明星靚相大分享☆

最近，回復自由身的Kathy，得無綫招手簽作旗下藝人，更獲無綫高層樂易玲親自會見洽談，她對此事直認不諱：「係，不過我唔考慮簽約，因為我唔係專業藝人，我只係模特兒。之前幫TVB做節目主持只係客串性質，如果要我擔正拍劇，我驚有收視負擔，自己唔習慣又驚NG累人遲收工，好大壓力。」Kathy坦言與樂易玲溝通過後，很感激對方對她的欣賞：「佢問我想唔想拍劇，我答佢『我唔得架』，之後同佢講返自己嘅弱點，又擔心自己冇能力handle拍劇嘅工作，總之我唔會踩去冇信心嘅範疇。」Kathy謂婉拒樂易玲好意後，對方亦理解，雙方依然保持良好關係。

錯失黃金機會，Kathy並未後悔，亦無懼做孤兒仔，全因她認為現在已過了賺錢衝刺期，現在樂於由自己掌握工作時間表，從而建立和保護自己的形象。她不諱言開始揀Job做：「揀工作做，可以幫助保持形象新鮮感，譬如之前忙做飲食節目主持，跟住出飲食書，之後會多啲安排模特兒工作，所以對工作有要求。」

入行多年，獲Kathy承認的兩個男友，只有前任男友杜德偉及現任法藉男友Julien Lepeu。去年年中，Julien被拍得與女歌手張苡澂密會，以致曾盛傳兩人有意拉埋天窗的好消息不了了之。

談到婚期，工作和經濟能力皆理想的Kathy就表示暫無計劃，更開玩笑說：「結婚係兩個人嘅互動，可能佢覺得我太完美，促使佢喺工作上要再努力做好啲啦！總之暫時未有結婚計劃。」Kathy更強調現正盤算推出美容書，但因懶惰又怕麻煩，令找贊助無從入手，唯有「等運到」。

一直被外界指牙尖嘴利的Kathy，深明作為公眾人物，不時會被問到事不關己的新聞，如早前被指她為維護胞妹而暗踩佘詩曼，她對被斷章取義而大感無奈：「因為當日個記者問我覺得蛇點，蛇羹好唔好食，我就同佢講好腥囉，因為我細個左耳發炎，外公會拎啲蛇皮畀我敷耳，因為咁我自細就驚咗蛇腥味，不過我當日咁答，就被寫成咁。」Kathy對於被曲解表現無奈，但也明白在娛樂圈生存一定要看透。

Kathy給人「寸寸貢」的形象，但其實她也很有心做慈善工作，以往更隨華光功德會到青海甘肅，出錢出力助當地居民籌款興建集雨水窖。早前，Kathy更仿傚余慕蓮，捐錢到廣西，以爹哋的名義興辦學校，助大陸的貧困學童上學，為此，Kathy更計劃明年三月與父親到當地探訪，她說：「學校已經落成，因為依家天氣凍，驚爹哋舟車勞頓太辛苦，等明年春天，天氣暖啲先去。」

採訪：名人組

攝影：劉智源