娛樂喧

DaDa失蹤累師妹被玩　錢國偉局 Mika裸拍《夜蒲 3》

寧得罪 CY，莫得罪導演。今年 8月 DaDa（陳靜）突然單方面宣布退出幕前，一句唔撈，蹺起即將開拍的《喜愛夜蒲 3》，導演錢國偉嬲爆，話要向她追討百萬賠償。
DaDa失蹤，錢國偉遂遷怒於其同門師妹 Mika（蕭美卡），據知拍攝當日即場加插過火性愛鏡頭，更要半裸僅貼乳貼演出，搞到佢喊爆。
本刊求證當事人 Mika，回想拍攝情況，她忍不住哭起來：「要我只係貼兩個剪到好細嘅乳貼俾對手揸胸，我係新人真係接受唔到！」

驚到喊

Mika於 12月 2日回應被刪戲一事，因為唔肯拍裸戲而被無理刪戲的她，更一度激動落淚。

22歲的 Mika（蕭美卡）有翻版溫碧霞之稱，憑天使面孔魔鬼身材投身𡃁模界，她在今年中《喜愛夜蒲 3》試鏡脫穎而出，被安排演其中一名夜之女，戲份頗重。電影未開拍，師姐 DaDa因患上中度抑鬱突然宣布退出。導演錢國偉頓失女角損失嚴重，不但向 DaDa所屬公司追討賠償，更對其同門師妹玩針對， Mika便是其中一個犧牲早前錢國偉向外界解釋怒刪 Mika戲份原因：「我刪佢戲係因為佢戲屎！」但事實卻是另一版本。據知 Mika在戲中本來佔數組戲份，亦明白《夜蒲 3》是齣賣弄男女關係的電影，拋胸露背是基本要求，不過錢國偉早在試鏡前，曾拍心口向她表示情慾戲會點到即止，絕對不用裸露身體。

幾乎全裸上陣

至 9月 18日凌晨 5時， Mika抵達中環擺花街拍攝現場後，錢國偉向她表示會與男演員麥德羅演一場情慾戲，對方會撕破其上衣。結果麥德羅把她推在桌球枱上從後作狀施暴，把其背心裙整條撕破不特止，還用舌頭舔她的面、耳和頸等敏感部位。事後錢國偉還嫌未夠盡，要求再加插一場 Mika近乎全裸的鏡頭。
知情者透露：「 DaDa話唔拍，導演對佢班師妹態度唔同晒， Mika同麥德羅拍嗰場肉搏戲好慘呀！現場有十幾廿個幕後，導演唔俾清場， Mika係新人冇經驗，導演玩咁大，臨時仲想加場揸胸戲， Mika喊到收唔到聲。現場睇覺得佢好可憐，做新人一開始就拍呢啲戲。最後因為佢唔肯拍，咪俾導演刪晒之後嘅戲囉！」

今年 8月初 DaDa出席《喜愛夜蒲 3》開鏡拜神，導演錢國偉常伴佢左右，似乎好重視呢位女主角。點知過幾日 DaDa宣布退出娛圈，令錢導演大怒。《蘋果日報》圖片 

9月中 Mika到中環拍攝該場情慾戲，年過 50的麥德羅飾演富商，在夜店桌球枱上把 Mika施暴。拍攝前 Mika心情平靜，還趴在枱上作狀影相。 

微博吐不快

《蘋果日報》圖片 

只有 22歲的 Mika，雖然出過寫真，但未拍過裸露情慾戲。事發後她情緒非常低落，更在微博透露不快心情。

7月脫穎而出

《蘋果日報》圖片 

今年 7月中《夜蒲 3》進行夜蒲女招募， Mika脫穎而出成為其中一員。影大合照時她更被安排站在監製伍健雄及導演錢國偉中間，備受重視。

難向父母交代

除 Mika外，施念慈旗下多位𡃁模亦被針對。早前曾善美（右）被錢國偉大罵其內地登台海報利用《夜蒲》作宣傳；有份拍《夜蒲 3》的 CK郭穎兒（左）又被剝削宣傳機會。《蘋果日報》圖片 

12月 2日 Mika完成工作後，獨自在九龍塘又一城 shopping，本刊記者上前問及《夜蒲 3》被刪戲之事。起初她不願停下回應，幾經游說下，才承認情緒低落至今三個月，回想當日拍攝只能以「變態」兩個字去形容，但作為新人又不敢拒絕導演要求，只好硬住頭皮配合。
眼濕濕的 Mika訪問期間一度落淚：「當時一路拍一路驚，導演之前冇話要拍呢啲，但不停加情慾戲，最尾要我貼兩個細乳貼俾人揸胸，我係新人真係接受唔到，即時衝入廁所喊。最後經理人收到助導通知：『導演 cut晒你啲戲喇，你返得屋企。』（覺唔覺俾人針對？）唔知呀！依家我都好擔心，唔知點面對屋企人，咁激……唔拍又好驚冇晒啲機會。件事對我打擊好大，唔想再重提。」
DaDa十月宣布復出並為之前玩失蹤公開道歉。對於師妹被連累，她表示：「始終都係新人，知佢一定受到打擊，不過公司相信佢藉此發憤圖強，冇人一開始識演戲。」作為她們經理人的施念慈亦回應：「原來突然加戲就話戲屎，既然係咁我都希望 Mika全部戲都 cut晒唔好出，免得影響成套戲。」記者曾致電錢國偉，截稿前仍未聯絡上。

模擬拍攝過程

拍攝當日，製片安排 Mika穿上一條綠色低胸背心短裙。導演錢國偉向她表示會與麥德羅拍一場情慾戲，對方只會撕破她的上半身衣服。 

錢國偉一叫 roll機，麥德羅竟撕破她整條裙，伸出舌頭狂舔她，並把她壓在桌球枱上作狀施暴，當時 Mika身上只剩下胸圍底褲。 

之後錢國偉再提出加戲，要 Mika貼上兩塊細小的乳貼，讓麥德羅從後胸襲。 Mika聽後衝入洗手間狂哭，其經理人出面與錢交涉。 

見 Mika在洗手間內嚎哭不肯就範，錢國偉最後無癮嗌收工，並叫助導通知 Mika餘下的戲份她都不用再拍了。 

撰文：娛樂組
攝影：攝影組