台灣闊少悔婚　朱慧敏速上 EO2 Eddie 壹週刊 1027期 @ 明星靚相大分享☆

六年前經歷「車震」教訓後，朱慧敏的感情生活氹氹轉，直至09年跟在台灣做IT生意的億萬男友Rick Chang拍拖，朱慧敏高調宣示自己有人要，去年更公開透露隨時嫁。以為今鋪上到岸，豈料異地戀又告吹，今年六月，異地情轉淡，朱慧敏遭有米男友悔婚，分手收場。
再次受創，但朱慧敏火速跟前度身家相差一大截、華星冰室老闆EO2的Eddie拍拖。有指Eddie等了兩年，才成功打動女方。男友夠晒耐性，難怪朱慧敏呆坐茶餐廳四粒鐘，等Eddie收鋪，一樣甘心命抵。

呆等四粒鐘
降呢同Eddie的朱慧敏，唔使開工就落男友位於箕箕灣的「華星冰室」打躉，由五點幾到晚上近九點，等足四個鐘陪男友收鋪，毫無怨言。之後拍拖到灣仔船街一間上樓意大利餐廳撐枱腳，食到十一點半，因發現記者，朱慧敏由餐廳後門鬆人，Eddie則行正門離開。
同台灣闊少拍拖玩高調，但對於新戀情，朱慧敏卻一反常態。Eddie亦配合女友，高度戒備。上週三（十月五日），Eddie駕車到上環接完朱慧敏，再去火炭單車鋪買零件，之後原本往大埔區駛去，發現被跟蹤，即極速掉頭撇記者。

吼住七年
朱慧敏與Eddie本來大纜扯唔埋，但有指七年前Eddie在電視城化妝間邂逅剛獲選港姐亞軍的朱慧敏，便膽粗粗上前主動攞電話，從此展開交往。「當時Eddie只係靠EO2接騷，搵朝唔得晚，人哋就係新鮮出爐港姐，所以佢夠膽問人攞電話，但就唔夠膽追人。」知情者說。對朱慧敏流晒口水，Eddie卻忍足七年，耐力驚人。「○九年Eddie同拍拖五年嘅圈外女友分手，但Queenie同Rick一齊，佢咪好似痴男咁繼續等囉！Eddie個樣好花弗，但查實好奄尖，佢好鍾意Queenie性格開朗，覺得呢個女仔好啱自己，半年前一知『女神』同台灣仔甩拖，Eddie就發力。其實Queenie都知Eddie一直好like佢！」

發奮搵錢
半年前，Eddie除了落力追求朱慧敏，同時亦發力搞生意銀，與經理人合資開冰室，霉星變老闆，只為向已屆廿九歲的朱慧敏相信有「將來」。「Eddie年幾前開始教跳舞，收入已經穩定好多，佢話自己三十三歲，想快啲搵錢買樓，於是攞咗幾十萬積蓄，同朋友夾份開茶餐廳，佢日日落鋪，睇實盤生意。」本週一（十日），記者踩落冰室搵Eddie，對同朱慧敏撻着一事，他死口唔認。「我哋仲係了解緊，未正式拍拖。我好驚你哋篇報導出街會嚇親Queenie，搞到佢唔敢見我就慘啦！」有關女友與台灣前度分手，他只不斷說：「佢嘅嘢你問番佢，我無嘢講！」至於朱慧敏，雖跟Eddie一樣否認拍拖，但回應時前言不對後言。「我哋唔係拍拖！（記：但見到去鋪頭陪佢喎！）我去幫襯咋嘛！（記：坐咗四粒鐘喎！）吓……我哋傾生意經之嘛（但你哋經常出雙入對！）其實係一大班人約會。（記：見親都係得你兩個。）......我怕人多！（前言不對後語）。」問她跟Eddie有無發展機會，她一樣答得含糊：「我有咁多男性朋友，邊可以個個都諗！」

阿倫教路
Eddie（彭懷安）早於99年以組合EO2成員身份出道，雖然好舞功，但近兩年卻無新作。幕前事業撈極唔起，EO2成員先後轉型開鋪做老闆。光頭Eddie今年初亦加入行列，與經理人合資開茶餐廳，上至招呼，下至洗碗都落手落腳做。有人緣，開鋪以來，得圈中好友支持撐場，亦得校長阿倫教路，親自指導炮製黑松露芝士多士，命名「校長多士」作為茶餐廳招牌菜。

震後多人愛
現年29歲的朱慧敏，04年港姐亞軍。05年與梁榮忠發生「車震」事件，一度令形象大跌，但努力洗底後，一雙媚眼加上身材好，令桃花越嚟越旺。

梁榮忠
05年與梁榮忠玩「車震」轟動一時，朱慧敏成為男方與鍾麗淇七年情破壞者，形象插水更被雪藏。事隔多年，朱慧敏一直未能洗脫「壞女人」形象。

戚其義
08年，有傳朱慧敏姣掂金牌監製戚其義，才可於大製作《珠光寶氣》演三姨太一角。其後戚監製開拍《飛女正傳》，朱慧敏亦即時「升呢」做第二女主角。

羅鎮岳
09年有傳朱慧敏對《畢打自己人》已婚監製羅鎮岳一樣唔放過，密密出招搏加戲份。

趙永洪
拍攝《畢打自己人》期間，朱慧敏被指與同劇的趙永洪撻着，甚至不介意在車廂當住男方換衫，豪放程度令人咋舌。

Rick Chang
去年中，有傳媒多次拍到朱慧敏飛台灣密會33歲闊少Rick Chang，同時亦踢爆男方攬嘴其他辣妹索女。戀情被揭發，朱慧敏在記者會上死撐與男友感情穩定。 ####

9:00pm
之後朱慧敏在冰室樓上的VIP房打躉四粒鐘，由天光等到天黑，就係為陪Eddie收鋪，然後一齊去灣仔撐枱腳。