cover face

林嘉欣 女人要嗲

女人多話題,每個階段每個感受,亮點處處,林嘉欣由做女變了做阿媽,更是百般滋味不吐不快;所以話, women's talk幾時都精采過 men's talk。
生命轉型,一切重新培訓。我嘆做女人難,她笑瞇瞇說:「做女人最叻要識嗲……嗲有好多好處。」
維繫家庭,要比上戰場打硬仗更難,不能獨善其身,大家女人,乘機偷師;所以話, women's thought幾時都精密過 men's thought。


Profile
 


Karena Lam湖水綠色綴緄邊 mohair斗篷大褸$6,990 agnès b. 

Karena Lam
出生日期: 1978年 8月 17日(獅子座) 出生地:加拿大溫哥華 語言:廣東話、普通話、日語及英語。
簡歷:加拿大回台探親,參加歌唱比賽而入行。 18歲,推出唱片。 02年,憑《男人四十》奪香港電影金像獎及台灣金馬獎的「最佳新演員」及「最佳女配角」。 10年,跟導演袁劍偉於加拿大結婚並產女 Kayla。 13年,誕下第二名女兒 Sofie。
主要作品:電影《男人四十》( 01),《異度空間》( 02),《戀之風景》( 03),《怪物》( 05),《詭絲》( 06),《綁架》( 07),《親密》( 08),《魔俠傳之唐吉可德》( 10)。唱片《有點想》( 95)。舞台劇《牆前明月光》( 04),《月亮 7個半》( 06),《野豬》( 11)。
微博: http://weibo.com/linjiaxinkarena 


老公好型
 

現代女人,最鍾意講家庭事業兩兼顧的辛酸,其實,主婦獨留家中看顧小孩,一樣唔容易。「工作可令生活平衡。」當了三年全職母親,林嘉欣終於出山賺外快,這種外快,不是金錢上,是時間上,「日日對住個女,就快除了 BB話,唔再識講大人話了。」老公贊成嗎?「佢知道我鍾意表演,唔想我抑壓或犧牲。」為興趣而工作,投林姍姍旗下,「今時今日,沒可能再要我去博,鍾意至會做。」
有個廣告導演老公,工作時間不穩定,嘉欣就話,忙歸忙,女兒大家有份,總不能坐視不理,「一向以為自己好有耐性,湊別人小朋友就係,湊自己的話,真係想食咗佢;「慶幸老公幫手,去年,讀過明愛的 Triple P正向管教課程,有證書㗎!這都是對方找資料兼報名。」做人阿媽,若有老公當後盾,處理家事自能事半功倍,「大肚時,個個關心自己, BB一出世,所有注意力走晒!我肚皮鬆晒!餵奶搞到損晒!冇人理喎!」要細唔要大,真係好難受。「我好彩,老公成日用幽默方法幫我解困,有日朝早,刷牙時,聽到 BB喊,書本話過,呢個情況,媽媽大腦會收到指示立刻造奶,我件衫濕晒,爸爸即刻話『嘩!媽咪你好性感呀!』
「我即刻大笑,佢總有辦法紓緩我的尷尬,好舒服。」
然而,又家庭又事業,女人只會遇強愈強,「唔好咁強啦!
「做女人最叻要識嗲,間中嗲一嗲,有好多好處,有人攬你安慰你,又會話『唔嬲你喇!』你話幾好。」
返工湊仔身水身汗,好難再發功。「我明白,媽咪辛苦,一見爸爸,怨氣就來,梗係唔開胃……我都學緊,演繹得幾好。」倘若老公「犯規」,她又會回復強勢,「唔准一邊食飯一邊篤電話。」
當初,嘉欣來港發展,首個護膚品廣告便由袁劍偉操刀,十幾年了,斷斷續續再遇至相戀,緣來如此,「我真係估唔到。」對方才華,婚前婚後,吸引力未曾退減,「做夫妻,見盡大家醜態,想關係保鮮,要保持對對方的想像,當你滿以為一切盡在掌握中,其實不然,有時候,望住佢,冷不防一個反應,覺得老公仲好型呀!好鍾意呢種感覺……講到面紅㖭!」


Karena Lam黑色紗網入膊連身裙$8,990 agnès b. 

