王馨平蝴蝶手震興票房春嬌與志明的故事 @ 明星靚相大分享☆

王馨平蝴蝶手震興票房

【春嬌與志明的故事】因為導演彭浩翔個人喜好，王馨平（Linda）在《春嬌與志明》中，不問報酬客串僅一分鐘，竟然令她人氣急升。導演除了將Linda與鄭嘉穎的陳年緋聞搬上銀幕，借楊千嬅把口講「你同鄭嘉穎分手我喊咗好多晚」外；連MV都不放過，逼余文樂反串學蝴蝶手翻拍《別問我是誰》，本來純屬滿足一己私欲，結果票房大收，Linda覺得一切就似戲內抵死對白一樣「粉紅色乳頭，可遇不可求」。撰文：楊潔雯

王馨平的《別問我是誰》最近熱爆卡拉OK，連帶她人氣急升，Linda好開心《春嬌與志明》受歡迎，余文樂反串版《別問我是誰》又得到大家愛戴：「前面嗰五個字我唔可以講，總之我覺得成件事，可遇不可求。」Linda的蝴蝶手為《春嬌》震出好票房，到前日為止，上映一星期，收一千四百三十萬，認真好成績。

對彭導有信心
彭浩翔視Linda為女神，去年Linda開始玩微博，關注了彭浩翔，小粉絲如獲至寶，頻頻私訊接觸偶像，Linda笑說：「佢同我講我係佢當年偶像，仲話搵女朋友係以我為標準，我仲笑佢話咁你搵女朋友都幾困難！」 Linda一口答應客串做「王馨平」，全因彭浩翔，她說：「其實我好多年前已留意彭浩翔呢個人，之前佢拍《買兇拍人》，我覺得驚為天人，之後《破事兒》部部都有睇，佢問我可唔可以客串佢部戲，當時我一口應承，但完全唔知要做乜，只係欣賞佢，對佢有信心。」

同老公睇嘉穎
Linda陳年舊情在大銀幕被翻炒，她已為人妻，會不會介意？她說：「我覺得冇所謂，家又冇話詆毀邊個，我睇到反而會心一笑。」Linda雖不介意，但亦顧及老公感受：「我先生好大方成熟，呢啲嘢佢冇所謂，家都唔怕講，鄭嘉穎咁紅，我哋好戥佢開心，佢之前嘅《怒火街頭》同《步步驚心》，我同我先生睇完都覺得好睇。」 Linda和鄭嘉穎在娛樂圈的puppy love，相當珍貴，雖然不可以開花結果，但再見亦是朋友，Linda坦承跟鄭嘉穎有聯絡，亦不怕老公呷醋，她說：「我先生同佢嘅前度都有聯絡，呢啲唔係咁大不了，過咗去嘅事，大家做到朋友，不妨做朋友，呢啲係人生成長一個階段，我會好好珍惜呢段友情。」

「嘉穎好有自信」
當年鄭嘉穎被放逐台灣，事業陷入低潮，如今吐氣揚眉，Linda當然戥老友高興，她說：「好開心佢咁紅，我覺得佢係進步咗，佢都有問過我，我覺得呢行好多時要有一啲肯定，就會越嚟越有自信心，我覺得佢家好有自信。」余文樂反串《別問我是誰》MV，成為《春嬌與志明》一大亮點。不過，當正版見到老翻的時候，反應是「震」，Linda說：「當時我一路睇，一路震，一路尖叫，佢太靚喇！我知導演磨佢好耐，NG好多次，佢都好辛苦，真係好多謝佢咁認真反串，佢絕對值100分。」

王馨平示範正宗的蝴蝶手，她笑言第一次睇余文樂的老翻蝴蝶手，感覺十分震撼。攝影：葉君海