風險與回報，從來難以取捨。人多眼角甚高，目標回報雙位數，可以選擇的資產界別，買少見少，只有股票、新興市場債、私募基金幾瓣。長線回報夠勁，又嫌短線波幅難捱。問道於人，西裝骨骨嘅銀行專員，會話你知：買股債混合基金啦，風險低好多。「係喎係喎！」之後，會發現波動性是減了一截，可是回報亦然，比齋買股打了折扣。目標未達，反而back to square one.

基金經理都是人，自然也會遇上同樣問題，不同之處，是會度條橋破咗佢。Ray Dalio就做到。他是何許人？請看google余大千的專欄，不再細表。雖然他操盤能力高強，但開設家族傳承基金時，也是陷於困難。自己並非不死身，始終有日要停手，假手於人甚難，子孫又可能好似股神啲仔，情願耕田玩音樂，都唔入行；又或者肯學，但最後一鑊泡，所以遺產基金，都是要以無人駕駛的方式為上，以免富不過三代。回報最好跟到股市，但全部買股風險太高，如大蕭條便齊齊乞米；混入穩陣資產，增長不足，長線又死。

胡亂博二三線股，可能買中近日停牌的博士蛙，隨時血本無歸。

借錢買低風險產品

左度右度，度到好橋：「奪命金」有教，「槓桿槓桿再槓桿！」無咁誇張，但Dalio先跳出框框，破除保守倉位絕不可槓桿的迷思，再砌組合。當借錢買低風險、低回報資產，如國債、TIPS，這些倉位的回報，可以上升到媲美股票。由於群星拱照，大家都有相若回報，股票自然不用買太多。股票佔比下降，如果場地不利股票，也無咁傷。單以逐項資產計，每件的風險當然同時提升，但因為它們相關性不一，撈埋一碟後，走向並非一致，整體風險其實下降，可以少成一半。

Dalio用此構想，狂back-test到一九二五年，看來逢關過關，最終舉家入場實行。第一次真正考驗，是金融海嘯。由○七年高位到二○一○年四月，賺到18.6%，跑贏齋股四成，無人駕駛，算過到骨。

或曰：「我得十萬廿萬博發達，無億億聲遺產，唔好走嚟煩我啦！」齋炒人士，也可從中得到啟發。很多人認為，槓桿危險，又想有幾成回報，便惟有刻意求冷，找細股來大注買。雖然實錢入貨，不會被斬，但細股自身風險高，說白了，每隻利郎（1234）背後，都有一隻博士蛙（1698）。事前難辨，一出事便笠實，全軍盡墨。就算分散買，都有機會當大市轉差，而好難走甩。

無心水可買細期

諗深一層，其實炒細股，如果沒有甚麼獨到的研究，都是隨水飄流，偶爾與大市脫軌，時間有限。那樣倒不如槓桿買指數，追及細股回報。當然不是叫你五萬銀本，便整張大期，但是1.5至2倍，例如有十萬本做一張小期，可以考慮。如果急跌一千點，倉位輸一成；買細股兩吓已不見了。好處除了減少個股意外，還可以騰出不少時間，全副心神觀察場地變化。橫豎當地質轉壞，買個股都難以獨善其身，倒不如用流通性最高的工具操作，起碼出入自如。