要食正宗的避風塘炒蟹,唔係去銅鑼灣,而係去尖沙咀興記。興記由1957年喺避風塘開始做生意,由艇仔做到上地鋪,累積了大量明星食客,陳志雲、李宗盛、徐小鳳、譚詠麟……都可以在這裏找到他們的親筆簽名。其中一位死硬粉絲就係Michael,佢話要食避風塘炒蟹,淨係會嚟呢度,「自從好朋友帶我嚟食過一次之後,我就唔會再去其他地方食炒蟹啦,有幾次試過太掛住呢度,喺機場一落機就即刻飛過嚟醫肚!」

第45擊:古法避風塘炒蟹 $16/両
講到避風塘炒蟹,大家一定會諗起堆到好似座山咁高嘅炸蒜,仲有被熱油半煎半炸至乾身的肉蟹。不過原來呢款係改良版炒蟹,真正的避風塘炒蟹唔用炸蒜葱花,唔會成碟油淋淋,只用豆豉同辣椒濕炒,更加唔會將蟹炸到乾身咁嘥料。老闆娘蓮姐話:「𠵱家除咗我哋,好少人用豆豉炒蟹㗎啦,火候難控制,容易燶又黑麻麻,賣相唔靚。」
興記堅持用陽江豆豉,要溝生蒜茸發酵最少三日;辣椒醬要混合新鮮指天椒同四川辣椒乾,味道才夠香;蟹一定要用越南頭手蟹,肉實肥美,每隻最少斤半重。另外,要講火候。師傅炒蟹絕不能心急,等蟹炒到七至八成熟,先加入豆豉同辣椒,每落一種材料,師傅都會用大火爆香再收火,等蟹慢慢吸收醬汁的精華。雖然這樣炒蟹比普通炒蟹多花三倍時間,不過豆豉、蒜味同辣香才可以進佔蟹的每一個部分,令人食到舔舔脷。師傅亦物盡其用,將炒蟹用完的油連同豆豉留起,畀食客蘸蟹或配合其他菜式食,而Michael就推介大家用蟹油點豬肚同打邊爐喇!

Michael
呢度避風塘炒蟹係最正宗的,蟹肉夠肥美,啖啖肉,辣醬做得香口,我成日都叫老闆娘留啲炒蟹油畀我返屋企開餐㗎!

避風塘興記
尖沙咀彌敦道180號寶華商業大廈1樓 2722 0022

何謂missing out?
本地有不少舊菜式被封箱,絕跡的原因可能是製作繁複、老師傅年華老去等等。不過只要你飲食經驗豐富,用心搜索,總有漏網之魚在附近。每期少年食神Michael發掘滄海遺珠,把舊時的食物連帶回憶重現眼前。 ####


《FACE》飲食版監修人少年食神 Michael

arrow
arrow

    stacylife 發表在 痞客邦 留言(0) 人氣()