承接上一輯《巾幗梟雄》的大奶奶和四奶奶連場大戰，在《巾幗梟雄之義海豪情》中，謝雪心與飾演九妹的鄧萃雯再度碰頭，今次兩人的對手戲更加厲害，越鬥越過癮。飾演大毒梟的心姐坦言為做好角色，已盡情豁出去，與雯女的鬧交戲情緒更在心底積聚良久，到正式拍攝時將怒氣釋出，盡地一煲。撰文：何慧斯
在無綫劇集《巾幗梟雄之義海豪情》中，謝雪心飾演黑幫大家姐鄭朗喜，她日前接受訪問坦言很喜歡這個角色，她說：「以前好少演啲可以畀我揮灑自如，又唔使畏首畏尾嘅戲，喜姐呢個角色我真係豁晒出去做，大毒梟喎！犀利過之前做嘅角色，不過我好鍾意鄭朗喜呢個角色，好立體又有性格，我當係畀自己一個大挑戰。」
為角色造型費思量
正因如此，心姐接到劇本後，曾為喜姐的造型費煞思量，她說：「今次同大奶奶嘅風格好唔同，我試造型嗰陣着咗套長衫、旗袍，兼且仲有好多好斯文嘅套裝，我係諗有難度，啲衫畀人感覺直頭似少奶奶大家閨秀，但實際上喜姐係字都唔識多個，於是乎我喺度諗，諗吓一個未讀過書嘅人會係點？佢嘅思維又係點？我都有問監製同導演嘅意見，點先可以畀觀眾覺得我係冇讀過書，又唔可以有貴氣，要有喺江湖打滾嘅霸氣，好彩劇本都帶到我入戲。」
放大圖片 
心姐在《義海豪情》中處處針對雯女飾演的九姑娘，兩人甚多針鋒相對的場面。劇照
放大圖片 
劇中心姐和岳華自幼相依為命，兄妹情誼深厚。劇照
「唔係拍打戲先會傷」
自從上一輯《巾幗梟雄》心姐飾演的大奶奶和四奶奶好戲連場後，心姐與飾演九妹的鄧萃雯再度碰頭，兩人可謂越鬥越過癮，她說：「我呢個做姑姐嘅由細到大都好錫九妹，大家嘅關係好好，不過九妹俾人拐完返嚟後，我哋已經冇晒親人嘅感覺，所以我咪好小心咁一路觀察佢，小心佢嘅一言一行，因為唔可以俾啲外人侵吞東泰呢個江山王國。」
放大圖片 
《義海豪情》中心姐這對怒火眼睛，令人不寒而慄。電視圖片
放大圖片 
謝雪心上年憑《巾幗梟雄》勇奪萬千星輝頒獎典禮最佳女配角獎。
放大圖片 
《巾幗梟雄》中，謝雪心的大奶奶一角甚具霸氣，人物性格突出。《巾幗梟雄》劇照
提到最喜歡的情節，心姐說：「喺《巾幗梟雄之義海豪情》入面，我好鍾意第四集，嗰場戲講少傑俾人殺咗，但九妹話冇事仲要放走兇手，我真係頂唔順，嗰場戲醞釀咗好耐，差唔多拍到天光，我覺得唔係淨係拍打戲先會傷，我哋儲埋同凝聚大家啲感覺，真係好似解穢酒，忍到極限一次過爆晒出嚟。」除了與九妹連場激鬥外，心姐與阿哥鄭朗軍（岳華）的兄妹情也很濃烈，心姐說：「喜姐佢無父無母，咁緊張大哥係因為由細到大都係阿哥湊，一齊打江山，兄妹情好濃厚，幾乎當阿哥好似老竇咁，阿哥就係我嘅一切。」
大奶奶賦予新生命
問心姐喜歡大奶奶抑或喜姐？心姐想了一陣子才說：「我真係多謝公司同監製創造咗大奶奶呢個咁深入民心嘅角色，我係第一次做呢類反派戲，以前未做過，所以做完都好難忘。大奶奶係我一個轉捩點，因為大奶奶，我攞到最佳女配角，呢啲全部都係意料之外嘅事，我冇諗過觀眾朋友咁接受，我好鍾意做啲濃情嘅戲。人生就係要有好多唔同嘅衝擊，做演員最好嘅地方就係每一次都有唔同嘅發揮，最緊要係觀眾鍾意睇，我會覺得好值得去做。」攝影：黃文成髮型： Jacky Au of HAIRCONRNER 
在《義海豪情》中，謝雪心飾演黑幫大家姐，拍攝前花了很多時間揣摩角色。
留言列表
