劍雨 Online 買兇殺人求饒免打 @ 明星靚相大分享☆

華語電影改成遊戲唔係話完全冇，但好似呢套跟電影版同期推出嘅MMORPG遊戲《劍雨Online》做得咁認真，印象中又真係冇乜見過。《劍雨Online》除咗可以營造到媲美電影版嘅磅礡氣勢外，仲加入咗好多有趣嘅點子，可以喺武俠世界內育成猛獸出戰，甚至於遊戲中買兇殺人或者跪地求饒，夠晒人性化。

用得上吳宇森電影作品做後盾，遊戲版《劍雨Online》在各方面的製作都相當認真，無論係遊戲美工或者系統設計上，都突破以往武俠MMORPG嘅框框，難怪電影監製吳宇森會在TGS期間，都親身飛到東京為遊戲宣傳。

真實角色彩戲師（戴立忍飾演）
真實角色彩戲師（戴立忍飾演）

遊戲角色

場景造型跟足電影

開發小組專登走到去電影拍攝現場考察，令遊戲內的一磚一瓦、色調、裝飾品以至牆上的雕字都做到跟電影一樣，甚至連楊紫瓊戲中嘅居所同主要場景「云何寺」、「馮國公府」，以及「泰山十八盤」、「華山群峰」等富中國特色嘅場景，都幾乎可原汁原味地在遊戲內重現。電影版搵嚟國際有名嘅日籍時裝人和田惠美主理角色造型，遊戲版亦不遑多讓，由角色的神韻、衣服上的布料以至配件飾物等都幾乎跟到足，打機時好似睇緊電影咁。最特別係遊戲內出現嘅電影角色，唔係只識行行企企嘅NPC，玩家除咗可以體驗到特別嘅武俠氛圍外，亦可以從中了解到部分電影情節，仲有機會同電影角色交流添！

真實角色細雨（林熙蕾飾演）
真實角色細雨（林熙蕾飾演）

遊戲角色

為女擋刀買嘢講價

電影故事大綱講述一眾角色為搶奪擁有特殊能力的「遺體」而弄致刀光劍影，遊戲版更喺呢個明朝俠客世界內，引入唔少人性化嘅有趣設計，譬如有「買兇」、「緝兇」、「講價」同「為妹犧牲」等新系統。明明自己等級唔夠高，唔夠人打嘅時候，可以畀大家揀「求饒」，請求對方手下留情；又或者之後透過「買兇」系統，懸紅請更高等級嘅角色幫你報仇，能屈能伸先算係好漢。如果想在遊戲中表現男子氣概，仲可以「為女犧性」，在危急關頭為女伴擋一刀，但可唔可以博得紅顏一笑，就真係要睇造化。小記覺得遊戲內嘅「講價」系統最搞鬼，只要名聲夠高的話，喺客棧買道具時，最多仲可以講到半價成交！

天振俠士

羅剎力士

遊戲場景氣勢磅礡，重現出中國武俠世界嘅神髓。

唔夠打的話可以試吓向對手求饒，大丈夫能屈能伸。

Level升得高，買嘢時仲可以講價。

加入「買兇」同「緝兇」系統，畀鐵搵高人幫你搞掂對手。

五大職業育成寵物

玩家可在《劍俠Online》中揀選扮演攻擊速度最高的天振俠士、能夠使用重武器的羅剎力士、可以使出與機關傀儡相合之術的傀儡師、以內功操縱天地水火之氣的禁咒師，以及用詠歌擾敵的舞樂師等5大職業角色，而且仲可以育成兇猛怪物作為座騎闖蕩江湖。組隊打人係MMORPG一大賣點，遊戲初期最多只能支援到六打六嘅對戰模式，但如果組隊時預埋同幫派嘅兄弟，仲會得到額外點數，加強角色嘅能力值，所以出陣打人時最好認清楚邊啲係自己人。

戰鬥場面美工都做得幾有水準。

跟同一幫派成員組隊出戰，仲會得到額外點數提升能力。