峰So玄理十字面相上集蘇民峰 @ 明星靚相大分享☆

邊個話「人不可以貌相」，雖然現今咁多人整容，但識睇相，都可以知道新相識朋友底蘊，所以一連兩期教大家「十字面相」。

甲字面

特徵：前額闊而下巴又尖又細，但鼻直而長。
呢類人腦力強但體質差。思想敏銳，從事要用腦度橋工作特別出色，做靠體力勞動工就差。運氣方面， 30 歲前運氣最佳， 31 歲至 50 歲平平穩穩， 50 歲後運氣開始減退。如果鼻形生得歪或短小，則中年以後運氣開始減退，晚年孤獨亦較窮。

圓字面

特徵：望落塊面似一個圓餅咁。
呢類人處事極圓滑，最適宜做公關工作，對用錢及處理人事關係都掂，做 PR 一流，但就唔做死板工作。個人運氣呢， 30 歲前及 50 歲後較好，中年運氣則平平。但女人有咁面形，婚姻較差，不能享夫福。

同字面

特徵：方中帶圓而略闊，頭形較厚。
呢種人精力過人，體格強壯較健康，做實事求是，家庭觀念重，性格固執，唔鍾意聽人支配。運氣方面，少年平穩，中年以後突飛猛進，晚年更佳，多為大富之局。

由字面

特徵：上額尖小，顴及鼻唔會特別高聳橫張，但下巴肥大而肉厚。
佢特別頑愚固執，鍾意俾人奉承，好在做起事來親力親為，對屋企人及朋友好好。運氣方面， 30 歲前孤單貧窮。如果鼻顴生得好則中年以後較好，晚年則大多有一定財富，起碼亦可晚年安樂。

申字面

特徵：似鵝蛋面形，上額跟下巴略尖而顴高鼻直。
呢類人性格較為衝動，唔容易與人長久相處。運氣方面，少年平穩，到中年大都有所成績，下巴骨如果向前則晚年運氣亦好。

So Time

讀者 Ling 問：本人姓名胡 × 玲，出生日期為 1973 年新曆 11 月 × 日，舊曆十月 × 日，晚上 10 時正。
1. 感情運如何？因為多次拍拖都是失敗收場，何時有真命天子出現？最後能否嫁得出？
2. 一生的財運如何？偏財運如何？
3. 我何時行大運呢？需否改名？那些數字對我有利？
4. 現時做飲食侍應及酒店餐飲部兼職，我其實適合做邊類工作？
5. 一生中有否貴人幫助？有否機會生子女？

蘇師傅答：你命格屬「水」，要「木」、「火」，「金冷水寒」，五行又欠「火」，命格都幾差，做人冇安全感，婚姻易出現問題， 28 歲起行剋夫運至 48 歲，最適宜配細你 1 年以下，或大你 9 年以上異性。而你大運係由 28 行到 48 歲， 2010 年就正式入運，但初入運時都會較混亂，自己要留意一下， 2010 至 2015 年亦行做生意運，有興趣可詳細諗一諗。偏財呢，就真係唔使諗，你五行欠財，一生財來財去，俾心機依正途賺錢，唔好去諗賭錢或搵快錢啦。改名都唔會有太大幫助，但要改就揀屬「木」字啦，而「 2 」及「 7 」字都對你較有利。你子女緣較弱，一生中冇貴人相助，自己積極仲好啦！

讀者想蘇師傅幫你算命，可連同出生日期（新曆）寄至本刊編輯部，註明《峰 So 玄理》收，蘇師傅每期會抽出一位幸運讀者，為佢解答。