未拍先有火
李若彤和李麗珍兩位 90年代阿姐，不約而同因志偉關係而應承拍新劇。但未開拍前，自知戲份少的李麗珍，已率先發難，唔妥戲份最重的李若彤。金枝慾孽中女版，絕對吸引過電視情節。
不忿主角變大茄 李麗珍寸爆李若彤
女人劇一向惹是非，有時戲外鬥爭仲好睇過劇情。好似曾志偉監製新劇《 M Club》（前名：《 Aerobic Girls舞室保衞戰》），搵來七位 90年代的女神李若彤、陳慧珊、李麗珍、葉蘊儀等擔正，已在上周正式開拍。
本刊收到消息，原來在劇中全部女星都是襯托主角李若彤，戲份根本分唔勻。
據知一直以為自己是第一女主角的李麗珍，收到劇本才知是配角後，率先發難。圍讀劇本時，李試過遲到早退甚至 no show。日前，本刊訪問她時，她亦句句有骨說：「我知佢（李若彤）戲份最多！希望佢有好發揮啦！」
一套劇得 30集， 7個女星點分都唔勻，一心為無綫省靚招牌的志偉，今次順得哥情失嫂意，睇怕有排頭痕。
30集新劇《 M Club》改編自韓劇《陽光姊妹淘》，講七個女仔的感情源自舞室，她們 20多年後重聚，發現理想與現實原來存在很大距離。在上月的造型會上，監製曾志偉表示七個女星都是女主角，戲份相若兼位位有發揮。事實上眾女角月初正式接過劇本後，始發現整套劇由始至終都是以李若彤為中心，其次最多戲份是陳慧珊和江欣燕。據知多位女星收到劇本後相當不悅，向曾志偉問個究竟。而一直認定自己是第一女主角的李麗珍，更嬲到在對戲時遲到早退，全程遊魂抗議。
珍妹拒交戲
其實首次擔任監製的曾志偉，對此劇相當緊張，除碌盡人情卡，找七位「女神」出山拍劇，還搵來電影《桃姐》的金牌編劇陳淑賢度劇本。一絲不苟的志偉更要求七位女星個個星期開會兼對戲，不過新劇開拍卻由六月頭改到七月尾，原因是當中有人扭計。
有幕後向本刊爆料：「班女角接套劇時已經收咗天書同大約 10集劇本，知道大家條線係點同戲份幾多。個個知道係李若彤做女主角，都有啲唔開心。好似 Flora（陳慧珊）就試過缺席內部造型會，要再揀多日特登俾佢試。珍妹（李麗珍）仲衰，次次叫佢返嚟對戲都遲到，試過遲兩粒鐘，返到嚟嗰陣仲『舂舂吓』未回魂咁。有次圍讀，珍妹見李若彤坐埋嚟，即時彈起身走咗去同江欣燕坐，明眼人都知咩事。李若彤都知佢唔妥自己，索性玩獨家村，自己煲劇本，費事再惹事端。」
日前，《 M Club》正式拍攝，原本飾演吳啟華舊情人的李麗珍，最後被李若彤搶走男友，劇情更交代李麗珍的女兒是岑麗香。忽然有個咁大嘅女，難怪珍姨姨咁㷫。《蘋果日報》圖片
雖然李麗珍藐爆李若彤，不過探班當日，李若彤與其他女角張慧儀（右一）、葉蘊儀（左一）有講有笑。《蘋果日報》圖片
李若彤：我同佢哋唔熟
李若彤和志偉 04年在國內拍攝電視劇《大宋傳奇》後，自此熟絡。早年李若彤患抑鬱症，亦第一時間告知志偉，難怪志偉度劇本會明益對方。
據知曾志偉同李若彤本是深交，志偉早年得知她患抑鬱後亦不時鼓勵她，邀請她出山拍劇，與社會多接觸。曾志偉更應承每天給她 8小時休息時間，以免令她精神緊張而復發。
對於李若彤戲份最多，李麗珍日前在活動上酸溜溜表示：「我睇咗劇本啦，佢（李若彤）戲份係多過我，希望佢發揮好啲囉！其實志偉搵我返嚟，都話我係女主角，最重要都係睇有冇演技啫！」至於李若彤就風騷表示：「都收咗部分劇本，個個有戲做，咁志偉都錫我，俾咗個有發揮嘅角色我。（驚唔驚李麗珍佢哋唔開心？）我同佢都唔熟！」至於監製曾志偉，則表示冇回應。
戲份分唔勻
本刊收到消息，除了李若彤和江欣燕是第一和第二女角外，其餘都是陪襯角色，即使戲份較重的陳慧珊，亦只是角色唔討好的奸角，至於葉蘊儀和張慧儀，更是戲份少得可憐的閒角，難怪眾女角唔高興。
暴力搶戲
息影多年的李麗珍，原來曾是小辣椒一名，拍劇往往多生事端。多年前，她就試過因不滿陳法蓉及張靜初戲份多過她，而狠摑她們。看來李若彤都係小心為上！
飛踢陳法蓉
10年，陳法蓉在《志雲飯局》中大爆，多年前在亞視拍攝《美麗在望》，曾被一女演員掌摑。「突然有演員衝入廠打我，仲講咗唔知乜嘢『黐脷筋』，幾個男人入嚟抬走嗰個演員，佢嗰陣仲想踢我。」事後李麗珍亦直認：「我係有鬧過佢（陳法蓉）！一定係佢做咗啲令人睇唔過眼嘅嘢……我承認係一時衝動，講中咗人哋死穴。」有指當時是因為李麗珍的戲份不夠陳法蓉多而出手打人。
真打張靜初
09年，李麗珍在文藝片《紅河》飾演越南按摩女，另一位女主角張靜初亦想憑此片衝出海外。有指兩人私底下經常要求導演加戲。演姑姑的李麗珍有大量打罵張靜初的戲份，她被指不時假戲真做，從不留手打對方。
留言列表