Karena Lam紫藍色絲絨綴織花邊連身裙(未定價) agnès b. 


玩咗至算
 

做人媽咪,最大快樂莫過於感受到被愛和被需要,「阿妹眼定定望住我,碰我個鼻、摸我塊面、撩我眼睫毛,我沒諗過佢可以玩咁耐,唔厭噃!又有一次,家姐舉起佢個透明粉紅色水樽隔住我大叫『媽媽,你是粉紅色的。』簡單事情,已經令佢哋好奇、震撼,同樣地,好多小事情也令我覺得好大件事、好感動。
「依家,自己至係一個百份百女人,一日未做媽咪,人生一日都未入到戲肉。」
咁嚴重?「大肚感覺好奇妙,我隔住個肚跟 BB傾偈,好似兩個人之間秘密,沒人可以分享得到。」講得浪漫,女兒長大,教養來了,便要回到現實,「自己父母沒太多教養資訊,天生天養,加拿大時,四姐妹各人身上掛住一條縛住鎖匙的鞋帶,預備隨時走失都可以自行返屋企。
「細個想露營,爸爸在屋企門口草地搭個帳幕,幾姐妹入去瞓過夜都沒事,依家,小朋友過條馬路大人都好緊張;「社會進步,生活卻不比以前單純。」希望孩子得到最簡單的快樂,惟有靠自己,少看電視,少篤電話,閒時,看書講故事畫公仔,「我想培養小朋友探索精神。」
自問不是緊張大師怪獸媽咪之輩,「香港個個都講讓孩子贏在起跑線,我唔理咁多,玩咗至算。」回到加拿大,輕鬆寫意的態度,老人家最睇唔過眼。「屋企門口有幾盤盆栽盛滿雨水,我個女玩水,外公大叫「污糟呀!」有幾污糟啫?最多沖個涼換件衫,沒問題啦!女係我嘅,我話事。
「門外唔小心將食物跌落地,三秒內可以食番,屋內的話,更加沒所謂,傭人日日洗地,細菌當補品。」妙!
輪到返學,嘉欣打算安排個女重讀 K1,「佢係細女(年尾出生),重讀一年,有充足時間去適應學校生活。」不止小孩子需要適應,家長亦然,尤其是明星家長,「第一日開學,孭住阿妹湊家姐返學校,有個爸爸閃來閃去係咁影我相,我就話:『你想影相話我知嘛!大家一齊影,淨係影我一個唔好玩。』
「我哋日日送返學,有個媽咪話『你哋真好……』跟住講其他 artist,我截住佢『大家風格唔同。』
「依家,真係學習放低自己身段,投入新生活。」


二人為藝術節合作舞台劇《野豬》,是她「為興趣而做」的工作之一。 

細女出世,嘉欣自動放相上微博,「有咗小朋友,生活也豐富起來,這對演戲很有幫助。」三句不離老本行。 

為香港及台灣 SPCA拍微電影,宣揚愛護動物,「依家,工作以廣告和短片為主,出 trip亦唔會多過兩星期。」


後記
 


Karena Lam杏色麻質 trench coat紅色格仔短裙(均未定價)both Carven 

放低身份,我相信,嘉欣正努力做好。
她應攝影師要求跳躍(就係呢個甫士),叉錯腳跣低了,林小姐自己笑自己,笑得最大聲,倒是嚇壞了一班助手公關編輯。
講到跟老公一齊教女,在家中,她負責講普通話,老公講廣東話,但父女溝通不及媽咪多,以致「阿女講廣東話好似舒淇,歪歪哋。」
拿自己拿老公拿女兒開玩笑,今日,我唔覺得在訪問林嘉欣,倒似跟一位家長對談就真。


撰文:伍淑嫻 
形象:黃健華 
攝影: B Wong@Secret 9 
化妝: Will Wong 
髮型: Hin Wan@IL COLPO 
鳴謝: agnès b.

arrow
arrow
    全站熱搜

    tvb4life 發表在 痞客邦 留言(0) 人氣()