漫遊毒物

蜘蛛．快攻

2012年07月11日 ~~ 第268期 Face

俾隻大蜘蛛吸引到睇呢份稿，加上已經 7月中，你唔係同我講你仲未睇《 The Amazing Spider-man》啩？唔該嗱嗱臨入場睇戲，再 K.O.埋遊戲版，再買經典珍藏 figure、手機 apps同各式兒戲玩物，一齊後續蜘蛛熱啦……唔係 19號點迎接《夜神起義》呀！

《 The Amazing Spider-man》

廠商： Beenox/Activision
平台： XBox360、 PS3
類型：動作
人數： 1人
售價：$299（電氣良品/2359 7998）

天下武功　唯快不破

新蜘蛛仔係高中生，個細路雖然好鬼中二病（日文中嘅青春反叛期），故事中段犯傻害死阿叔，好在最終知錯，化身蜘蛛俠後打壞人，身法快而準，打架又勁又狠，觀眾大叫過癮！呢隻 game都有少少似，故事過場 movie超慢超悶，拖戲到死，但玩落發現遊戲進行速度極快！大廈間蜘蛛絲飛簷走壁：快！迷宮地圖唔明即按 R1（ XB360為 RB），畀晒 tips你：爽！細至小嘍囉、大至巨型機械波士，戰鬥方法都係以快打慢為主，係咁按 R2（ RT）飛來飛去，飛埋去出三幾拳咁又一件，玩起來絕不拖泥帶水。


好多人話今集電影波士蜥蜴人樣衰，唔緊要，遊戲版除大量異形怪物，仲有超巨型重金屬大波士打！開戰時會有好多指示教路，比如幾時用 R1射自己埋去，再埋身按△掣（ Y掣）出拳轟爆佢個頭，其實唔難打！


Web Rush Mode係畀心急人用，一開動就會跳入第 1身視點（畫面上會見到半透明蜘蛛眼罩），四圍 scan吓，出現黃色蜘蛛俠殘影，原來係教你過版路線，跟住跳就 ok。


戰鬥時又有另一套操作法，拳腳攻擊係□掣（ X）， R1（ RB）係射蜘蛛絲利用反彈力攻擊對手，力度好猛。

蜘蛛後傳　睇完先玩

平時啲電影遊戲一般都係前傳性質，等你打完機再入場；但呢招 𠵱家已經 out啦，此 game係一隻「後傳」，入場睇新主角打得有型有款、拳拳到肉，散咗場仲未過足癮，大可以買呢款 game版追看接住落嚟嘅故事，仲要對付蜥蜴博士入冊之前發神經整好嘅幾款半人半獸，聽講 game內仲有好多伏線，為續集鋪路！


故事係電影版之後，蜥蜴博士自首入獄後 1個月，蜘蛛俠發現博士舊公司繼續 DNA亂種研究，仲有大量變種怪物要打！


蜘蛛俠可在曼克頓四圍跳，佢喺電影狂玩 Sony Xperia手機，遊戲都可按 select叫部手機出來查 Google Map，唔使再花時間四圍搵下一版喺邊。


女友 Gwen帶 Peter混入研究所追查事件，遊戲版女朋友完全唔似 Emma Stone，唔夠可愛呀陰功！

AR蜘蛛　通街吐白沫

蜘蛛仔手機不離手，開戰前仲要玩泡泡龍方塊。我哋就可上 app store同 Google Play下載呢隻《 The Amazing Spider-man AR》，再去佢官網（ http://www.theamazingspiderman.com）下載相應嘅背景 wallpaper，喺芒開圖又好、印出嚟又好，以 AR影相 app對住張圖，蜘蛛俠就會現身，喺手機畫面上跳來跳去打怪物，仲可以 capture相片放上 fb。


官網可免費下載 5種動作，其他要去指定合作店鋪內先有得試（限美國本土）。


原來用 app對住 360/PS3《蜘蛛俠》遊戲盒一樣可以叫隻巨型蜘蛛俠來射怪物！

蜘蛛 cosplay　唔使去 ebay

蜘蛛俠今次反抄《勁揪俠 Kick-Ass》，上 ebay買緊身衣做蜘蛛衫，玩家想扮鬼扮馬唔使咁辛苦，買個發聲面具都只係兩嚿水，唔只有對白同射嘢聲，對眼仲會發光，暑假可以帶埋去動漫節玩 cosplay。$199.9（ a）

冇料到手套

好似話因為玩具安全標準各國有異，美國本來有款射蜘蛛絲手套，但香港就得呢款射飛彈版（$169.9）同發聲版（$139. 9），好過冇。（ a）

變身蜘蛛車

Crossover變形金剛嘅蜘蛛俠，只需要成隻瞓喺地，再做多個 sit up動作，就會變紅色跑車。$119.9（ a）

3吋半小蛛

有最多款式，不過多數都係非原作造型嘅飛機、大炮版蜘蛛俠，自己覺得呢兩隻叫基本啲，冇咁低能。各$99.9（ a）

8吋巨蛛

玩唔起 Hot Toys 12吋，呢款都叫夠巨型，身上六角蜘蛛網紋仲幾細緻。（$99.9/a）

Model身形

Hot Toys雕軍事大隻佬起家，風格總係比較 man同大大隻，新版蜘蛛俠係 model鋼條身形，花咗唔少工夫去重塑骨架，高䠷得來亦有肌肉感，加上勁多細緻紋理嘅緊身衣，仍然無礙 chok出多種高難度甫士，記者覺得平衡度比上兩隻紅/黑舊蜘蛛更掂。訂購價$1,230（ 2012年尾發售/b）




電影戲服嘅二重 layer， figure改以發泡壓紋去做，有立體感之餘夠貼服。尤其係隻手套，我唔話你知係玩具，以為係真人呢！


日本廠隻蜘蛛俠根本做唔到圖中呢啲曲體動作。


正式發售時仲會跟埋 5對手掌，同 Peter Parker真人頭像。（廠商修改緊造型，所以暫時要打格仔。）

趣致大肥蛛

同場仲可以睇埋日本 Medicom 400%（約$900/c）及 100%（約$150/c）熊仔 bearbrick。（ 7月 14日發售）

（ a）玩具反斗城及百貨公司
（ b）玩具狂熱（旺角兆萬中心 216鋪/2388 4677）
（ c）超人玩具（旺角兆萬中心 222鋪/2366 2688）

撰文、攝影：鍾世傑