羅樂林死得抵！因為24小時連死5次，兩日內仲連死6次，死到上盡世界報章，化身為「國際巨星」，甚至話申請入健力士世界紀錄，羅樂林都算是有史以來「死」咗至出名的人中，最估佢唔到的一個。

「死」至嚟出名，今年六十有三的羅樂林自言拍戲四十年，「死」過一百次以上，早就百無禁忌。

「人生冇乜所謂，生生死死估唔到，生死有命整定的。我相信輪迴，就當朱元璋死咗、平叔死咗、金華、孫全、無相子全部死咗，之後咪變成羅樂林囉！冇嘢喎！」

只是這次香港電視史上的創舉，讓他突然成為風頭人物，網上搜尋率甚至蓋過林峯。

卻原來羅樂林早在三十年前，就已經創下過電視史紀錄，是香港第一個在電視上飾演神鵰大俠楊過的男藝人，當年的風頭可能也勁過今日的林峯。

「當年電視台門口，日日都有女影迷等我收工o架！」

捱了四十年再出風頭，只是這個「最有價值死亡獎」絕對唔易攞，中獎率怕且最多係得幾十億分之一。

76年佳視《神鵰俠侶》飾楊過，早已是電視紀錄，小龍女為李通明。

一日連死五次有幾巴閉？威到連愛沙尼亞（左）同澳洲（中），甚至匈牙利（右）都有報紙講咁巴閉囉！

難過中獎

羅樂林因為這次連續死亡事件而蜚聲國際，偏僻到連愛沙尼亞，這種香港人對住地圖都未必搵到出來的國家都報道，但羅樂林最初知道時，其實並不太開心。

「其實係三個女發現先，我都唔明點解網友可以咁心水清，咁都記得。初時聽女講話網上啲人直頭整晒悼念網站，又上香、又燒衣，啲女睇到有唔開心，始終都係講緊自己老竇，我自己就冇乜特別感覺，仲以為有人特登開我玩笑。」

事件其實真的頗詭異，想一想要有不知多少次的巧合，才有可能造成這個連死六次再被網友發現的結果。

「真係要特登夾都夾唔到，巧合到有啲得人驚，你諗一日咁多節目、咁多電視劇，要計到好準咁喺同一日之內，剛剛好播出的都是我死的一集，仲要不時有特備節目之類，就算有人要專登安排都諗爆腦，你話幾高難度？」羅樂林說。

就假設每套劇二十五集，要安排到連續六套劇在同一日內播某一集，或然率已經是二億四千幾萬分之一，其他我已經唔識計，難過中六合彩，確然巧合得讓人害怕。

只是在戲行這麼多年，羅樂林早就習慣了。

「人生出來就係準備死亡，冇人唔會死，死咗咪來世再重生囉！最重要唔好累到屋企人。」

羅樂林笑着說。

六連「死」世界紀錄

《洪武三十二》朱元璋病死。

《女拳》莫平被打死。

《七號差館》孫全失救致死。

《布衣神相》無相子嘔血死。

《皆大歡喜》金華病死。

《烏金血劍》宗單跳入鑄劍爐燒死。

百無禁忌

羅樂林入行四十年，拍攝過的劇集早就多到他自己都記不清。

「曾經有人問我有冇拍過邊套劇、做過邊個角色？我真係唔記得，例如《射鵰》我可能拍過兩、三次，次次都做唔同角色，邊記得咁多？」

至於拍劇死過百次，則可能已經是另一個世界紀錄，只是羅樂林最記得，還是從前收的利是比現在還多。

「拍得呢啲就一定會派利是，我以前反而仲多，好多時都有十蚊、八蚊，依家就最多一蚊、五毫。其實行規係所有參與過有人死那幕戲的人，都有利是收，連幕後工作人員都有。例如靈堂上有件屍，唔係淨係扮死屍的人收利是，而是全場所有台前幕後工作人員都有得收，隨時三、幾十人。咁畀得少，我都明白。」

雖則話百無禁忌，但羅樂林也不違言自己也不是一個乖的長者。

羅樂林早年與妻子及三名女兒合照，大女及二女為前妻所生，細女（左）羅苡之曾與趙世曾兒子趙式浩拍拖。

「你唔好睇我六十幾歲，仲好似好精神好健康，其實我個人諱疾忌醫，一直都唔肯做身體檢查，聽過太多人本來冇乜事，一去做檢查就發現有乜有物，更何況就算精神奕奕健健康康，咪又係無啦啦就咁去咗，做人邊話得埋？」

