首次進軍大銀幕的李弘基,於《一路好 Rock》中玩勵志,更會揸住結他為癌症病人高歌作出鼓勵,肯定感動死觀眾。 

韓面

李弘基 唱死你

韓國人氣男團 FT Island於上週六( 17日),大軍進駐香港亞洲博覽館開騷。隊中美男主音李弘基更食住上,處男電影《一路好 Rock》( Rockin' on Heaven's Door)將於月尾香港公映。
戲中,李弘基飾演一名經常闖禍的萬人迷偶像,因闖禍被判社會服務令,而要與一班癌症病人組 band走到人生盡頭,簡單啲講,即係唱到對方死為止。
笑中有淚,又有歌聽,暑假攞硬尾彩啦!

《一路好 Rock》上映日期: 8月 31日

 

童星出身的李弘基, 4年前因拍住張根碩及鄭容和一齊合演韓劇《原來是美男》走紅。入行 11年,今年只得 23歲,但已拍過 12套韓劇,但今年先正式跳入影壇,處男戲就係 8月尾在香港上畫的《一路好 Rock》。



已組成 6年嘅 FT Island,於上週六踏入亞洲博覽館開騷。而開騷前一日就舉行擊掌會同港女作近距離接觸。 

搶女星飯碗


為配合美甲書,美男基就化行妝,仲風騷展示美甲圖案,姣過老友張根碩。 

李弘基唔只唱歌、做戲叻,今年仲踩過界撈埋美容。
最近美男基就推出美甲書《李弘基 NAILBOOK》應市。書中除為男士提供美甲資訊外,仲公開自己對美甲嘅獨特設計,連女星飯碗都搶埋。

 

 


慘做阿四戲中美男基被法庭判罰為一間醫院履行社會服務令後,堂堂大明星要幫醫院做打雜,除打掃外更要處理污糟衫,慘過做阿四,條氣梗係唔順。 

醉酒生事美男基扮演恃寵生驕嘅偶像歌手,喺事業高峰時發生醉酒傷人事件,搞到要公開認錯道歉。 

組 band籌款之後醫院因出現財困,義工監督安娜提議美男基同醫院病人一齊組 band叫「不死鳥」,參加電視台歌唱比賽籌款。 

乜人都有但「不死鳥」隊員,有細路女、有慈母,仲有黑社會大佬,全部九唔搭八。韓式勵志片,最初梗係一鑊泡,不過最後一定係成功收場。 

善終大使

《一路好 Rock》以善終醫院為故事背景,講述男主角李弘基飾演一個恃寵生驕的偶像歌手,因一次闖禍,被法庭勒令到一間醫院履行社會服務令,之後以歌會友,更同一班癌症病人組織搖滾樂隊,李弘基好似善終大使咁,陪住班瀕臨死亡的病人一齊走人生最後一程路,聽落都好感人。
唔好以為童星出身的美男基,演戲一定難唔到佢,早前他接受訪問時就謙虛話:「大家以為我演繹偶像歌手角色其實做番自己,就係因為咁,我要盡量做到同自己一啲都唔同,最重要係唔可以令觀眾覺得我乞人憎,呢樣先最難,所以好大壓力。」

隨時爆胎


最近美男基自爆因食拉麵食上癮,搞到暴肥,唔只身形暴脹,連塊面都圓碌碌,被人笑佢做「肥基」。 

講到美男基,當然與他的組合 FT Island分唔開。上週美男基率領 FT Island班巴打大軍來港,除於上週六( 17日)開騷以歌會友外,更於開騷前一日在荃灣愉景新城舉行擊掌會,提起美男基最近肥咗,於日本表演時更曾「爆胎」,美男基笑笑口話:「我覺得這不是大問題,破了便破了,還是要表演,若這次演出再『爆胎』,也不會理太多,繼續表演!」


撰文:何家文 

arrow
arrow
    全站熱搜

    tvb4life 發表在 痞客邦 留言(0) 人氣()