帶囡囡檢查
林文龍與正在坐月的老婆郭可盈、陪月萍姐帶囡囡津津到中環檢查。
娛樂頂點
迫林文龍開工賺奶粉錢　郭可盈：佢係一家之主
2010年01月29日
林文龍和郭可盈的 BB女津津（乳名）出世兩周，兩人都顯得非常緊張，除要到醫務所檢查外，一家三口都會留在家中，足不出戶。
有女萬事足嘅郭可盈表示有意暫停拍劇，方便照顧津津。因此以後一家三口的生活負擔，便落在老公林文龍身上。停工近兩個月的林文龍，近日已開始接劇本，並預計於三月復工。
雖然林文龍好唔捨得離開津津，但老婆一句：「你係一家之主。」所以就算幾唔願意，都要外出努力銀。
本月 16日，林文龍和郭可盈透過助手向外界宣布生女後，兩人每日都全力照顧「小龍女」，郭可盈表示暫時不會拍劇，希望盡快追多個。
停工唔見二百萬
其實郭可盈自去年五月懷有身孕後，已即時停工待產，而老公林文龍為了迎接 BB出世，去年十二月亦停下所有工作。知情人士說：「文龍都唔知幾緊張，為咗有個健康環境俾可盈安胎，月租 6萬元嘅清水灣豪宅松濤苑，買咗十幾萬補品，生女淨係醫院同醫生費都使咗廿萬。佢為咗多啲陪可盈，除咗登台飛兩、三日之外，所有劇集都唔接，已經推咗兩、三部內地劇。喺內地文龍收兩萬元一集，每套劇大概 30集，所以佢已經唔見咗成二百萬。」
囡囡出世兩個星期，林氏夫婦每日都為湊女而忙到氹氹轉，林文龍每日都會留在家中照顧津津，兩公婆更不時搶住抱 B。知情人士說：「囡囡返咗屋企之後，佢哋連朋友都冇時間見，文龍同可盈仲成日爭抱女，好搞笑。其實文龍打算陪佢兩母女耐啲，不過可盈覺得屋企雖然唔係冇錢，但男人始終要返工，所以叫文龍快啲睇劇本，出去搵奶粉錢。所以依家文龍爭取時間陪老婆同個女。」


21/1 3:40pm現身中環
上周四（ 21日），林文龍驅車往中環，下車時他拿着 BB籃，神情緊張，生怕撞親寶貝女。
 
林文龍話津津只是囡囡的乳名，至於真正名字，還未決定，「我同可盈鍾意卓、天、遙、童呢幾個字，我哋會配幾個最好嘅組合，俾親戚朋友公投。」

上周四（ 21日）下午，出院只有兩日的郭可盈，在老公林文龍和陪月萍姐陪伴下，帶津津到中環診所檢查。右手拿着 BB籃，左手拖住太太的林文龍，極速橫過馬路上了萬邦行某間診所，三人逗留約四十五分鐘後落樓。原以為他們會立即離開，但原來林文龍只是先將 BB放回保母車，由陪月照顧，然後再陪太太到德成行的倪淑慧婦產科醫生醫務所檢查。約半小時後二人才離開，繼續十指緊扣步回保母車離開。


產後 110磅
向來對時裝很有研究的郭可盈雖已為人母，但依然注重打扮，她手挽的是 09年 BALENCIAGA的特別版手袋，約$16,000，算是新一代潮媽。
 
陪老婆檢查
很少老公肯陪太太到診所做檢查，當日林文龍先陪 BB，之後再陪媽咪，總算沒厚此薄彼。


徐濠縈向來講究，所以當年她找在行內出名的倪淑慧醫生接生。她是香港大學內外全科醫學士，之後分別在英國皇家婦產科等等取得產科資格。《蘋果日報》圖片

郭：文龍睇緊劇本
記者事後致電郭可盈，她起初非常愕然，但之後開心地承認帶囡囡檢查：「津津同我都要檢查，所以嗰日一定要出去。街上面空氣唔好又多細菌，所以睇完即刻放番佢上車先。」再問到當媽媽的感覺，郭可盈說：「我生活改變好大，依家我七點就起身照顧佢，到夜晚十二點，就算好唔捨得都要將佢交俾陪月湊，因為我要餵人奶，要休息夠、食得好，津津先健康。以前我一日都飲唔到一杯水，依家每日至少飲十杯水同勁飲湯。津津真係好得意，又乖又合作，乜都抵番。」
對於文龍因不捨得津津，而將開工期押後，可盈說：「唔得，佢依家係一家之主，要出去搵奶粉錢。不過，佢依家都睇緊劇本，至於幾時開工就要睇劇組安排。」
最後，問可盈廣告商有否向她們一家三口招手，她說：「冇呀！不過有啲纖體公司問過，但一切都係好初步。其實我都唔會完全唔做嘢，劇本好，時間啱我都會考慮。」


未懷孕前 100磅
郭可盈向來偏瘦，長期維持在一百磅水平，懷孕後體重增至 125磅，沒有水腫現象。現時可盈 110磅，實屬健康水平。《蘋果日報》圖片
 
去年 10月，懷有 5個月身孕的郭可盈，低胸短裙造出上圍前所未有的脹爆效果，由懷孕前的 A cup谷至 C cup。

公開坐月餐單
為了令郭可盈在產後得到適當調補，林文龍早就四出打探，終於搵到現在的陪月萍姐，文龍說：「唔係價錢問題，好嘅陪月啲期好爆，佢嘅期接到年尾，真係慢啲都請唔到！」而郭可盈因為開刀又餵人奶，所以身體一定要進補，以下是可盈的坐月進補餐單。除了谷奶湯水，可盈還大量食雞及冬蟲草蜅身。
坐月餐單
早：雞湯雞肉米粉或通心粉，大量蔬菜。

午+晚：
海參杞子炒黃鱔、田雞焗飯（谷奶）
梅子蒸排骨
蒸魚、木耳蒸雞
煮雞酒
大量蔬菜

湯水
午：木瓜魚湯（谷奶）
晚：花生眉豆煲豬腳（谷奶）
消夜：冬蟲夏草花膠燉烏雞 


注意事項
1.開刀產婦不能在食物中加薑，否則傷口會生出肉芽。
2.不宜吃牛、蝦蟹等海鮮。
3.以黑豆紅棗炒米茶代水，每日飲十杯或以上。
4.用開水洗手。
5.十二朝前不可洗頭。
6.滿月後可食燕窩等補身。
撰文：娛樂組
攝影：邢華






 

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