郭政鴻的入行經歷，令人想起《阿甘正傳》的主角Forrest Gump，同樣有顆赤子之心，又因緣際會，比普通人看得更多，經歷得更多。



不同的，是郭政鴻遇到的不是尼克遜、貓王，或者約翰連儂。取而代之，是參加新秀時的「對手」李克勤、周慧敏及草蜢，拍電影時的「同輩」黎明及周海媚，還有羅嘉良、陶大宇、陳慧珊，都成了郭政鴻的親密好友。如今這些人全部獨當一面，但郭政鴻這個Forrest Gump，卻繼續忠於自己，留守自己的陣營。

驀然回首，已拍下逾70套電視劇的郭政鴻，坦言沒多大成功感。

「我只係覺得時間過得好快，近呢幾年，先至有人真正留意我。」

他都有怨過，怨自己被功夫底子所累，怨自己被觀眾定型。幸得恩師一席話，讓他走出迷陣，讓他更認識自己。

「我將功夫變咗我嘅附屬品，我依家正又得、奸又得、時又得、古又得、喜劇又得，我多咗樣其他演員無嘅動作，係好根深蒂固嘅動作，我將功夫放入喜劇，會更加悅目，唔再係一個打仔。」成功將功夫放入喜劇的人，還有成龍，上半生在演Forrest Gump的郭政鴻，下半生會演Jackie Chan嗎？

郭政鴻入行27年，一直默默耕耘，如今雖與一線之列尚有距離，但無論人氣或角色戲份都愈來愈重。最近的《五味人生》，他更憑「九妹」一角與郭晉安及關詠荷並駕齊驅，深獲觀眾讚賞。談起「九妹」一角，郭政鴻即雀躍萬分，滔滔不絕細訴「九妹」跟之前《野蠻奶奶大戰戈師奶》中另一乸型角色「C.C.」的分別。

「其實C.C. 同今次嘅梁九妹係有啲唔同，C.C.比較有文化，同埋優雅啲，梁九妹比較草根啲，比較率直。其實梁九妹咁多戲，如果成日做出好重『Cam Cam』味道，我相信都幾討厭，點樣可以控制到啱啱好，由心而發，功夫就喺呢度……。」


繼《野蠻奶奶大戰戈師奶》後，郭政鴻再於《五味人生》飾演?型角色「梁九妹」，娘娘腔得來又帶點男子氣慨，為觀眾帶來深刻印象。

我的腦海忽然浮現最近上映的西片《柏納大師奇幻show》，柏納大師在台上扭盡六壬，可惜只是對牛彈琴，觀眾從未停下來細心欣賞。不知郭政鴻的付出，又有幾多觀眾感受得到？

未紅：埋怨自己

說到演技，其實要把角色揣摩得如斯細緻，豈是朝夕之事，郭政鴻坦言自己曾經歷過無數苦惱。

「你做二線角色做得長，成日做啲閒角，突然俾個主要角色你做，你會處理唔到，因為係唔同演法嘅，做二線就唔同，做嚟做去，唔係A反應就B反應，誇張少少咁，做得唔夠細膩，做主角唔係，做主角要有鋪排，場場戲都要有鋪排。」

經過多年磨練，郭政鴻已躍升為「老戲骨」，所以對他來說，演技已不成問題，至於為何未能大紅大紫，他卻埋怨自己，把問題歸咎於自己一身好武功，所以有段時間，他極力與「動作演員」的形象保持距離。


郭政鴻小時候帶點傻氣，想不到長大後變了「壞蛋」一名，常演奸角，他也意料不及吧。

功夫：最大制肘

於是，我以試探口吻問郭政鴻。他演的一個角色，我非常喜歡，叫他猜猜看。

「《西遊記》？」他的第一個答案。因為受歡迎、收視好，但他自己未必喜歡。

「《尋秦記》？」第二個答案。也許他自己較為喜歡，但市場反應不及前者理想。

我的答案，是《覆雨翻雲》中的魔師龐班。不過答案無關重要，反而從這得出結論，就是郭政鴻還是對打到飛起的角色較有信心。

我心中不禁啞然，因他表示恨死自己的功夫，不想大家將他定型為武夫，忽略他的演技，他也怨自己從少對沙包多過對人，不懂跟別人溝通，累得自己一直際遇平平，事業進退維谷。

「五、六年前，已經覺得去到樽頸位，做咗咁多年，俾人感覺咁剛烈，最煞食嘅瓣就係打，但問題係我喺電視行業係要多方面發展，唔可以淨係打，劇集唔會俾你打咁多，你唔係拍電影《殺破狼》、《葉問》，主要賣動作，劇集往往二、三十集，冇可能集集都係打，一定要做戲，所以我受咗好大制肘。」

