明星微博錯字多　陶傑反諷：祖兒咁紅錯係型 @ 明星靚相大分享☆

錯在微博

藝人與名人都鍾意喺微博同粉絲交流，但不少明星經常寫錯字。天王天后人馬嘅微博，閒閒哋都有幾十至幾百萬人關注，稍為有錯分分鐘誤人子弟。
今次我哋請嚟才子陶傑做文字判官，幫藝人改錯字。平日最鍾意講反話嚟諷刺時弊嘅陶傑，一如既往諷刺天后容祖兒寫錯字唔單止係型，仲係一件顛覆同創新嘅事，而唔紅嘅藝人寫錯字就唔可以原諒。針砭娛圈跟紅頂白，見高就拜，見低就踩，一針見血！

容祖兒係顛覆同創新
中五畢業嘅樂壇天后容祖兒向來都緊貼潮流，微博至今已累積145萬粉絲，為讓內地粉絲睇得明，平時佢主要以中文寫博文，間中才會以英文撰寫，可惜文法和用字均有不少錯誤。
陶傑：「祖兒咁紅，文法上有錯，都唔可以話錯，呢啲叫做創新，因為天后級嘅人係唔需要拘泥於鬼佬所制定嘅文法，佢可以顛覆同創新啲。我哋細個學英文有動詞，佢唔使。佢咁唔係錯，係型！」

陳法拉唔紅就係錯
華姐出身嘅陳法拉出生於四川成都，15歲移居美國，畢業於著名嘅普林斯頓大學商學院，學歷在藝人中算高，不過微博內仍有唔少錯別字。
陶傑：「陳法拉係邊個？（佢係《義海豪情》藝員。）有冇容祖兒咁紅？（冇。）冇呀，冇就錯喇！雖然佢只係寫咗兩個錯別字，不過如果所有同音字都通用，呢個世界咪減少9成嘅字唔使用囉！」

何超雲有錢錯在疏忽
賭王何鴻燊千金何超雲系出名門，現就讀於英國著名時裝學院Central St. Martin，知書識禮中英皆宜。超雲習慣以中文寫微博，間唔中用英文回覆朋友，但錯誤就出在簡單英文上。
陶傑：「何超雲呢句英文係錯就錯，不過只係錯在疏忽啫。因為佢本身都係『鬼鬼哋』，外國讀書加上有歐洲血統，呢啲一定係打錯，佢有幾百億身家嘅老竇，所以應該係唔小心嘅疏忽，草民就冇資格錯呢啲嘢！」

王浩信諗嘢唔經大腦
王浩信曾於美國科羅拉多中學畢業，之後回流香港藝術學院修讀平面設計高級文憑，有唔差嘅學歷根基，不過就錯於經常用嘅「咁」字上。
陶傑：「個『咁』字係咪打唔到，就求其打個字落去，呢啲咪淨係用個小腦條件反射去做嘢，而唔係經大腦諗嘢囉。」

敖嘉年有語病
近期憑「排骨仔」一角成功彈出嘅敖嘉年，入行前曾就讀職業訓練學校時裝設計，畫圖多過寫字，會唔會中文都唔係咁好呢？
陶傑：「邊個係敖嘉年？哦，《義海豪情》藝員。呢句『想起自己已過身的爺爺』就好有問題，應該係『想起已過身的爺爺』，而唔係『想起自己已過身』，真係大吉利是。依家咩都講簡約，明明5個字可以表達，偏偏要寫8、9個字。」

黃浩然衰唔小心
啱啱宣布老婆有喜嘅黃浩然，畢業於香港城市大學資訊科技系，有樣有學歷有家庭，好男人一個，不過衰在唔小心寫錯字。
陶傑：「其實佢都唔係錯得晒，只係衰在唔小心。」

胡杏兒錯得好交關
出身警察世家嘅胡杏兒曾留學於北愛爾蘭，直至高中畢業後才回港入讀香港科技大學化學系，不過大二時因參選港姐輟學。雖然浸過鹹水，但杏兒就俾陶傑大鬧。
陶傑：「『Hope to working with you?』就唔啱喇，英文唔掂就唔好show off。如果佢唔係容祖兒就唔好寫得咁寸，啲英文亂晒籠。之前一句同黃日華嘅對話，唔係文法上嘅錯，而係點解佢會叫黃日華做前輩，之後又要叫佢做華哥？而唔係華叔？哥字係用於同輩上，佢前後唔統一囉。而『小的』喺中國歷史上係指階級低賤嘅人，呢啲係邏輯思維混亂。」

周麗淇簡單複雜化
中五畢業嘅周麗淇喺微博中有好多口語化嘅中文同錯別字，陶傑即指娛圈中人教育水平較低，真係「崩口人忌崩口碗」。
陶傑：「『準備好味？』就應該問蘇絲黃，無端端加多個口字，又係捨簡取繁。不過老實講呢行嘅人都係讀書唔多，有時寫口語化、同音字令人明白就算，教育程度低，係咁都好正常。」

薛凱琪中文差係應該
曾就讀英基港島國際學校嘅薛凱琪，雖然一直喺本港讀書，不過中文就麻麻哋，雖然佢努力用中文喺微博上同人溝通，但連好簡單嘅字都錯。
陶傑：「薛凱琪係咪成龍個仔嘅女朋友？咁佢曾經喺國際學校讀書，佢嘅英文可能叻啲，中文差係應該嘅，呢個世界英文叻就已經夠。」