嘩,未正式踏入夏季,溫度已經標升至33度,熱到人大汗疊細汗。不過,要對抗炎炎夏日總有辦法!《FACE》為大家搜羅咗4間最新甜品屋同新menu,介紹20款冰涼甜品,同大家喺高溫中消消暑!

紫葡之戀 $48
鎮店之寶,大大粒的紅提皮薄唔澀,用巨峰提子汁溝入刨冰,提子味勁濃。

 
室溫:26.7度透心涼度:★★★1/2 甜度:★★★ 《FACE》總評:裝修得好靚、坐得舒服。好多獨有的自家甜品,夠特別,甜品大多少甜,食得健康。

最有創意奪獎提子刨冰捲土重來
新店甜品工房剛進駐尖沙咀一個月,已經晚晚爆晒棚。其實老闆Dominic同Brian早在'05已經開設自己的甜品店,更喺'09全港食神爭霸戰中,憑自創甜品──紫葡之戀,奪得全港甜品組金獎,無奈租金問題,他們被迫結束生意。事隔年多,老闆們捲土重來,今次新增7成全新menu,更自設bakery,每日有專人造雪糕同自製乳酪。得獎的紫葡之戀提子味極香濃,閒閒哋每日可以賣200份。為咗呢個甜品,老闆親自到果欄試勻唔同產地的提子,最後決定冬天選用智利提子,夏天就採用美國提子,確保任何時候食,提子都是最甜最juicy。老闆亦特別加入彈牙有咬口的韓國海藻珠,食到卜卜聲,好似魚子喺嘴裏面跳緊舞咁,食得非常過癮。

宇治金時 $45
最傳統的日式甜品,自製的紅豆雪糕質地厚實,吃起來有點像雪糕蛋糕,紅豆味濃。

芒之戀曲 $48
用上半隻20cm長的菲律賓大呂宋芒果肉,超甜,加上芒果味蒟蒻、荔枝味海藻珠,面層再淋上乳酸,開胃醒神。

紫醉之迷 $42
自製的冧酒提子雪糕,提子乾要浸足2日冧酒,所以酒味比街外的要濃。

浪漫季節 $48
將4-5粒美國士多啤梨切粒,夾在木糠、椰果同蒟蒻中間,推介選軟雪糕混合乳酪。

甜品工房
營業時間:11am-2am 電話:2732 2722 地址:尖沙咀厚福街12-12A號地下

最冰凍100%脫脂froyo無限追加toppings
Red Mango喺全球已經有150間分店,係全球最大的連鎖frozen yogurt(froyo)品牌,今次終於姍姍來遲落戶香港。全線Red Mango採用100%脫脂奶,唔落人造增甜劑同gluten-free(無麩質),所有生果都係飛機貨日日空運到港,真係落重本。每日froyo共有4款口味,28款toppings,朱古力同granola都係有機產品,生果就係每日新鮮處理,絕對唔會浸糖水。普通一杯froyo133克,都係得103卡路里,仲要任你揀topping,只要你擺得落就得!

 
室溫:24.5度透心涼度:★★★★ 甜度:★★★ 《FACE》總評:水果夠新鮮,乳酪夠凍,甜酸度又平均,做正餐同小食都啱。

Red Mango
營業時間:12nn-10pm 電話:2907 1199 地址:中環威靈頓街71號地下

最多選擇中西合璧薑汁撞咖啡
小店裝修以木色為主,牆上掛滿本地藝術家的畫作,感覺悠閒舒服,老闆邀請到曾任職遊艇會及前利苑甜品部主管林師傅加盟。雖然店中的甜點不是太特別,不過勝在數量多,有過百款中西甜品,無論涼粉、湯丸、杏仁茶定芝士蛋糕都有。而店中主打咖啡就選用世界第二大咖啡生產國的哥倫比亞咖啡豆,咖啡豆比較飽滿,甜酸味亦平衡得宜。喜歡挑戰新口味的朋友,可以試連鬼佬客人都讚好的自創凍薑汁撞奶咖啡,好似食緊薑汁撞奶,咖啡味在口中徘徊,但去到喉嚨,薑的辣味就成為主角,after taste極長時間,很有新鮮感。


室溫:25.2度透心涼度:★★★ 甜度:★★★★ 《FACE》總評:甜品同飲品選擇極多,有唔少中西合璧的新款式,適合一家大細同要求多多的朋友。

星星咖啡
營業時間:12nn-12mn 電話:2957 8003 地址:旺角通菜街22號達明大廈地下

最靚最潮 Baby出擊法式靚甜點
Angelababy繼旺角同銅鑼灣開cafe後,今年5月再度出擊,係尖沙咀開設5,000呎旗艦店,仲配合法國五月的主題,推出10款只限尖沙咀店供應的特色法式甜點。每款甜品都係Baby同甜品主廚研究出嚟,款款賣相都靚到震,全線甜品仲落重本用日本雞蛋同北海道3.6牛奶。 Baby最愛的就係用意大利軟芝士同日本雞蛋製成的Baby海綿蛋糕,芝士餅同海綿蛋糕一層疊一層,仲配合埋非常清新的青檸雪葩,食多幾件都唔會滯!而全場最受歡迎的,就係玫瑰棉花芝士餅,用玫瑰酒同玫瑰花混合忌廉芝士,中間還有浸了糖漿一星期的玫瑰花蕊,玫瑰花味比街上吃到的都要香濃一倍有多!


