賭王何鴻燊與三太陳婉珍的三子女，適值荳蔻年華，戀情自然特別惹人關注。近日一對龍鳳胎超蓮及猷啟，就先後被本刊影到與拖友拍拖的甜蜜照。
反之，一度是三房風頭躉的大女超雲，最近就不談戀事，專心打理由父母揼本一百萬給她打骰、在蘭桂坊開設的二手衫店「Chew」。「唔係冇人追，但我又要讀書又要兼顧舖頭生意，暫時唔想拍拖住。」
年僅廿歲的超雲，上周接受本刊訪問時大談擇偶條件，但就講明三十歲後才諗結婚，現時只會專注讀書及打理店舖生意。「爹哋一聽到我開舖就話『好吖！好吖！』，又教我將貨品的價錢mark低啲，希望早啲打響個名。」
一向深得賭王寵愛的超雲，於父親跌倒入院當天，曾擔心至泣不成聲，直至目睹父親日漸康復，才回復笑容。她於訪問中，更首度披露賭王將會出院回家過農曆新年。
「應該會農曆年前出院，爹哋應承過，在二月尾我廿一歲生日那天，會幫我搞個party，我希望到時佢來陪我一齊切蛋糕……不過都要睇醫生最後決定。」
知父出事哭成淚人
回想當天知道父親跌倒入院，她甫趕到醫院即時哭成淚人。「去到醫院一見到佢就喊，但我有心靈感應，覺得佢係得的。」
直至得知父親手術成功，家人才鬆一口氣。「手術後第一晚佢已經醒醒哋，有啲郁動，但跟住又唔舒服番……」
自此，她直言所有心願都放在父親身上，「佢88歲生日那天，我去醫院陪佢切蛋糕，送咗張卡畀佢，又買咗佢喺醫院可以用到的冷衫和棉被。」
大爆賭王扭計趣事
近日賭王康復進度理想，她就大爆父親日日扭計出院的趣事，「佢好好笑，同我講：『你又話錫我？錫我就同我調位啦！』
「有時我哋推住輪椅陪佢散步，佢又會話：『喇，我哋行一個圈，再行一個圈，就到（房）門口喇；再行多個圈，就落lift喇！
「有日我探完佢之後講bye bye，佢又會扭計：『你竟然同我講bye bye，今日唔對板，你唔錫我喇。』跟住又話：『你走都得，叫架車返轉頭來車我啦！』」
父親的扭計招，叫她啼笑皆非，但另一方面，又令她更加欣賞老父永不放棄的精神。「換轉是其他八十幾歲的老人家撞親個頭，點都會意志消沉，但佢完全無。佢仲好努力，每日都做物理治療。」
她透露，賭王已由最初只能食流質食物，慢慢進展到現在可食爛飯、木瓜、蛋糕等容易咀嚼的食物。
「其實佢學行好辛苦，但我哋睇住佢一步步，由靠機器幫手，到慢慢自己用步行架行，到如今靠人扶，或者扶住一啲嘢就可以行到，佢真係好樂觀好堅強，佢係一個強人！」
胞弟做gym識女仔
講父親，她一臉認真。但提到弟妹的戀情，她就嘻皮笑臉無厘正經。訪問當天，剛巧有雜誌刊登了其胞弟猷啟與初戀女友於街頭拍拖的甜蜜照，超雲甫見到即大叫：「嘩，馬蹄露（指胞弟女友Mina）！哈哈！」
她爆胞弟與女友是於香港做gym時認識，又笑稱可接受姐弟戀：「如果個男仔思想成熟，都接受到，但最多只可細我三年。」假若男大女少，則男方不能大她多過五年。
坐唔定的她，訪問途中突然興起想食雪糕，要店員落街買給她。之後邊食雪糕，邊叫記者代她澄清何敬豐（何厚鏵姪兒）非其男友，但就不忘加句：「我唔係嫌棄佢，不過大家唔係幾啱key。朋友囉！」
香港拍拖壓力大
她直認有人追，但就暫時無意拍拖，「喺香港追我嗰啲，我又唔想分隔兩地，而且我依家又開咗間舖又要讀書，怕兼顧唔到。除非我真係撞到一個鍾意到要開第三瓣的，否則暫時都開住兩瓣先。」
作為賭王女兒，她坦言在香港拍拖壓力大，「我拍拖一定低調進行，盡量唔畀記者知。我諗會盡量揀在英國拍（拖），或者揀鬼仔，因為香港男仔都幾驚人哋出名。
「之前就試過有男仔同我講：『你又上報紙了，我唔同你出街喇，我怕畀人影呀。』就算有時想約朋友出街，佢哋都話：『幾時冇狗仔隊咪出來囉。』令我連朋友都少咗。」
願望當珠寶設計師
由去年開始，她已嘗試為自己設計珠寶。「試過媽咪買啲石返來，我自己畫咗個design，搵人鑲番出來。依家仲慢慢practice緊，之後可能會讀埋珠寶鑑證。」
早於中學時代，超雲已夢想當設計師，反而對於接手父親的賭業生意，她直言興趣不大。「冇（興趣），真係冇。我的興趣只喺藝術方面，爹哋都會尊重。」
下個月尾，是超雲的廿一歲生日。她只願父親能遵守承諾，出席她的生日party。「爹哋話我生日那天，他會出來同我開party。我希望佢可以去到，未必要坐足全場，若可以講一兩句說話就最好。」
衣櫃百萬名衣大公開
超雲籌備半年多的處女二手衫店，取名Chew，既取其「超」的諧音，又有咀嚼其品味之意。雖然店舖面積只得五百多呎，但就放滿百多件超雲和母親三太的名牌衫裙、鞋、袋和飾物。
店內最貴的，是三太去年着過的Valentino晚裝裙，原價十多萬，現賣六萬五千；而最平的則有數十元的冷帽或幾百蚊有找的T恤。
廿歲女初試啼聲搞生意，超雲說最大原因是為環保：「人愈來愈大，又經常出席好多公開場合，買落好多衫同手袋，與其擺喺度封塵，不如開間二手衫店賣咗佢，唔使塞住個衣櫃咪好囉。」
賭王傳授秘訣
為了吸引客人，Chew內大部分衣飾是原價的一折至六折不等。如此大平賣，她說是賭王父親教路。「爹哋教我mark低啲個價，希望出咗名先，寧願之後再慢慢調整價錢。」
現時店內有三名員工，全是超雲自己的朋友班底。如何與員工相處，父親亦有過她兩招，「爹哋話同人做嘢一定要有禮貌，又叫我用人莫疑，要信任和錫啲員工，佢哋先會真心為你做嘢。」
母親陳婉珍對她這次小試牛刀亦百分百支持。「我就快廿一歲，媽咪希望我開始明白生意係乜，呢個係我第一步去學習點做生意。」
留言列表
