李亞男同男友王祖藍去年被踢爆秘密拍拖，長短腳之戀嘅感情仲越嚟越穩定，雙方仲已經見晒家長。噚日李亞男喺金鐘為「喜蝶迎春」賀歲活動做司儀，有愛情滋潤嘅佢，明顯肥咗又靚咗，佢話因為農曆年食好多煎糕，所以肥咗幾磅。李亞男話農曆年間不停去搵結咗婚嘅人利是，到手都軟，佢仲好大方話已經去咗男友屋企拜年，李亞男好開心咁話：「伯母同我講恭喜發財之外，又祝我越嚟越靚同身體健康。」得到未來奶奶愛錫，唔怪得笑到四萬咁口。
放大圖片 
李亞男噚日以一條鮮艷紅裙出席活動，佢大方透露有去男友祖藍屋企拜年。
放大圖片 
雖然外形同身高真係唔多襯，不過絕對冇阻礙王祖藍同李亞男嘅戀情。 資料圖片
李母讚祖藍乖仔
問李亞男有冇帶男友返自己屋企拜年？佢話屋企人喺溫哥華，今年未有機會，前排祖藍去多倫多做嘢，又冇機會；不過李亞男話男友之前已經見過父母，仲話：「媽咪讚佢乖仔。」至於有冇俾屋企人催婚？李亞男話冇，佢話完全冇壓力，好自在，亦冇諗過咁早結婚，佢話結婚係下半世嘅事，家仲後生唔心急喎，等多幾年利是同儲定錢先。嚟緊好快到情人節，李亞男話嗰日同祖藍都要返工，或者提前一日慶祝，問佢有冇買定禮物？佢好 sweet咁話：「唔買嘞，我諗住自己做，因為次次祖藍都係自己親手整。」 
王祖藍一直同媽咪感情要好，新年點可以唔帶女友返屋企畀媽咪見一面。 資料圖片
全站熱搜
留言列表
