警署避鋒頭
由於未能成功擺脫記者，張智霖一臉不悅將車停泊在跑馬地警署暫避。記者欲上前和他做訪問，他即趁機 U turn極速離去。
滾熱辣
揭《衝上雲霄Ⅱ》型佬躁行 Cool魔危駕逆線行車 Sam哥鬧仔車廂發難
《衝上雲霄Ⅱ》有收視有口碑，連帶一眾主角都人氣急升。好似「 Cool魔」張智霖下月以 5千萬過檔蕭定一的經理人公司，「 Sam哥」吳鎮宇亦馬不停蹄返內地拍劇，豬籠入水。
不過人紅有代價，據知兩人近日壓力爆煲。日前本刊分別拍得張智霖 cut雙白線逆線行車，罔顧法紀。至於因不滿被 Chilam搶鏡的鎮宇，亦當街鬧仔，火爆脾氣再現。
張智霖在《衝上雲霄 II》飾演的風流機師，幾乎集集有女埋身，更試過一晚連食三辣妹，加上 41歲不老童顏和自度啜核金句，令城中掀起「 Cool魔」熱。得 Cool魔帶挈，日前便盛傳他下月約滿澤東後，以天價 5千萬加盟蕭定一旗下，加上與美心、 Fancl廣告續約，內地電視劇亦由 25萬一集酬勞，急彈至 35萬一集， 2013年絕對是張智霖大豐收一年。
25/7◎ 4:30pm◎地點：香港仔壽臣山南風道
逆線行車
張智霖當日駕駛 Range Rover座駕從深水灣寓所直駛向跑馬地方向，其間發現有記者車追訪，他即踩行油沿途左穿右插。當駛至壽臣山南風道時，見前面貨車駛得慢，竟然越過雙白線，逆線行車近三十米，兼繞過安全島爬頭，險象環生。若被警方檢控，可被控不小心駕駛甚至瘋狂駕駛，可判停牌及坐監。
收視孖寶
《衝上 II》不單成功力挽無綫一蹶不振的收視，最高有 35點收視，更帶挈 Cool魔張智霖和 Sam哥吳鎮宇成萬人迷。
靚靚詐型
雖然 Cool魔令張智霖豬籠入水，不過劇中他和一眾女角的香艷鏡頭，令他和老婆袁詠儀的夫妻關係變得緊張。 Chilam身邊好友透露：「阿靚同 Chilam喺好耐以前，已經約法三章，講明唔可以干涉對方工作，不過阿靚本身醋底，一有啲風吹草動就會好緊張，早年 Chilam同阿佘拍劇，你見靚靚日日走去監場就知啦。今次 Chilam拍《衝上 II》，佢又同法拉傳緋聞，靚靚都有啲『哽』住『哽』住。」
據知，張智霖一收到《衝上 II》劇本時，得知自己飾演風流角色，會與多個女角有纏綿鏡頭，已預先向靚靚備案，可惜尺度仍超出靚靚預期，二人更因為此事而嘈過。
靚靚呷醋
張智霖在《衝上 II》除了和陳法拉傳緋聞，其中與梁政珏的牀上戲更是挑戰電視尺度，終觸怒醋底靚靚神經。好彩靚靚日前已起程到內地宣傳新劇《龍門客棧》，否則 Chilam有排受。
收 5千萬轉會
一直星運平平的張智霖，得 Cool魔一角帶挈，日前有指蕭定一以天價 5千萬誘他簽三年約，加上近來頻頻接廣告，張智霖肯定賺到豬籠入水。
兄弟出高價
張智霖憑 Cool魔贏盡師奶心，上周六（ 27日）他為老死蘇志威的西裝舖做剪綵嘉賓，吸引二百粉絲圍觀，最後更要警察封路。有指蘇志威當日自動加五成薪酬利誘對方出席。
周日（ 28日），張智霖出席《衝上 II》宣傳活動，當記者問他知否自己危險駕駛，他即收起笑容說：「我知我係逆線行車！」此時其助手即拉他離去。
我係逆線行車！（真實對白）
冒雨逆線行車
與老婆「嗌霎」，心情麻麻的張智霖，上周四（ 25日），獨自駕車由淺水灣寓所外出。記者沿途見他車速時快時慢，其間他一度以時速 130公里行車。當到達壽臣山南風道時，更突然加速越過雙白線而逆線行車近三十米，幸好當時對面線沒有車輛迎頭駛至，否則後果不堪設想。由於見記者繼續追訪，張智霖索性將車泊在跑馬地警署，更自稱已報警，但等了約半小時，依然未見警察出來。心情甚差的他，趁記者上前做訪問之際，忽然踩油掉頭離去。
