胥力文“ 我想做明星” Me! 週刊 254期
香港觀眾比較傳統，看待女模，以靚為先，是故，長得既像張曼玉又似周迅的東北女模胥力文（Amber），來港發展，有着數。
原籍黑龍江，幾歲移居山東，隻身進駐上海繼而空降香港，夥拍黎明劉德華郭富城張學友，南征路程，順風順水；年僅26，模齡十年，老行尊了。
想搭一通超模直通車，模望國際，倒不如，投靠另一條路，「做明星，梗係想。」說話猶如口含棉花糖，廣東話幾流利。
三十而立，Amber距離自立仍有4年，既有知名度，有樓又有車，玩票娛圈，獨樂樂，不如眾樂樂，也許這正是她想玩過界的心態，不是嗎？
Profile
出生日期：1985年3月26日（白羊座）
出生地：黑龍江齊齊哈爾
身高：5呎11吋
體重：110磅
三圍：32-23-34
語言：普通話、廣東話、上海話及英語。
學歷：山東省煙台七中畢業
簡歷：12歲，往北京修讀模特兒課程。01年，簽約上海模特兒公司，未滿18歲已踏Chanel台板，曾獲中國模特之星大賽十佳模特兒及最上鏡獎，為Loewe、Chanel、Dior、Fendi等大牌行騷。04年，來港發展，因與黎明合作拍電訊廣告，漸為人認識。
主要作品：廣告，和記電訊、SmarTone、上海灘、Sony、Canon、P&G、Nokia。MV，張學友《講你知》、黎明《一言為定》。電影，《再說一次我愛你》及《父子》。
模特兒公司網頁：http://www.cal-carries.com
微博：http://weibo.com/amber
做人冇憂慮
父親為中學體育老師，母親教鋼琴，放諸香港，算是一個中產家庭，女兒考名校，勝算更高；然而，論體育細胞，Amber直言「我四肢不協調」，論音樂造詣「媽咪管教太嚴，我冇興趣。」難為了父母！「我黐媽咪，但爽直個性、身高、身形及樣貌似爹哋，媽咪靚好多。」識賣口乖，仲識為個家慳錢，「從來唔要零用錢，去北京讀書，住阿姨屋企，媽咪將一百蚊換晒兩蚊俾我作零用，一蚊都冇用，有人包食包住，使乜用錢？」證明Amber沒公主病。中國經濟起飛，一代新生獨生子女，既得父母寵愛，又可享受上一代所缺乏的物質享受，造就樂天個性，眼前Amber如是。「我做人，冇乜憂慮；「食唔到車仔麵、冇錢拍拖、搵唔到車位、朋友鬧分手，一有唔順，隨時大喊特喊，喊完冇事。「就算失戀，只會唔開心一日，第二日繼續蹦蹦跳；「我從來唔會將唔開心帶給大家。」喜惡形於色，做朋友幾好，做明星，幾難。「我都想做明星！但唔強求，紅就好…… 「不過，如果唔可以每星期跟朋友去唱K、著住拖鞋去食車仔麵、唔化妝去泰國旅行？唔紅好過！「反正我有工作就開心。」
Amber's tips
Q：喜歡到哪裡購物？ A：在香港或外地，愛逛Zara、H&M或Topshop，在上海，去七蒲路批發市場，慢慢挑。 Q：有何轉季護膚貼士？ A：天氣太乾，易患濕疹，千祈咪亂抓，苦忍三、四日自然好，醫生都唔使睇。
玩勻全球過山車
入行十年，現階段，工作賺錢供樓供養父母之外，旅行誠樂事，做人若此，快活呢！ 26歲女，心願當一個家庭「煮」婦，生2女1男，湊個「嬲」字。「慈姑椗做老二，唔怕被忽略，既有家姐湊，又有阿妹要佢照顧，訓練責任感；「我唔要生龍鳳胎，一次過湊兩個，辛苦死！」想法幾周到。簡單個性，簡單做人，如果說，30歲是女人關卡，要不繼續打拼，要不嫁人，你又點揀？「趁仲夠膽，玩勻全世界過山車！「玩過山車，一係大叫，一係笑到牙骹軟，叫完笑完，成個人舒服晒！
