電訊型科
電視廣播早於2008年全面數碼化，反而醞釀得更耐嘅數碼電台廣播，到今年先至踏入試播階段。不過有心唔怕遲，最緊要多嘢聽，鄭大班搞嘅「香港數碼廣播（DBC）」7個台，已搶先於8月逐步開台，跟住到港台有5個台喺11月開始以數碼試播。嚟緊仲有新城同鳳凰優悅各3個台最快喺今個月內啟播，電台數碼廣播已經殺到埋身，你部收音機數碼咗未？
CD音質易轉台
電台數碼廣播原理與電視相同，都係放棄傳統用模擬訊號傳送嘅方式，改為用數碼訊號傳送，從而令聲音質素提升至CD級數，杜絕以往聽收音機勁多「沙沙」聲嘅問題；亦令選台更加容易，唔再分FM同AM，搵台仲唔使用90.3、99.7等頻道數字校，好似數碼電視咁以兩位數字去作台號，轉台時亦似足機頂盒，例如聽緊35港台第5台，一扭就扭到去01數碼大聲台，方便好多。
聲靚但會窒
筆者試聽後覺得聲音真係有CD質素，舊式收音機冇得比，多人同時講嘢時，更有少少環迴立體聲效果。不過筆者喺將軍澳工業邨做測試，現有12個台都收得唔算好好，雖然數碼化嘅好處係收到微弱訊號就有靚聲，但收得差時反而有窒窒吓嘅問題，呢個缺點反而係傳統廣播唔會有。
數碼廣播器材
同數碼電視要加配機頂盒一樣，舊式收音機聽唔到數碼廣播，需添置一種支援「DAB+（Digital Audio Broadcasting +）」制式嘅數碼收音機先聽到。除上面推介嘅Pure EVOKE Mio，市面仲有唔同新款，仲多數兼容埋傳統FM頻道，更有機頂盒同iPhone配件支援DAB+，提供唔同方法畀大家聽數碼台。
便攜 CORUS DTR-762
機身小巧，只有手掌咁大，仲內置埋充電池，叉滿電聽到18個鐘，帶住四圍去聽足成日都得。$588（b）
無線 CORUS DTR-763
體型唔只比762更細，仲係內置天線嘅MP3機款，出街用唔老套，充電池亦捱到8個鐘。$688（b）
i物 Lingo iMini
支援晒iPhone、iPad同iPod touch，插入機底後再開啟免費專用app，就可以聽晒數碼台、傳統AM/FM台同網上電台。$598（a）
機頂 Eight HDR-1
高清機頂盒有埋DAB+接收功能，一機兩用，屋企唔使擺多部數碼收音機。$1,180（c）
現 有12頻道
除港台外，政府另外發多3個數碼廣播牌照畀DBC、新城同鳳凰優悅，提供頻道如下，但後二者仲未公布啟播日期，大約會喺本月內至下年初。而上年商台申請緊牌照時突然撤回申請唔玩，所以大家唔會有數碼903聽。
香港數碼廣播（DBC）現有頻道 7
主打有名DJ撐場同涉及時事嘅大聲台、專講股市同波馬嘅大錢台，仲有專攻少數族裔嘅大同台，似網絡電台風格。（台號01-07）
香港電台 現有頻道 5
最出名已經係成日播大戲嘅AM港台第5台，勁老餅！此外仲有個台專播中央人民廣播電台嘅節目，擺明係官方喉舌！（台號31-35）
新城電台 現有頻道 0
將有3條頻道，包括財經、音樂同生活，但未確定會否將現有頻道數碼化。
鳳凰優悅 現有頻道 0
預計同樣有3條頻道，內容圍繞資訊、文化同粵港生活。
未覆蓋全港
目前數碼電台廣播仲未覆蓋晒全港，發射站最齊嘅DBC，都仍有部分港島同新界地方未收到。而港台更只覆蓋到港九同沙田，只得全港4成人口，仲有好多人冇得聽，同數碼電視覆蓋率爭好遠。
Shop list
（a）LRT（2395 3913）（b）King's Technology（2616 2488）（c）Eight（2412 7878） ####
數碼收音機 Pure EVOKE Mio 由英國時裝設計師Orla Kiely操刀design，布滿佢招牌嘅花葉圖案，機身更用胡桃木同皮革製造，不失為一件潮家品。$1,999（a）
訊號雖已數碼化，但同舊式收音機一樣，係經由大氣電波傳送，所以仍要拉長條天線去接收。
識自動搜台，唔使自己校；每次轉台只要扭一扭Tune掣（紅圈），就即刻跳去下一個台，不過要等2、3秒先有聲。
會用%表示訊號接收質素，但無論幾多%，聲音都會清，唔似得舊收音機收得差就沙沙聲，不過一到0%就會冇聲。
DBC 7個台亦提供網上即時播放，唔使買數碼收音機都聽到。（www.dbc.hk）
預計下年1月，DBC就會開晒7個發射站，覆蓋到圖中顏色圈中全港大部分地區，比港台齊得多。
留言列表
