銀杏館華麗冰室美肌食療　姚子羚嗜花膠 @ 明星靚相大分享☆

十個女仔有九個都希望天生皮膚好，唔使點打理都亮麗照人，而姚子羚（ Elaine）就是當中的幸運兒。雖然她自細就遺傳了姚媽媽的白滑肌膚，但歲月催人，亮麗肌膚點都要 keep一 keep，所以今次品嚐由逸東軒總廚譚棟師傅及唐安麒小姐合作設計的宮廷養顏宴，從飲食開始由內調理皮膚。 Elaine仲話要皮膚好，必飲靚湯水，靚人配靚湯乘機讚埋自己，難怪成為上位姐仔之一啦！

記者：林敏婷
攝影：潘志恆

為靚多飲湯

Elaine同好多藝人一樣忙碌，能夠返屋企落妝休息已經算很好，所以都好少護膚，甚至乎連敷 mask都是兩星期一、兩次，「其實有時畀皮膚太好的護理，都唔係一件好事，如果家已經要用到甚麼魚子精華，咁四十歲都唔知仲可以用咩喇！」雖然天生麗質，不需勤於護膚，但食無定時是藝人一向不變的定律，所以身形高瘦的 Elaine盡量揀多菜少肉及多飲湯，「屋企人好注重湯水，以前媽咪成日煲湯畀我哋飲，所以都習慣了飲湯，最鍾意就係中式湯水，特別係花膠湯，可以補充骨膠原嘛！」擁有主持湯水節目經驗的 Elaine還沒試桌上的蟲草花淮杞燉花膠，一眼已經望得出湯中藥材是蟲草花，性質溫和具抗氧化功效，再配上花膠，養顏滋補，所有女士都為之心動。米芝蓮星級廚譚師傅說花膠是中國四大補品之一，補而不燥，是美容護膚的好食材，而燕窩能夠令細胞再生，回復青春，兩種食材都令女士愛不釋手。然而品嚐過三椒炒花膠和上湯竹笙釀官燕的 Elaine，則認為燕窩竹笙對抗衰老雖好，但花膠的膠質對皮膚幫助甚大，而且煮法五花八門，「花膠可以多些煮法嘛，煲湯又得，又可以煮成花膠扒，炒又得，比燕窩有咬口，而燕窩的味道來自調味，我就鍾意用燕窩整甜品多過菜式！」

■蟲草花淮杞燉花膠，譚師傅選用了澳洲花膠，燉起來湯清而鮮甜。

■三椒花膠伴上湯竹笙釀官燕，竹笙中釀滿印尼官燕，清而不膩；三椒花膠顏色鮮艷，咬口十足！

■宮廷三小碟，用葡萄籽油輕燒的脆鱔不油膩，素鵝有淡淡龍井茶香，雲耳爽脆，是一道開胃的前菜。

爽脆鮮蝦　踢走肥膩

除了蔬菜，海鮮亦是 Elaine的心頭好，低熱量的蝦不肥膩， Keep Fit至啱！「爸爸有時會整乾煎蝦碌，好惹味，但如果畀我整，我就會用來白灼，唔使煮！」 Elaine說罷便一邊哈哈大笑，一邊品嚐爽脆和滲透蛋白芳香的金箔椰皇蝦。曾透露自己對廚藝一竅不通的 Elaine，說現在已經有點進步，如果有時間亦會煲一些如眉豆雞腳湯等簡單的湯水，又會買一些烹飪書回去研究，還笑說是為未來的男朋友作好準備，但太複雜的菜式仍有待學習。
趁未學識煮養顏菜式前，不如試吓用最原始的美肌方法啦，水果一直以來都是女士護膚的救星，喜歡吃清甜如梨、蘋果、西瓜等水果，更有獨特見解，「女士們要皮膚靚真的不能忽視蔬果，有朋友提議早上起身就先食一個水果，這樣會對腸臟較為有益，可以加快排毒！」話雖如此，不過食個飯後果亦無傷大雅，特別係配合杏汁燕窩一齊燉的原個萬壽果，譚師傅話要燉成二十分鐘先夠火候，萬壽果即係木瓜，既可以豐胸又可以去水腫，女士們唔好走寶喇！

■金箔椰皇蝦，爽脆的蝦球，配合芳香的蛋白和椰皇，含豐富蛋白質，低熱量，絕對適合一眾貪靚的姐妹們。

■杏汁燕窩燉原個萬壽果， Elaine最喜歡吃到它一梳梳的燕窩，矜貴又養顏。

宮廷養顏宴套餐

＊宮廷三小碟（蜜汁脆鱔、京燻素鵝、芥香雲耳）
＊金箔椰皇蝦
＊蟲草花淮杞燉花膠
＊三椒花膠伴上湯竹笙釀官燕
＊鹽水北京菜芯
＊杏汁燕窩燉原個萬壽果
＊芒果蘆薈拼桂花三色紅豆糕
$480/位（兩位起）
另加一服務費（供應期：即日起至8月31日）

逸東軒（27101093）
九龍彌敦道380號香港逸東「智」酒店低層二字

海底燕窩　養顏有機

Elaine說喜歡吃燕窩甜品，其實筆者還有另一美顏推介，就是有海底燕窩之稱的海藻。支持長者就業的銀杏館設計了幾款海藻美食，如華麗宮廷桂花糕，利用海藻的提取液代替魚膠粉，製成海藻桂花糕，當中還有原味、楊枝甘露味和紅豆味可以揀。由於海藻擁有高膳食纖維同膠原蛋白，可以促進骨膠原生長，改善皺紋令皮膚回復彈性，適合多心又貪靚的女士。雖然這三款糕點只在轄下食堂華麗冰室有售，不過總店又點會令大家失望呢？海藻本身是沒有味道的，但總廚 Dick師傅就加入黑醋及橄欖油製成口感獨特的沙律，再配合用海藻提取液撈過的燒白果，精心炮製出一道銀杏館的回憶，清新零脂肪，又幫助排毒的海藻菜式一定適合愛健康的你，而且此菜是總館免費奉客，令食客食完都記得店名，真花心思。總館現在還推出好幾款有機的私房菜式，當中包括鮮珍寶虎蝦伴烤有機蔬菜配有機草莓汁、法國有機三文魚柳伴深海東星斑配美國珍寶蘆笋佐法國芥末籽汁，當中的配菜有部份還特別選用銀杏館附屬的有機農場所種的有機蔬菜，想食得健康話咁易喇！

■有機紅菜頭蜜，含豐富胡蘿蔔素及維他命 C，多喝能有助排毒，於總館是免費待客的 Welcome Drink！