有否想過放棄？

「放棄當然有諗過，但我又鍾意做呢行，無辦法?喎，惟有堅持落去，我覺得有一樣嘢係最開心嘅，就係自己堅持到終於見到曙光，可以俾到訓練班嘅師兄師妹一啲啟示，我自己捱咗咁耐，未必係得，但你唔堅持唔做好，就一定唔得！」

恩師 : 創新天地

結果，經過一輪賽後檢討，又拜梁家樹的一番說話，郭政鴻毅然轉型。

「梁家樹先生當時話，如果我要有另一片天地，就一定要做喜劇，一定要將『打』扔低，呈現另一個郭政鴻俾人睇。佢好大膽俾機會我試，我真係要多謝佢，俾?好多意見我，某程度上，佢真係我嘅恩師，好想借個機會多謝佢。」提起梁家樹時，郭政鴻口中雖然連番多謝這位恩師，但臉上神情卻又起了一股謎團異樣，「教導」當中是否還有「教訓」？只有郭政鴻才心知肚明了。

放下多年的包袱，轉做喜劇的郭政鴻不但漸受觀眾歡迎，最重要是重拾了自信。

「依家我會將功夫呢樣嘢變咗我嘅附屬品，我依家正又得、奸又得、時又得、古又得、喜劇又得，我多咗樣其他演員冇嘅動作，呢個動作並唔係學咗兩三個月嘅動作，而係好根深蒂固嘅動作，我將功夫放入喜劇中，會更加悅目，唔再係一個打仔。」

其實除了梁家樹，人緣甚廣的郭政鴻也時常受好友影響，他曾試過因為周海媚的提醒，放棄三萬元月薪，投考無綫訓練班，亦把陶大宇一句說話銘記於心，成為多年座右銘。

「佢最紅嘅時候，曾經同我講過，佢乜嘢都唔識，淨係識盡量做好啲戲俾人睇，呢個係你唯一嘅機會。」相反，郭政鴻也應教教大宇如何處理緋聞，否則兩兄弟現在可以有更多合作機會。


郭政鴻跟陶大宇屬多年老友，二人曾於《大時代》一起合作，而大宇的一句說話更成為郭政鴻多年座右銘

感情 : 一向唔提

「我對感情事，一向都唔提，有乜嘢都係我兩個人嘅事，唔需要向任何人交代，我同『佢』喺埋一齊，開心與唔開心，我哋自己會知，我公開咗同邊個喺埋一齊嘅話，啲人就會問你幾時拍拖，幾時拍拖就幾時結婚，幾時結婚又幾時生仔，咁我覺得冇必要講關於我家庭上嘅嘢。

由細到大，我啲屋企人都唔鍾意我呢行影響佢嘅日常生活，如果我俾狗仔隊影，我會習慣呢個模式，但我啲家人唔會承受得到，佢哋會成晚瞓唔着，然後問點解啲人會咁樣講佢哋。」

會否找個圈中人拍拖，減低壓力？

「我冇同圈中人（拍拖）?喎，哈哈哈！總言之，我依家、現在或者將來，盡量都唔會講家人、屋企嘅事，佢哋唔鐘意，就係咁樣。」其實他並不如報道中的口硬，相反，我感到他為讓我「交差」，已在能力範圍內盡量合作，事關他稍稍停頓後，見我神色不對，多補充了兩句。


曾幾何時，郭政鴻跟滕麗明的名字畫上等號，二人緋聞甚囂塵上，不過自從他被拍下與前妻逛街的照片後，他跟滕麗明的霧水情緣也逐漸煙消雲散。

以前 : 戇下戇下

不過跟愛情相比，郭政鴻還是喜歡談他的演藝事業，好的壞的，他都坦誠相告，對演藝事業的熱情由心而發，亦無怨無悔，就算讓他從頭再來，他也義無反顧地走回舊路。

「我都會選擇返嚟呢一行，只不過我嗰陣時冇伯樂指點，冇人提攜，做每一行其實都需要一個伯樂去提攜，當時做咗咁長時間，都冇一個伯樂，咁無辦法，上天要你等唔到就等唔到，呢廿幾年我會當係一個磨練，學師夫話齋，練好功夫，等運到囉，係咪？人哋需要我等咁耐，我咪等咁耐囉！」

