每次最多揸十到二十張,一到高位就分段減持,到出現調整時又再入市。佢嘅投資心得就係唔會輕易喺牛市時沽貨,即使去到高位都唔會全數平倉,最多只開短倉。

不單止買賣股票,袁彌明仲學人炒埋樓,結果又畀佢賺到吓錢。○四年佢用一百六十三萬,喺銅鑼灣崇光附近買咗個約五百五十呎單位,揸咗一年左右就以二百四十萬元賣出,扣除廿萬裝修,利潤成五十七萬,回報都幾理想。之後佢喺同區又買個約四百零呎嘅單位,今次唔係炒而係租,每月租金九千銀,以二百二十萬元購入價,租金回報都接近五厘㗎!

袁彌明炒樓又炒股,依家仲走去競選議員。

arrow
arrow
    全站熱搜

    stacylife 發表在 痞客邦 留言(0) 人氣()