首爾直擊LG Optimus Vu食正大芒熱

嚟到首爾,當然要去明洞走番轉,小記發現一眾又高又瘦嘅韓國美女,個個都拎住部4、5吋大嘅手機猛咁篤!原來韓國同香港一樣,近排興起大芒熱,屏幕起碼以4.3吋起跳。今次小記就親到首爾,為大家直擊LG新出的5吋新機Optimus Vu,玩超大尺寸屏幕,更反傳統用4:3比例,望落視野相當廣闊!隨機仲送近期熱爆的Stylus手寫筆,配合專用App就可以畫畫兼Jot Note,創意爆燈!

5吋IPS 4比3視野

老實講,提起5吋以上大嘅手機,大部分人都會諗起另一韓國出品嘅GALAXY Note,LG新推出的5吋機Optimus Vu難免被相提並論。其實LG並非從俗出部5吋機以迎合市場,佢好有誠意地採用4:3屏幕,與大路的16:9屏幕相比,明顯較短及較闊,接近正方形,睇片、睇網頁空間感十足!而其IPS屏幕,色彩準確又自然,解像度更高達1,024×768,睇網頁時細字唔使刻意放大都已經清清楚楚,感覺幾舒服!雖然Optimus Vu機身較闊,不過僅厚8.5mm以及重168g,手掌唔算好大的小記拎上手試玩,一般操作都冇問題,若然想打字覆WhatsApp的話,就建議用番雙手拎穩陣啲!

閱讀程式 效果佳

驟眼睇新機都幾似一本兒童揭頁硬皮書,原來LG都認為新機同睇書特別夾,所以預載《LG Reader》程式,不但備有大量電子書,就連雜誌、圖冊都可供訂閱,內容非常齊全;即場試睇,文字、圖片的留白位置唔多,能夠充分利用屏幕的闊度,效果理想!

加支Stylus 變身Notepad

另外,新機仲送一支名為Rubberdium Pen的膠頭手寫筆,尺寸同HB鉛筆差唔多,手感唔錯之餘,配合內置的《Notebook》App,就可以用來記事和畫畫,更可以插入圖片、聲音、影片等檔案及資料,十足一本多媒體記事簿!而機頂更備有一個名為「QuickClip」的按鍵,一按就可以在任何畫面上隨時記事,相當方便!值得一讚的是,新機雖採用內置電池,但容量高達2,080mAh,夠晒長氣;但要彈一彈,機身竟不設筆槽,要用家另行收藏手寫筆,稍為不便。

花絮:玩轉LG總部

今次來到首爾,有幸參觀LG不同部門的總壇,包括位於平澤市(Pyeongtaek)的Digital Park以及位於龜尾市(Gumi)的LG Display總部,睇盡歷代新舊產品之餘,仲可觀摩屏幕技術,絕對是大開眼界!

SPEC

系統:Android 2.3

處理器:1.5GHz Dual Core

屏幕:5吋 IPS(1,024×768)

亮度:650nit

記憶體:32GB eMMC

體積:139.6×90.4×8.5mm

重量:168g

同場加映:Optimus LTE極速體驗

香港第一部4G手機2月頭才推出,而第二部緊接推出的相信就是LG的新機Optimus LTE。其實此機早於上年年尾於世界各地陸續上市,仲全球大賣100萬部!新機除支援LTE制式外,更備有一個4.5吋True HD IPS屏幕,其解像度為1,280×720;而且屏幕的像素密度更高達329ppi,睇文字、相片都極為細緻,對比度十足的同時,亦未有出現偏色的問題,效果非常好!佢屏幕唔止夠靚,仲比一般的OLED屏幕慳電,據廠商透過專業儀器測試,OLED在黑色待機畫面比較慳電,但顯示白色畫面下,耗電量就急升;相反Optimus LTE採用AH-IPS屏幕,顯示任何畫面的耗電量都相若,平均來計仲更加慳電,對於較「食電」的4G Smartphone梗係更有利啦!

實地測試:LG U+ 4G網絡夠快又穩定

4G技術喺香港剛剛起步,不過在韓國就愈來愈成熟。今次喺首爾就實地試用其中一個LTE網絡LG U+,發覺整體覆蓋非常好,不但室外訊號強,就連室內亦收到;而其下載速度仲可以一直維持超過30Mbps,真正體驗4G的爽快感覺!加上網絡商LG U+亦為當地LTE用戶提供升級資訊服務,如高清電視串流服務《U+ HDTV》,可以隨時利用網絡串流睇KBS等電視節目;試用後覺得串流速度超快又唔使等,畫質隨時清晰過你播片,效果出乎意料地好!值得一提的是,雖然LG U+去年才提供LTE服務,卻剛剛成為全球第一個網絡商做到100%全國網絡覆蓋率,難怪整體穩定性咁高,香港網絡商都要急起直追先得喇!

Vincent

LG Mobile
內置電池的容量高達2,080mAh,同一般Smartphone的1,500mAh比,簡直係長氣袋!
推出日期及售價:待定

兩大5吋機拍埋比較,GALAXY Note(右)明顯長身啲,不過Optimus Vu就闊得多。

睇網頁
4:3比例啱啱好用盡屏幕空間,字體亦相當細緻。

睇普通影片
一般4:3影片用新機嚟睇當然啱啱好,仲可以用盡屏幕添!

睇高清影片
睇16:9高清片嘅效果就差少少,屏幕橫放時高度不足,上下仲有礙眼黑邊。

《Notebook》App軟件內可以隨時更換筆觸及筆迹,而且更可插入地圖、圖片、影片等檔案,玩法甚多。

預載《LG Reader》,有唔少電子書畀你下載;而且睇書軟件仲有得調校光暗,真貼心!

雖然冇特別標明,不過新機的屏幕亮度其實達650nit,陽光直射下都唔會矇查查。

位於平澤市(Pyeongtaek)的Digital Park距離首爾市要5小時車程。

LG特別安排直升機接送傳媒,只需15分鐘就到達!

LG的Cinema 3D TV是近年的重點之一,廠內亦設有體驗區畀你慢慢睇、慢慢試。

Optimus 3D Max繼續大玩雙鏡頭以及裸眼3D屏幕,仲加入「2D to 3D」轉換器、「Range Finder」對焦功能等新功能。
推出日期:2012年第二季(售價待定)

新機預覽
Optimus 4X HD是品牌首部四核心手機,加上採用Android 4.0,令人期待。
推出日期:2012年第二季(售價待定)

L7、L5、L3三部新機雖然機能唔強,不過統一的設計都幾吸引。
推出日期及售價待定

Optimus LTE的設計就冇乜特別,不過單靠個4.5吋True HD IPS屏幕都已經夠噱頭。
預計推出日期:4月底(售價待定)

試用幾日,大部分時間都可以保持30Mbps的下載速度,效果極好。

arrow
arrow

    stacylife 發表在 痞客邦 留言(0) 人氣()