陳奕迅表示在家中睇到容祖兒在《勁歌》中連奪七獎,睇到嘩嘩聲,更講明對「傳媒大獎」已經死咗條心。
探熱針
反 TVB革命 陳奕迅謝安琪自斷米路
2010年01月21日
四大唱片公司為樂壇起革命,同反一直壟斷的無綫,拉隊缺席上星期六晚(一月十六日)舉行的《勁歌》總選,更刻意在頒獎禮前將示威行動升級,下令旗下歌手打破禁忌,用廣東話接受其他電視台訪問,明落無綫面。
但無綫似乎未驚過,寧願捱轟被指賽果不公,都堅決一個豬肉獎都唔分俾四大唱片,更狂派獎谷容祖兒,破紀錄連頒七個獎,令陳奕迅無機會奪得「傳媒大獎」,環球做「樂霸」(樂壇之霸)想頭破滅。
不過,革命尚未成功,環球歌手已經四面楚歌。由於歌手絕跡亮相無綫,少了一個平台,宣傳價值迅速大減,因而嚇窒廣告商及商場活動搞手,除非一早簽落,否則通通唔再搵「四大」旗下歌手做嘢,當中以陳奕迅同謝安琪最受影響,變相自斷米路。
派獎谷祖兒
今年四大唱片公司(環球、華納、 EMI及 SONY)聯手對抗無綫,齊齊缺席上週六的《十大勁歌金曲頒獎典禮》,結果令英皇成為大贏家,單單容祖兒已獨攬七獎,當中包括「亞太區最受歡迎女歌星」及「金曲金獎」兩大獎。
據了解,無綫最初無打算出盡力派獎狂谷祖兒,但為了反擊四大唱片公司阿頭環球,幫祖兒從陳奕迅手中搶回「傳媒大獎」是最直截了當的策略。「發生版稅事件之後,環球已經預咗同無綫擘面,於是同三個電台講數,話嚟緊會全力支持電台,希望三個電台幫拖,等陳奕迅可以唔使靠無綫都攞到『傳媒大獎』,咁樣就可以證明無咗無綫都一樣掂,但係無綫又點會咁易俾佢得逞,於是決定狂派獎俾祖兒,令佢反超前陳奕迅三個獎,陳奕迅要追都難。」知情人士說。
頒獎禮後第二日,陳奕迅出席港台活動時講明對「傳媒大獎」死心,「好難追,都係無希望,死咗條心罷喇!我睇電視嗰陣都忍唔住嘩嘩聲,心諗點追呀!」陳奕迅說。


謝安琪後勁不繼,人氣大跌,加上發生今次事件,令她減少曝光率,唔怪得之近期降格頻頻做校園 show同接私人宴會救亡。
 
容祖兒破紀錄在無綫奪七獎,成為史上攞最多獎歌手。
 
成為當晚大贏家,容祖兒喊到收唔到聲,更不避嫌與緋聞「女友」何韻詩攬到實一實。


陳奕迅伴住港台助理廣播處長張文新,聽他講考慮唔將《勁歌》賽果計在傳媒大獎之內。
 
當無綫仍未宣布封殺「四大」歌手前,環球率先禁止無綫娛樂新聞採訪謝安琪,自此四大公司再無出現過無綫。
 
有傳聞指在 11月中,環球揸 fit人黃劍濤與無綫傾獎時,無綫表現冷淡,覺得陳奕迅同謝安琪奪「最受歡迎男女歌星」機會微,加快促使今次反枱。

臨時轉獎
眼白白見住原本就到手的「傳媒大獎」被祖兒同無綫搶走,環球話事人黃劍濤即晚出招,叫齊三個電台齊齊推翻勁歌賽果,認為四大唱片公司無出席,無理由將無綫所頒的獎項計算在四台聯頒內。但據知當中只有黃劍濤的老婆,商台助理總經理甘菁菁支持,新城為免得失無綫及英皇,表明唔贊成改變賽制,而港台就仍未決定企在任何一方,所以至今仍未落實會否取消「傳媒大獎」,又或者不將無綫賽果計在內。
其實原本無綫為了安撫民心,一度落實將「亞太區最受歡迎男歌星」頒俾無綫契仔李克勤,但在頒獎禮舉行當日,無綫揸 fit人六嬸方逸華,認為四大唱片今次玩得太寸,刻意在頒獎禮前要旗下歌手用廣東話接受其他電視台訪問,所以就算李克勤對外幫無綫講盡好話,都無得特赦,一於趕盡殺絕,臨時將個獎頒俾林峯,結果引來噓聲。
無綫同四大唱片互片,雖然未知鹿死誰手,但一班歌手就率先犧牲,被迫自斷米路。自從去年十二月發生四大唱片組成的 HKRIA與無綫因版稅問題反目,導致無綫封殺四大唱片歌手,而環球又阻止無綫娛樂新聞台採訪旗下歌手謝安琪,令四大唱片歌手缺少了無綫出鏡平台,直接影響他們宣傳價值。


