性感女神周秀娜，在新片《婚前試愛》拍住俘虜唔少港女的萬寧哥哥沈志明，肉搏連場。床戲火辣辣，之不過，餘火未熄，閱仔無數的娜姐竟然中招，同萬寧哥哥戲假情真玩「試愛」，秘密撻着個多月。本月初，本刊發現二人背住另一半相約偷食，打得火熱，忍不住在餐廳摸黑拖手，公開調情。
女友劈腿，蒙在鼓裡的娜姐男友Avis，睇到女友同萬寧哥哥偷食相後，即場呆咗，更拋下一句：「我咪再睇實啲佢（周秀娜）囉！」

半個月搞掂
在片場等埋位都如貼身膏藥，經常搵機會黐實周秀娜的萬寧仔，一早就對娜姐眼見心謀，攞正牌做埋「床戲」，就更加「慾罷不能」，明知對方名花有主，亦大爆發狂溝。《婚》片煞科後，萬寧仔為令娜姐心動，日發過百短訊，又投其所好，不出半個月，便將宅男想吞落肚的性感娜姐追到手。
「萬寧仔唔單止狂send短訊俾Chrissie，知道對方鍾意公仔Monchichi，就一口氣送咗三個大Monchichi俾佢，細心加埋萬寧仔溝死女嘅外形，Chrissie都老貓燒鬚，跌入萬寧仔五指山。如果拍床戲嗰排，Chrissie男友去監場，可能無咁易出事！」知情者說。

公開摸手仔
上月底，就有人目睹娜姐同萬寧仔，在灣仔星街一法國餐廳撐枱腳。本月四日，二人同為新片出席宣傳活動，但席間毫無交流，活動後，兩個更扮到各有各走，但原來他們早已相約好在尖沙咀中港城皇家太平洋酒店，一間客人稀少、燈光昏暗的露天餐廳再見。
一坐低，兩台發電機各自施展chok樣，旗鼓相當；唔夠十分鐘，萬寧仔情到濃時，忍唔住郁手捉實娜姐，摸住對方手掌調情。眾目睽睽，娜姐俾萬寧仔拖咗一陣就好快「清醒」，借意鬆開男方的手，免得偷食太張揚。
密會個多小時，埋完單仍難捨難離，走到靠欄杆位置，望住個海繼續傾，見娜姐頭髮被海風稍為吹亂，萬寧仔即緊張幫對方撥正，細心到爆，令娜姐完全投降。但礙於娜姐與男友Avis同居，萬寧仔最終只能送她上的士離開，未有下場。

旗鼓相當
娜姐遇上萬寧仔，一個係宅男殺手，一個係溝女聖手，雙方勢均力敵。據知，偷食娜姐前，萬寧仔已經成功追掂有33D的華語電視台女主播趙彤；靚樣有身材的趙彤，向來唔係富豪唔吼，她曾與霍啟剛傳出緋聞，令霍公子一度與郭晶晶情海翻波。雖然一心釣金龜，但亦被有樣無財的萬寧仔征服，更有傳二人現於銅鑼灣同居。
各有正印，萬寧仔想深入親近娜姐，唯有出埠進行。早前周秀娜在台灣跟蕭敬騰合拍新片《殺手盆栽》，有傳萬寧仔一於死跟，以返家探親為由，上週追到台灣，黐實娜姐。

偷食相做證
女友俾萬寧仔「侵吞」，懵然不知的Avis於上週五看到娜姐同萬寧仔的偷食相，才恍然大悟。起初未睇到相，Avis還力撐二人撻着只是空穴來風。
壹：聽講Chrissie同萬寧仔撻着咗！
A：拍戲實有呢啲緋聞，我都識萬寧仔，佢兩個係朋友咋！
記者把娜姐偷食相給他過目，本來仲有笑容的Avis，開始面色下沉，呆了好一陣子，最後為強撐女友，他強顏歡笑裝作輕鬆。
壹：你仲唔信？
A：咁我仍然好信Chrissie！
壹：早排萬寧仔仲專登去台灣陪Chrissie！
A：係咩？我聖誕節都會過去陪女友。既然係咁，我咪再睇實啲佢囉！說罷即返回髮型屋，繼續開工。

拍出火
演出要投入，男女主角在熒幕前扮完情侶，鏡頭後已經動真感情，搞到戲假情真，由此變成地下情侶，多的是。


摸黑拖手
娜姐同萬寧仔偷食，所以專登喺尖沙咀揀間烏燈黑火嘅露天餐廳約會。坐咗一陣，男嘅已經忍唔住拖實娜姐隻手，當眾煙韌。


摸掌心
拖實佢隻手未夠喉，溝女有一手嘅萬寧仔仲掃娜姐掌心調情，搞到閱仔無數嘅娜姐，好似變咗萬寧妹妹咁冧爆。


撥頭髮
飲完嘢，兩個繼續吹風傾偈。萬寧仔既不時幫娜姐撥番好吹亂嘅頭髮，然後順手摸下面仔，又一冧死女動作。


扮零交流
偷食前，二人要為電影《婚前試愛》出席宣傳活動。有景轟的他們在台上刻意扮到無乜交流，怕眼神一接觸露出偷食馬腳。


兩男無瞅睬
上週六（十八日），Avis冤家路窄同情敵萬寧仔出席同一活動，明知對方食咗自己條女，又要扮無嘢，Avis唯有全程當對方透明。


我會睇實佢！（真實對白）
上週五，娜姐男友Avis睇完偷食相，即谷住度氣。


床戲動真火
兩人初次埋牙，無論打茄輪抑或情慾場面，都七情上面，演來相當投入。結果情慾戲戲假情真，拍出火撻着。


周秀娜跟男友Avis經常以情侶檔出席活動，好鬼sweet。但轉頭卻抵不住萬寧仔狂追，瞞住男友偷食。


周秀娜迫爆的身材，確實是好多男人心目中，夢寐以求的對象。


有傳萬寧仔的正印是華語電視台女主播趙彤。而在趙彤的微博，確實放了不少她與萬寧仔的合照。



俘虜不少港女的萬寧仔，今年初便傳出他與台模一姐宋紀妍的緋聞，並指女方專程來港密會他。


萬寧仔
中文名：沈志明
年齡：26歲
身高：6呎1吋
胸肌：39吋
事業：正職模特兒，現更進身影壇新貴。


大隻型男 Avis
中文名：陳偉成
年齡：27歲
身高：5呎11吋
胸肌：40吋
事業：正職為髮型師，兼職模特兒。


陶大宇　郭羨妮
07年二人拍《學警出更》一場激吻戲而吻出火花，女方不惜做第三者，介入男方與前妻的婚姻，一度被指為「狐妮」。轟烈的婚外情最後兩敗俱傷，二人形象插水，至今仍無法翻身。


房祖名　薛凱琪
05年電影《早熟》合演一對小情人，戲假情真，去年於電影《分手說愛你》再結戲緣，親暱戲份自然到連監製鄭丹瑞也大讚！但有指因男方花弗，最終分手收場。


鄭嘉穎　周麗淇
06年二人於TVB劇集《最美麗的第七天》中合作，由香港一直嘴到北海道，幕幕煙韌，唯二人一直否認拍拖玩地下情，至08年有傳因佘詩曼介入，男方劃清界線狠撇女方，被指為賤男。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