周日，張智霖出席《衝上 II》宣傳活動時，強調劇中親熱場口只是小兒科，更自稱毋須向靚靚交代。「呢啲親熱場口都冇乜嘢呀，係意識大膽啫，我一向冇乜底線。（知你老婆有詐型？）哈哈……佢都冇理我。（下次會再激啲？）係，唔通有部好似《色戒》嘅戲唔拍咩！（我哋見到你逆線行車喎？）（收起笑容）我知……我係逆線行車！（咁做好危險喎！）哈哈……係啊，都危險！」其身邊助手隨即匆匆拉他走。
不滿 Chilam搶鏡
以往笑面迎人的張智霖，因 Cool魔效應搞到壓力爆煲，至於一向有鋪鬧人癮的吳鎮宇，近日更加火山爆發。據知在《衝上 II》是第一男主角的吳鎮宇，相比較他嫩口滑頭的張智霖，明顯失色，更被網民唾棄為「老態兼老土」。粉絲過檔，有指吳鎮宇狂轟監製偏心將戲份及宣傳噱頭落在張智霖身上。
嚴父鬧仔
26/6◎ 7:00pm◎地點：將軍澳坑口村
為《衝上 II》谷住成肚氣的吳鎮宇，日前趁北上做宣傳前，抽時間陪老婆囝囝食飯聚天倫。當晚六時許，三人由西貢寓所出發，直駛到將軍澳坑口村一間意大利餐廳。只見泊好車的吳鎮宇，一直冇落車，怒氣沖沖指着坐在旁邊乘客位的囝囝，忽然搶去囝囝手上的電話，然後一輪嘴指着對方訓話。最後順番條氣的吳鎮宇，終於落車和老婆囝囝步行去意大利餐廳食飯。不過當過馬路時，吳鎮宇又再躁底，一手拖着囝囝手，一邊大聲說：「你行快啲得唔得？馬路嚟㗎！」而囝囝看來亦習慣老竇軍訓式教育，全程頭耷耷粒聲唔出。
現時一直留在北京宣傳新戲《獵仇者》的吳鎮宇，有指要求《衝上 II》監製重新剪接每集預告片，否則會缺席餘下宣傳活動，甚至拒絕出席原先應承八月的海南島宣傳。周二（ 30日），記者致電《衝上 II》監製陳維冠，他說：「我冇收過鎮宇電話，佢亦都冇講過話唔做宣傳，至於三亞（海南島）嘅宣傳，依家仲傾緊，我都希望可以齊腳！」
一向火爆的吳鎮宇，當晚原本心情靚靚和老婆囝囝 Feynman到坑口食意大利餐，但在車廂見囝囝玩手機，忽然強搶手機，更對囝囝一輪嘴訓話。
鬧仔行得慢
三人橫過馬路時，雖然附近冇車，吳鎮宇仍擘大喉嚨說：「你行快啲得唔得？馬路嚟㗎！」見囝囝依然行得慢，索性捉實他的手大步向前走。
全程講電話
在餐廳內，吳鎮宇幾乎全程緊皺眉頭講電話，甚少與老婆和囝囝傾偈。
走先降火
記者見吳鎮宇在餐廳只坐了半個鐘，其間只喝了半杯冰水，便一個人走了出餐廳吹風，降火十五分鐘後，再獨個兒上車等老婆囝囝。
51歲吳鎮宇早年與新加坡籍老婆王麗華結婚，囝囝 Feynman今年四歲。雖然吳私底下對囝囝嚴厲，但亦經常抽空親子樂，一盡父親責任。《壹週刊》圖片
北上拒宣傳
吳鎮宇近日一直留在北京為國內電影《獵仇者》做宣傳，原定八月初，他會歸隊到海南島宣傳《衝上 II》，但有指他因為遭 Cool魔搶晒鏡，而拒絕返港。
你撐 Sam哥定 Cool魔？
《衝上雲霄 II》搵 51歲的吳鎮宇同 42歲的張智霖孖住做型佬機師，殺盡老中青女觀眾。劇集播出兩星期，網上討論區已有大量評價，甚至將 Sam哥（吳鎮宇）同 Cool魔（張智霖）比較，兩人都有不少捧場客，受歡迎程度不相伯仲，就連天后容祖兒同發哥都公開表示中咗機師毒。
上星期發哥到無綫出席賀歲片記者會，自爆是《衝上 II》 fans，點名讚 Cool魔同 Sam哥都好有味道，視兩人為偶像。
留言列表
