直擊 4大新湯火鍋 @ 明星靚相大分享☆

天寒地凍食火鍋，豬骨、沙嗲、醉雞鍋已食到膩！即睇記者親身試食以下4款新湯火鍋，由湯底款式、材料以至配料評分，睇吓邊間最得？
（以下評分以5★為最高）

夠鮮　番茄蟹肉濃湯
愛蒲愛吃的朋友推介中環SOHO區的Club Hip。這間樓上bar，不時推出新食品，最近推出「海鮮滾滾火鍋大餐」，客人可選冬瓜陳皮醉鴨湯或番茄蟹肉濃湯湯底，配料是新鮮海鮮，有大蝦、帶子、花甲、蚌類等，令人食指大動。靜靜地喝着紅酒、嘆着暖笠笠的火鍋，別有一番滋味，仲可以唔使轉場直落唱K飲嘢玩成晚，正！

創意度：★★★★1/2
好味度：★★★★★
配料：★★★★
環境：★★★★1/2
抵食度：★★★1/2
記者評：提供套餐食物種類有限，價錢偏貴，但海鮮的質素很好，環境一流。

Club Hip
消費：$388/位，4位起（需2日前預訂）以海鮮為主，分量足4人用。
地址：中環雲咸街63號巴力大廈6樓
電話：2537 3088
營業時間：5pm-2am（星期一至四）、5pm-4am（星期五及六）

健康選　蘆薈木瓜軟骨鍋
睇廣告後去食蘆薈木瓜軟骨鍋，真身賣相一般，湯底材料包括蘆薈、木瓜、橙肉、蘋果、番茄、白菊花和豬軟骨。蘆薈只有5片，其他材料分量也不多，但湯底味道幾清甜，豬軟骨軟腍，木瓜肉和蘆薈要趁未煲溶前食，其餘湯料留下熬湯便可。配料推介極尚三牛拼盤，百零蚊有齊本地手切肥牛、美國雪花肥牛和雪花牛肉粒，肥牛片入口即溶，好味！桂花蚌及海螺片合格，豆腐、雜菜和鮮菇併盤，這些素菜配上木瓜軟骨湯效果很好味。最後埋單每位約二百蚊，價錢都算合理。

創意度：★★★★
好味度：★★★1/2
配料：★★★★★
環境：★★
抵食度：★★★★
記者評：湯底清甜偏
淡味，蔬果配料夠健康。
抵讚是全店提供免費wi-fi，啱晒鍾意邊食邊上網的人。

德興酒家
消費：平均$200/位
地址：銅鑼灣廣場2期6樓
電話：2573 9090
營業時間：6pm-1am（星期五、六至2am）

火辣選　辣酒花甲鍋
嗜辣的人，—定要試HIPOT新推出的辣酒花甲鍋，紅卜卜的湯鍋裏，有好多指天椒和香料，辣得惹味又刺激；想食得清淡健康啲則可選野菌螺頭鍋，味道清新。叫埋紅魚奇兵海鮮盒，有7款雜錦海鮮，款款新鮮，再點多2款特色肉丸，4位都夠食，埋單5百蚊有找！

創意度：★★★★
好味度：★★★★1/2
配料：★★★★1/2
環境：★★★1/2
抵食度：★★★★
記者評：辣味重，湯夠濃，但唔見湯渣，只見很多香茅浮面，如再加酒會更香。

HIPOT
消費：平均$150/位
地址：銅鑼灣霎東街33號快捷假日酒店3樓
電話：2892 0800
營業時間：11am-4:30pm、6pm-12mn（星期日至六）

滋補養顏　鱷魚尾膠鍋
打邊爐仲想養顏補身？必試記者及攝影師食完都一致話好「補」的鮮果鱷魚尾膠火鍋。御火鍋提供各種有關鱷魚的湯底及配料，點菜前侍應講解鱷魚肉對身體的好處，例如鱷魚尾滋陰補腎，含豐富膠質能增加皮膚彈性；鱷魚肉則含豐富蛋白質和氨基酸。
湯底賣相平凡，奶白色湯內約有7件鱷魚尾膠；其他配料有雪梨、蘋果和無花果。我們先飲一碗鱷魚尾膠配合水果熬的湯，比花膠湯的味道更鮮甜！火鍋配料全部跟鱷魚有關，包括鱷魚脷、爽肉、黑松露鱷魚丸、粟米冬菇鱷魚餃等。全部食物跟湯底好match，十分滋味！熱葷有鱷魚春卷、鱷魚脷和鱷魚糯米飯，作為火鍋小食很不錯。埋單每人平均三百多元，如此滋補養顏的火鍋，值得一試。

創意度：★★★★
好味度：★★★★★
配料：★★★
環境：★★★★1/2
抵食度：★★★★
記者評：配料的價格較貴，但鱷魚火鍋罕見，兼具補身療效，尾膠湯底非常好味。餐前小食和甜品亦取材自鱷魚，具特色兼有誠意，建議相約多幾位朋友，可以多試幾款鱷魚配料，盡情食又補身。

御火鍋
消費：平均$350/位
地址：尖沙嘴漆咸道南17號帝后廣場地庫
查詢：2367 2123
營業時間：6pm-3am（星期日至六）