上周六( 14日),蔡少芬一家四口現身尖沙嘴山林道,為有份投資的童裝店剪綵。其間,蔡不時捉實細女信兒隻手和傳媒揮手,認真識做。 

娛樂喧

忽然1周 (960期)轉名避稅慳百萬 蔡少芬半億炒樓

轉名避稅慳百萬 蔡少芬半億炒樓

台慶頒獎禮在爭議聲中落幕,憑膠劇《金枝慾孽貳》有份角逐視后的蔡少芬,最終五強不入,認真失威。
不過蔡少芬懶理賽果,事關她決心做一位有家室的女強人。上周六( 14日),她投資千萬的童裝店正式開幕,出動老公張晉和兩個愛女剪綵,更豪言短期內再泵水,開多幾間分店。
千萬開舖不特止,蔡少芬連月來更豪花三千萬連掃凱旋門及囍滙兩樓。雖然呎價高見三萬,但睇好樓市的蔡少芬則說:「唔係好貴啫!」

 

年前一套《後宮甄嬛傳》,令蔡少芬在內地爆紅,廣告代言及內地商演接唔停。老公張晉亦憑今年初的《一代宗師》鹹魚翻生,內地片約不絕。


千七萬買囍滙12月初,蔡少芬以個人名義,用千七萬買入灣仔囍滙五百多呎的單位。囍滙位於灣仔利東街,鄰近地鐵站,甚有市場潛力,難怪成為近年熱盤。 

凱旋門做行宮今年 9月,蔡少芬就以千二萬購入凱旋門一個四百多呎單位,作為休息的行宮。當時她風騷說:「老公知道我湊完大女返學,有三個鐘喺街,冇理由要返元朗,所以先買嚟休息。」 

避樓市雙辣招

兩公婆賺到盤滿缽滿,為將嚿錢愈滾愈大,即使樓市淡靜如一池死水,更隨時有回落風險,但他們仍冒險入市,三個月內連掃兩樓。「唔好以為 Ada(蔡之洋名)平時食住老公,但其實佢對金錢冇乜概念,唔知點樣發大。所以佢搵到啲錢,都會交晒俾老公投資,由老公話事。張晉話要炒樓, Ada都冇異議。」知情者說。
位於元朗錦綉花園的獨立屋,原本屬蔡少芬和張晉的聯名物業。但今年 8月,蔡突然除名,將物業以低於市場價轉俾老公。兩星期後,蔡少芬就以千二萬買入凱旋門一個實用面積只得 400多呎的單位。看來蔡將錦綉花園的單位轉手俾老公,只是避過「樓市雙辣招」免交雙倍印花稅,以過千萬樓印花稅 7.5%計算,今回兩夫妻慳了成 90萬。
不過避無可避,事關張晉炒癮未竭。本月初,他再游說太太以千七萬買入位於灣仔新樓盤囍滙,購入一個五百多呎細單位,呎價高達三萬元。「佢哋一家四口,邊有可能住咁細單位呀,張晉見灣仔市區租盤因為多外國商人承接,供不應求,所以先買嚟收租,等租客供樓。」知情者說。


蔡少芬一家四口現居元朗錦綉花園獨立屋,她和老公張晉 11年以 700萬購入。不過今年 8月,物業就由聯名變為張晉名下,擺明避印花稅。 

上海連開兩舖

張晉負責炒樓,至於童裝生意則由蔡少芬揸弗。為了幫生意打開知名度,她一早決定搵自己一家四口拍廣告硬照做生招牌,刺激銷售量。起初她與兩位圈外好友合資近七位數,先將童裝放在百貨公司寄賣,小試牛刀。「可能真係明星效應,加埋 Ada成日落嘴頭叫啲教友幫襯,所以啲生意真係愈做愈好。於是 Ada個人再揼多千幾萬出嚟喺尖沙嘴開舖,遲啲仲打算喺上海連開兩舖。」知情者說。
上周六( 14日),蔡少芬一家四口,出席她新舖的開幕儀式。提到童裝生意,蔡少芬滿腹大計,她說:「我諗住搞大佢㗎!遲啲唔單止女仔衫,會出埋男童同親子裝。我都打算再喺香港開新舖同發展內地市場。」
對於近日秘買灣仔囍滙一事,她哈哈笑說:「係呀,我唔可以俾自己做閒人㗎,鍾意嗰個地方嘛,位置好好,咪買囉!(成三萬蚊一呎喎!)唔係好貴啫!我唔係要嚟住㗎,用嚟投資啫,我老公主意嚟㗎!(要俾雙倍印花稅喎?)冇辦法啦,係政府政策。」提到早前將錦綉花園獨立屋由夫妻聯名改為張晉名下,是為避辣招行動,蔡少芬尷尬說:「係呀,冇辦法啦!」


全家返教會 

新店開幕活動後,蔡少芬一家四口就坐車到佐敦泉福堂教會。大大隻的張晉先一手抱住細女,一手拖住大女等𨋢上教會。 

麵包醫肚為搞童裝店開幕活動,蔡少芬當日未有食午餐,惟有返教會前,先買兩個麵包醫肚。 

北上搵辛苦錢張晉和蔡少芬在內地爆紅,北上工作愈來愈多,不過全部是辛苦錢。早前張晉拍戲時整傷右眼,要急縫五針(左圖)。而今年 9月,蔡少芬到西安出席活動時,卻被強逼出席另一商場騷,更被當地主辦商截停正返機場的車,要搵公安相救。 

中高檔童裝

蔡少芬與好友創立的童裝品牌「童夢工場( Motion Picture)」,位於尖沙嘴山林道。雖然舖位面積細小,約一百多呎,由於屬於旺區地舖,所以月租要四萬多。
店內專售歲半至 11歲女童裝,走中高檔路線,一件普通公主型衞衣賣三百多元。不過所有童裝衫只少量生產,而且用料講究。店內亦售賣一些玩具、文具等雜物。現時品牌正對外招募形象大使,獲選的小朋友除享有購物優惠外,還會被安排拍攝廣告相及參與慈善活動。
周一( 16日)記者親自去過店舖,兩位店員服務態度良好,能夠詳細介紹每件童裝。不過由於天雨關係,人流不算太多。記者當日亦訪問過幾個顧客,一名不願開名的女顧客說:「我唔識呢個品牌呀,但覺得啲衫設計幾靚,於是入去睇下,不過覺得價錢偏貴。」


蔡少芬時裝店地舖面積不大,裝修以粉色為主。店內貼滿不少蔡少芬與兩個女兒的合照。 

粉紅色公主裙,裙襬是一層層閃喱士,賣千八蚊,全場最貴。 

撰文:娛樂組 
攝影:攝影組

Ads by Google

arrow
arrow
    全站熱搜

    tvb4life 發表在 痞客邦 留言(0) 人氣()