「喺新加坡，親眼見到一部手機從高空跌下，『啪啦』一聲粉碎，個心當堂窒一窒，仍然邊驚邊上車，我實在太愛玩。」愛玩個性，盡現家中。 07年，她以百五萬買入上海市近郊一幢樓房，月供幾千蚊，好過交租，「上海地圖搵唔到我屋企，太遠喇！」遠又何妨？安樂窩中，既有桌球枱，X-Box、麻將、啤牌等遊樂設施也一應俱全，「我住得遠，要利誘朋友多啲嚟探我。「平時出入揸車，好少出外飲酒，想飲酒，上我屋企玩啦！」好一副山東女豪邁姿態。內地房地產開到荼靡，賣樓仍有大利可圖，是不？「賣咗住邊？「我唔識理財，最穩陣將錢放銀行，他朝冇得做model，冇路可行，至會考慮做生意，否則，盞搞！」
後記
事緣卡地亞想搵女模影首飾…… 心目中人選，要不劉雯孫菲菲秦舒培蜚聲國際，要不本土雜誌常客，感覺較鄰家較親和，就像Amber。港女女模呢？拍寫真了吧！香港電影夕陽工業，計我話，模特兒行業才是近黃昏。三年前，Amber直指內地經理人公司良莠不齊，靠唔住；今日，卻說：「內地模特兒行業愈來愈有規範。」世界是向前邁進的。自稱時尚之都，連一個半個專業女模都沒有，走回頭路，似乎已成香港宿命；唐英年、梁振英，有辦法嗎？
Shop List
Cartier 中環太子大廈G09-15號鋪 8105 5008 DIANE von FURSTENBERG 金鐘太古廣場214號鋪 2918 9238 Escada 中環國際金融中心2066號鋪 2234 7117 Giuseppe Zanotti 中環國際金融中心2072號鋪 2805 0890 Hatwoman 中環德輔道中68號萬宜大廈商場209號鋪 2167 8337 ####
Amber Xu
Trinity Crash 18K黄 / 白 / 玫瑰金鑲鑽耳環 $94,000
Trinity Classic 18K黄 / 白 / 玫瑰金鑲鑽戒指 $235,000
Trinity Crash 18K黄 / 白 / 玫瑰金鑲鑽長頸鏈 $525,000
all Cartier
04年
跟黎明攬住拍廣告，最後，黎天王娶了另一位模特兒——樂基兒。
05年
拍上海灘廣告，算是打入本港市場的代表作。《蘋果日報》圖片
05年
客串劉德華《再說一次我愛你》電影。《蘋果日報》圖片
08年
來港為Marc by Marc Jacobs行騷。《蘋果日報》圖片
11年
閒時出埠，在泳池玩吓浮潛。
11年
經常為本地月刊拍攝封面。《蘋果日報》圖片
Amber Xu Marcello de Cartier黑色漆皮Hobo Bag $12,750 Love 18K白金鑲鑽長頸鏈 $155,000 both Cartier 藍色併黑色絲絨晚裝裙 $7,000 Escada 彩藍色綴水晶wedges $13,900 Giuseppe Zanotti
Amber Xu Marcello de Cartier紅色小牛皮Hobo Bag $12,750 Trinity 18K黄 / 白 / 玫瑰金鑲鑽手鏈 $92,000 Trinity 18K黄 / 白 / 玫瑰金鑲鑽戒指 $123,000 all Cartier 黑色彈性料長袖連身長裙 $11,200 Escada
Amber Xu Trinity 18K黄 / 白 / 玫瑰金鑲鑽戒指 $235,000 Trinity 18K黄 / 白 / 玫瑰金鑲鑽吊墜長頸鏈 $320,000 both Cartier 黑色綴水晶頭紗 $2,930 Stephen Jones from Hatwoman 紅色珠片露背長裙 $14,000 DIANE von FURSTENBERG
留言列表