室溫:22.2度透心涼度:★★★1/2 甜度:★★★1/2 《FACE》總評:餐廳黑白色裝修超有型,10款新甜品樣樣都好有心機,口味同款式都夠創新。

Baby Cafe
營業時間:12nn-12mn 電話:3583 4333 地址:尖沙咀彌敦道63號 iSQUARE國際廣場3樓301鋪 ####


Brian行政總廚 Dominic行政總廚我哋仲有自家製乳酪同軟雪糕,仲可以兩溝,好多客都覺得咁樣食,甜酸度平衡得最好!


原味frozen yogurt (103 kcal/133g) $39 原味的frozen yoghurt奶味比較重,適合配搭新鮮生果食,最回本一定係揀黑莓同紅莓等飛機貨。


冰朱古力 $32 用美國60%的AMMA朱古力粉製成的冰朱古力,冰粒打得細粒,飲落唔會咬到「嗦嗦」聲,冰極透心。


紅莓frozen yogurt (146 kcal/213g) $45 紅莓味酸酸甜甜,最驚喜係配美國芝士蛋糕一齊食,完全提升芝士香味,揀topping,必試芝士蛋糕!


雜莓Smoothie (200kcal) $40 Smoothie即叫即打,唔加冰,所以飲起來口感比街外的稀,完全唔落糖都出奇地好飲!


Tropical parfaits (280kcal) $48 同樣用100%脫脂奶製造,加入士多啤梨、香蕉、藍莓同granola,非常飽肚,女生絕對可以當正餐食。


Catherine文職 Emily文職好鍾意食呢度啲froyo,因為唔係好甜又唔係唔酸,生果topping都好新鮮,有時食一杯真係可以當lunch。


位於美國的Red Mango分店


凍蘆薈蜂蜜鮮奶咖啡 $34 最底層是蘆薈啫喱同天然蜂蜜,將蘆薈啫喱混和咖啡一起飲,連糖都唔使落,清甜潤喉。


士多啤梨魔珠乳酸 $33 一粒粒士多啤梨味的魔珠在口中爆開,感覺都幾得意,乳酸味未算太重。


芒果布甸 $28 每日到街市買入新鮮呂宋芒,將芒果芯切粒混入布甸中,其他芒果肉則攪拌成漿,芒果肉甜。


朱古力牛奶慕絲 $28 用美國黑朱古力粉溝澳洲鮮奶,朱古力味未算太濃,不過牛奶味香,質地尚算幼滑。


凍薑汁撞奶咖啡 $34 將老薑熬汁混合奶咖啡喝,入口先苦後辣,辣味久久不散,醒神!


Cindy英文老師 Philip澳洲遊客 Bethia澳洲遊客第一次嚟試,飲咗綠茶,覺得好fresh,啲甜點感覺都好新鮮,坐得幾舒服呀!


Baby最愛


玫瑰棉花芝士餅 $58 人手打製的餅底夠實淨,玫瑰忌廉中加入脆口的玫瑰花蕊,增加口感,芝士味同玫瑰味配合得好!


Baby海綿蛋糕 $48 特選日本雞蛋同牛奶,所以蛋味濃郁,加咗少許檸檬汁的海綿蛋糕感覺清新。


黑朱古力伯爵茶慕絲蛋糕 $48 用法國Valrhona 64%的朱古力同英國伯爵茶製成慕絲,1:1的比例令成個蛋糕唔會太甜,入口有淡淡茶香。


無花果慕絲撻 $58 面層係原粒新鮮無花果,味道偏淡,再用原粒無花果加上冧酒同忌廉攪拌,底層是鬆脆的牛油撻,整個甜點味道偏淡。


北海道3.6 牛乳奶凍 $39 用北海道3.6牛奶加法國忌廉打成的奶凍,好似BB的肌膚般嫩滑,簡單卻令人食唔停口。


Penny甜品主廚全部甜品都係Baby同我一齊諗嘅,𠵱家最受歡迎一定係玫瑰棉花芝士餅同黑朱古力伯爵茶慕絲蛋糕,因為街外好少食得到。

arrow
arrow

    stacylife 發表在 痞客邦 留言(0) 人氣()