「唯一要改嘅係待人處事方面，依家嘅後生仔叻咗好多，醒好多，唔似得我哋以前戇下戇下，依家??，好識得把握機會，以前我哋唔夠醒，變?浪費好多時間，無乜人『點』，有人『點』好重要嘅！」

他甚至不會阻止女兒加入娛樂圈，當然亦不會鼓勵女兒入行。

我當然會話我嘅人生經歷佢知，但係我會俾佢選擇，佢自己係一個個體，

咁我唔會夾硬要佢點樣，只會用思想教育囉，同埋盡自己能力栽培好佢，順其自然啦！」


期待 : 新爆破點

大家或許會說他不夠聰明，不過這種順應天命，崇尚自由主義的性格，是與生俱來的，像《阿甘正傳》的Forrest Gump一樣，身邊從來不乏知己，不過功名利祿卻與他擦身而過。但郭政鴻又未至於無慾無求，事業來到現階段，他還期待一個「爆破點」，一個好像「Laughing哥」與「柴九」的奇蹟，雖然他曾遇過好多好角色，可是往往未能平地一聲雷，助他登上事業高峰。


「10年前，我演過《西遊記貳》嘅通臂猿猴，當時迴響唔錯，近排我睇番重播，我諗我依家未必做得番，因為着住盔甲，又要搞盡腦汁，不停郁之餘，要用盡所有環境道具嘅豐富角色，需要好大嘅energy，可惜我承接力唔係幾夠，變?出唔到嚟。」


好角色遇過很多，像《西遊記貳》的通臂猿猴（上）、《覆雨翻雲》的龐斑，可是郭政鴻始終未能平地一聲雷，擠身一線之列。


然而，觀眾是善忘的，他們已潛移默化把郭政鴻再次定型，不過今次是喜劇演員，而非動作演員，大家開始忘記郭政鴻曾經演過很多歹角，對他演的喜劇又再生膩了。我不是梁家樹，只是從觀眾立場出發，提議郭政鴻是時候轉型了，演回奸角可能對他的事業有幫助。

怎料，郭政鴻投來滿懷大志的眼神說：「我依家拍緊喇！」他正在拍攝的時裝新劇《團圓》，是演大奸角。

原來他已經再為自己作出打算。或許正如他所願，郭政鴻很快成為下一個「Laughing哥」或「柴九」了。

鋤強扶弱

訪問過後，郭政鴻問我：「其實你哋點睇我？」

我老實說：「10年前，觀眾未必認得你，不過依家會好欣賞你呢類演員。」

「你知唔知點解?」郭政鴻竟然反問我。

我未及回應，他已搶先解釋：「因為依家嘅觀眾都鍾意鋤強扶弱。」他深信，待了足足10年後，優勢已回到他們這邊來，實力派演員終於可以扭轉逆勢。

但細心想想，如果愈多人支持郭政鴻，是否代表愈多人從他身上找到自己的影子，因為懷材不遇而希望別人來鋤強扶弱呢？

明星靚相大分享☆復活板娛樂八掛週刊雜誌★娛樂八掛大放送★ 為食譜識飲識食街★ 任逍遙旅行萬里路 ★ 科技電玩一線通 ★ 寵物地帶 ★ 潮流男女打扮★ 健康之道★ 財經投資★ 五行玄學八卦風水★ 娛樂猛片放送站★ 伴我奔馳 賽馬貼士 提供★
明星靚相大分享(4月刊)★ 明星靚相大分享(5月刊)★ 明星靚相大分享(6月刊)★ 明星靚相大分享(7月刊)★明星靚相大分享(8月刊)★ 明星靚相大分享(9月刊)★ 明星靚相大分享(10月刊)★ 明星靚相大分享(11月刊)★ 明星靚相大分享(12月刊)★ 明星靚相大分享(01月刊)★ 明星靚相大分享(02月刊)★ 明星靚相大分享(02月刊)★ 週刊 及 雜誌(4-11月刊)☆ 週刊 及 雜誌(10-2月刊)☆
arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