娛樂喧
撐發免費牌辣㷫王征 陳啟泰遭封殺
近年騎呢新聞百出的亞視，對旗下藝人採高壓手段，除了要他們晨早返公司接受「再培訓」外，更勒令藝人反對發免費電視牌照及支持國民教育。
去年陳啟泰及林韋辰多次公開表示支持發免費電視牌照，令亞視投資者王征震怒。據知兩人將於 9月約滿亞視，不但未獲續約，陳啟泰更臨時飛出台慶主持。踢走頂心杉，亞視即另捧《亞洲星光大道》出身的蔡梓銘及亞姐筱靖，貪兩人平價又聽話。
求證陳啟泰，他直認工作量大減，又話：「公司立場同自己唔同！」雖然打定輸數離開亞視，但憑他多年的經驗，要跳槽無綫都唔難。至於林韋辰，則另搞電影公司謀後路。
陳啟泰（ Ken）因 01年主持《百萬富翁》身價急升，兩年前，陳啟泰離開有線回巢亞視，身價依然高企。除底薪 5萬，大騷每個五萬，年薪合計二百萬，堪稱亞視最高薪的演員。
不過，與中方關係千絲萬縷的王征，早前要求旗下藝員，反對發免費電視牌照，偏偏敢言的陳啟泰卻多次唱反調，不但公開撐政府發免費電視牌，又暗寸亞視拖糧。
陳啟泰的言行，多次令王征龍顏大怒，卒之今年五月亞視台慶，陳啟泰臨時被飛出司儀行列，由蔡梓銘頂替。據知他 9月約滿，亞視將不會和他續約，原本他在訓練班任導師一職，亦被罷免。
今年亞視台慶每人派五十蚊老麥禮券做利是，當時手持禮券嘅林韋辰話：「我食素，啲券會益人，唔好浪費公司嘅皇恩浩蕩。」明寸亞視出手低。
唔乖冇得續約
據知被封殺的陳啟泰對亞視心淡。「阿 Ken（陳啟泰）回巢時，亞視都話幫佢喺香港出唱片，佢簽約時亦有提過想去南美洲拍特輯，亞視本來話搵到贊助就拍，可惜最後統統得個講字。依家同公司關係咁，阿 Ken亦呻話係時候離開。」知情者說。
早前記者致電陳啟泰，言辭間他亦暗認被雪，十分無癮︰「九月尾係約滿，暫時未傾續約。我依家嘅工作少咗，同期望有出入。開唔到南美洲嗰個旅遊節目，係其中一樣，仲有其他……其實自己同公司立場唔一樣。」
問到是否因為撐發免費牌辣㷫王征而被封殺及不被續約，他就輕輕帶過︰「冇聽過呢啲……」再問他是否在亞視工作沒有言論自由，他停了兩秒，然後說︰「呢樣 no comment！」 9月約滿依家都未傾，續約認真凍過水。
另一台柱林韋辰也是在九月約滿，他直認至今仍未傾續約，又暗寸亞視捧唔起新人:「未傾續約，以往半年前就開始傾，依家都習慣咗。（回歸 show冇搵你做主持，搵咗蔡梓銘做，你點睇？）我當日有嘢做，如果公司捧到新人都要恭喜。（續約機會大唔大？）我搞緊電影公司，不過都會考慮。」
陳啟泰現時在亞視的工作，只餘下廣告商點名要他主持的《傑出潮商系列》。上月陳啟泰和盛品儒出席該節目宣傳活動時，兩人仍笑晒口交足戲。
最後大騷
七一回歸騷是陳啟泰為亞視主持的最後一個大騷，當時他的拍檔，包括朱慧珊及今後取代他的蔡梓銘（左）。
踢爆拖糧
去年和甄詠珊主持《撻着》，陳啟泰被問及亞視遲出糧，他表示：「我都試過，已經習慣咗。」據悉王征知道後甚為不滿。《蘋果日報》圖片
肉搏葉璇
陳啟泰為亞視主演過不少劇集，在《情陷夜中環 2》他更一改正氣主持形象，偷食弟婦葉璇。
筱靖頂主持位
蔡梓銘是首屆《星光大道》季軍，去年已經為亞視台慶擔任主持，有「大騷 ming」稱號。筱靖是 07年亞姐，現為亞洲會副秘書長，被喻為「亞視嘟姐」。兩人同是今年《我要上 ATV春晚》主持，甚受王征疼錫。
有亞視員工爆料︰「公司依家最緊要係員工聽話同吹捧公司，好似蔡梓銘同筱靖咁識做，就頻頻有大 show接。舊年 8月，筱靖仲被王征喺員工大會公開表揚，讚佢支持國教同反對發牌，對亞視忠心。」
被王征公開表揚的筱靖，亦不諱言接陳啟泰棒：「被王生讚都開心嘅，公司都係想藝人同公司立場一致。（知唔知阿 Ken臨時被飛出台慶主持？）最初嘅通告係佢做主持，至於點解臨時抽起阿 Ken，我就唔知原因。」蔡梓銘亦撐亞視：「自己係新人，人工唔高好正常。」
筱靖與蔡梓銘人工平又聽話，難怪獲王征點名重用。幸好陳啟泰同林韋辰要過檔無綫亦非難事，無綫外事部曾醒明直言︰「 TVB嘅門常開，對合作過嘅藝人無任歡迎。」無綫始終透明度較高，對兩人來說未嘗不是出路。
兩次入亞視
現年 49歲的陳啟泰， 83年曾參加《新秀歌唱大賽》，但入圍後退選，返回加拿大繼續學業。大學畢業後，陳啟泰回流在銀行工作，直至 90年經朋友介紹加入 TVB，正式展開幕前工作。
90-98年 萌芽期
加入 TVB後擔任《香港早晨》及《 K-100》主持。 94年參與拍劇，在《再見亦是老婆》及《刑事偵緝檔案》（左）飾演閒角。
98-09年 高峰期
過檔亞視後，陳啟泰除擔任主持，更在《我和殭屍有個約會》擔任其中一主角。 01年陳啟泰主持的《百萬富翁》最高收視 39點，無綫急搵鄭裕玲主持《一筆 Out消》救亡。
09年至今 低潮期
09年約滿亞視，陳啟泰隨即加入有線電視，可惜兩年以來發展平平，只主持過《我的父親母親》（左）等節目。卒之陳啟泰於 11年重返亞視。
留言列表