四大唱片缺席,英皇成為大贏家,總共奪得十九個獎。
 
六嬸方逸華唔肯就範,堅決唔俾獎「四大」歌手。
 
張敬軒上星期四與牆紙大王(陳鼎禮)上契,晚宴上,成為首位以廣東話接受有線訪問歌手,事後他在 blog上深表歉意,表示對唔住陳志雲同樂易玲。


宣傳價值急跌
「四大唱片公司嘅歌手好似陳奕迅、謝安琪、張敬軒、薛凱琪同陳柏宇咁,真係即刻少咗啲廣告客俾錢搵佢哋,因為好多品牌活動搵明星做嘢,都係想將件事曝光,多啲人睇到,但係佢哋而家無得喺無綫出鏡,淨係得有線同平面出現,效果梗係唔夠好,仲有之前有好多客寧願俾錢買《東張西望》同《娛樂頭條》時段,都要單活動安排喺無綫播出,而家俾錢都唔會播嗰班歌星,咁仲有邊個客會俾錢請佢哋做嘢呀!」一名公關公司人員說。
當中以謝安琪最受影響,她身為屈臣氏及豐澤兩個品牌代言人,由於兩個牌子屬同一間公司,所以廣告商對此事都大為緊張,抱怨宣傳效果受到影響,無法達到預期效果。
而翻查資料,發現自從事件發生後,陳奕迅、謝安琪、張敬軒、薛凱琪同陳柏宇都再沒有接到有錢收的宣傳活動,在革命尚未成功之前,「四大」班歌手無得攞獎,還要在金錢上有損失,難怪謝安琪連私人婚宴表演嘉賓都要接。


在攞獎翌日古巨基在美麗華商場開設的潮服店正式開張,更請來周慧敏及陳志雲等人到場。
 
入行踏入二十年的古巨基以大熱姿態奪得「最受歡迎男歌星」。
 
林峯爆冷攞獎,引來全場噓聲,而且更被指想谷眼淚但谷極唔出。


林峯以外,無綫親生女徐子珊亦奪得新人金獎,在慶功宴上,徐子珊行到樂易玲身邊連番多謝。
 
有消息指因為方逸華鍾意楊千嬅形象好,加上她即將接拍邵氏新戲,所以將「最受歡迎女歌星」頒給她。
 
原本「亞太區最受歡迎男歌星」想頒給無綫契仔李克勤,可惜臨門改獎頒給林峯。

有過節
向來有嗰句講嗰句的 Eason,多年來對無綫的鐵腕政策意見多多,更曾因要求多多失言失行得罪無綫。如今他所屬的「四大」跟無綫撐到行, Eason更加可以唔使俾面。
反轉優秀選


○七年十二月出席《勁歌》第三回優秀選拉票, Eason唱畢拉票歌《 Crying in the party》後,不滿意自己表現,與工作人員指手畫腳要求重唱,未幾 Eason面露不悅之色跳落台與唱片公司人員傾談,黑晒臉走出錄影廠十分鐘,要其他歌手呆等,事後監製潘裕佳有微言:「 Eason係對節目有阻礙,但其實好小事,大家都想做好啲。」
踢爆人到獎到
○六年十月為趕往電視城出席《勁歌優秀選》, Eason被迫將同晚舉行的個人音樂會提前完結,音樂會尾聲他跟觀眾說:「我唱多一首歌就要走喇!冇辦法啦!因為我有機會攞獎,唔去公司就執笠,大家唔明喇!一定要入去先有,唔入就冇……」公開爆無綫人到先有獎。
不信多勞多得
○五年十月曾發表偉論,指不相信在無綫攞獎是多勞多得,但當說到劉華為無綫做很多工作所以得了很多獎,他直言:「好似又係喎﹗但我之前講過,做得多無意思,最重要係音樂質素好。」
公然挑戰 


○四年四月為電影《大佬愛美麗》宣傳,與無綫有歌星約的他公然以粵語接受有線娛樂台訪問,其間有工作人員提醒他這樣做會得罪無綫,但他沒有理會,還說:「合約就快到期,就算俾人封殺都不過係兩個月啫!」









 

arrow
arrow
    全站熱搜

    stacylife 發表在 痞客邦 留言(0) 人氣()