羅樂林說他三、四十歲時乜都好，煙、酒、打麻雀樣樣齊，到現在就乜都戒晒，淨係飲酒戒唔到，但都戒到飲啤酒。

「我平日食得好清淡，不用工作的日子下午就食素，晚上親自下廚幾味，屋企三個人（羅樂林和太太陳寶儀及工人），淨係得我識煮飯。但飲酒都算多，有時飲到斷片，但我都識返屋企。」

最大娛樂，便是閒時與三個女兒約會，一齊「隊酒」狂歡。

玉樹林峯

羅樂林23歲入行，初中畢業後做過跟車送貨、旅行社導遊等。

「後生時就好想做畫家、又想做兵乓波運動員。」

點知陪朋友去邵氏考南國實驗劇團訓練班，神推鬼㧬就入行。

「我係參加第九期，應該是最後一屆，真正賞識我的是張徹導演。」

話說當年的羅樂林是跳舞出身，當年訓練班好全面，要練各種舞蹈，更會全班人一起出外表演。

「卲氏有套電影《小煞星》，當中有一場歌舞表演，我只係眾多舞蹈藝員其中一個，點知跳跳吓張徹導演就叫咗我出嚟，跟住簽約成為邵氏藝員。

「就連我個女都唔信我以前識跳舞！」七十年代初更做過一日TVB舞蹈藝員。

在《年輕人》中與陳美齡飾演一對戀人，也拍過甘國亮的《少年十五二十時》，繼而成為第一代神鵰大俠楊過，不過早在佳視的《射鵰英雄傳》中已經飾演過魯有腳。

一拍就拍了四十年，羅樂林自稱是打工仔的材料，也不喜歡轉工，由佳視到麗的再到無綫，都是迫不得已才轉公司。難以想像當年的他就如林峯一樣，電視台門口總有大批女粉絲等收工。

「當時個年代就樸實好多，通常都係等我出來打個招呼、簽個名，後來就影張相，係咁多。

「以前做藝人真係乜都靠自己，拍古裝片把劍都係自己攞，戲服連唔連戲都係自己mark埋，邊有依家後生仔咁多人服侍。」

羅樂林說拍電視的辛苦法，根本冇時間、精神、體力再去外面接戲。

「我話你聽，我做電視幾十年，根本由頭到尾都係咁辛苦，以前係，依家都係，這是香港特色，不論外國定大陸都唔會好似香港咁！」

羅樂林說現在少病痛，已經很感恩。

未退得休

羅樂林從來不會投資，未做過生意，炒股炒樓更加完全唔識，從來就係死牛一面頸只愛拍劇。

永不言休，準備做到冇精神、冇體力，記唔到劇本，想唔退都唔得之日，才退下火線。

「我做咗幾十年，到依家都冇資格話退休，邊有錢呀？一向收入同工作都不成正比啦！」

現在的他每天都有指定的生活安排，幾點去飲茶、幾點去買餸、幾點返屋企煮飯，全部有時間表，盡量不希望被打亂。

人生最大的收穫是和三個女兒的良好關係，與太太陳寶儀就「平淡」一點。

「同太太到了這個年紀，感情就一定有點轉淡喇！我信佛，太太就信基督教，屋企神位的玉佛是我從泰國帶回來的，放了三十幾年，要我掉咗佢我真係唔捨得，唔好話宗教唔宗教，見咗咁多年的物品總有感情嘛！」

40年歡笑一場

這位第一代神鵰大俠楊過，亦曾是佳視電視台當家小生，雖然年輕不再，對從前做主角的日子也沒有太多的緬懷。

「人生歡笑一場，嘻嘻哈哈過日子，總比愁眉苦臉好。」

羅樂林在訪問中笑着說。

「有時自己睇番啲舊相都會懷疑，呢個真係我自己咩？個樣咁chok。」

花名「囉囉鬈」，因為早年拍國語片時，以國語講「羅樂林」，發音不正就變咗「囉囉鬈」。

「戲行中人以前個個都叫我『囉囉鬈』，早十幾年就『囉囉鬈哥』，家陣就已經變成『囉囉鬈叔』喇！」

黃金歲月盡在電視台，時至今日仍然可以一身兼拍三套劇。

以電視台拍攝的辛苦程度，63歲仲可以日接夜、夜接日地捱世界，羅樂林可能仲勁過鐵甲人。

早幾年《Ironman》（鐵甲奇俠）上映時，羅樂林已經被指貌似羅拔唐尼，還被網友惡搞key頭相。

「我電腦盲，都係個女話畀我知，幾好笑呀！又真係幾似o架！」

講的不只是樣，還有那份「死」不言休的精神。