So Comment 蘇施黃
父親九十大壽，哥哥姊姊、表姐、妹、親朋戚友從各地來港賀壽，壽宴前和部分親戚，一行21人去上海旅行，人那麼多，一定要預先安排好飯餐，就算飲嘢地方亦要安排好，訂好晒位。
人都癲！！！
記得，去電一家叫「新農庄」的地方訂位時，經理說了多次：「你們訂房間，我們要收最低消費……」，到了那天晚上，客人上座，我嗱嗱臨叫餸，大概點了十碟涼碟，經理又好驚慌地說：「夠了，夠了，叫這餸罷……」其實食上海嘢，最enjoy食冷盤！最後，每圍叫了大概12碟冷盤，10個熱餸。食到大家飽住肚走。結賬……任估多少錢？！我們21人冇一個估中！食咗¥1,725！！！係咪人都癲？！
最癲係，跟住去飲嘢，飲咗¥2,000！！！
回到香港，又係兩大枱食飯，家常便飯$6,000落樓，之後去飲嘢，飲嘢比食飯時多了大概8-10人，落樓$8,000！！！
我發現有2個真理（一）千祈唔好請飲嘢（二）在家請客，千祈唔好食生果，隨時妹仔大過主人婆！請人飲嘢最戇居，貴得嚟係冇人記得。人會話：「嗰日亞蘇請食飯，嗰隻豉油雞幾好食呀……冇人會話：「嗰日亞蘇請飲嘢，嗰杯long island ice都幾好飲呀……」所以記住搶埋食飯單嘞！
過時過節，大家又要出街蒲嘞！其實飲乜真的唔重要，最緊要地方好，VIBES可算是在九龍一個好去處。好處是露天，正合煙民。枱與枱相隔頗遠，好有privacy！大大的梳化，一班人自成一國。亦有很多流水。那天，坐在流水旁，有一個磨砂鋼荷花，大概6:30pm有侍應拿走荷花中心的圓蓋，噢，原來係個火暖爐，好聰明，利用得好好。
不過記住唔好飲Vanilla Vodka，好難飲！飲到餓，又可以叫Tapas來食。
Opening hours:3pm-12midnight
Vibes
地址：九龍尖沙咀彌敦道118號MIRA 5樓
電話：2368 1111
蘇施黃
資深電台人，天生異「口」，除了講嘢叻，食嘢同樣嘴刁，近年開咪、上電視做主持都不離教人食得精，吸引大批粉絲跟佢搵食。
留言列表
