任達華憑《歲月神偷》首奪金像影帝,上台攞獎不忘多謝家人,「我好多謝我嘅家人,尤其係我兩個女朋友,琦琦同埋個細女朋友(女兒晴佳Ella)。」

任達華夫婦只有晴佳一粒女,平日當正她是小公主,家中有過百個Barbie公仔與她作伴,又為她安排唱歌跳舞彈琴興趣班,不怕女兒被寵壞,全靠琦琦的獨門秘方:「我同華仔都會多同佢溝通,向佢灌輸分享嘅可貴;又會帶佢去唔同地方體驗同鍛煉佢嘅獨立性;仲會藉設計提高佢嘅創意,唔怕佢會沾染公主性格。」

琦琦喜歡買Polo牌子的衫,她工作時為晴佳穿上同款的冷衫,成了她們的母女裝合照。

任晴佳是任達華及琦琦的掌上明珠,琦琦刻意減少行騷照顧女兒,而華仔則努力賺錢,給女兒最好的生活。

華仔得獎後,把「影帝」獎座送給「細女朋友」晴佳,與女兒的照片「打成一片」。

創意故事冧爹哋

得知爹哋「封帝」,晴佳異常興奮,琦琦話:「華仔返屋企第一時間將個獎放喺Ella牀頭的Barbie公仔旁邊,Ella睇住個獎,話獎座個女神條裙好短好靚,自己都想要一條。」

翌日晴佳更親手畫一本《晴晴公主故事畫冊》送給爹哋做賀禮,故事講晴晴公主日常生活的趣事,結局係假如不刷牙及食糖,就會無牙,仲畫咗個無牙公主,顯示出晴佳的鬼馬一面。華仔一副冧樣稱:「呢份係最有心機同最開心收到嘅禮物!」

工作密麻麻的華仔,好重視親子時間,一有時間就陪個女玩餐飽。「佢哋成日一齊游水,又一齊在屋企樓下跑步,Ella最鍾意同爹哋比賽潛水鬥耐同跑步鬥快,華仔次次都讓個女贏,o氹到個女好開心!」琦琦還指有時兩父女會鬥講上海話,華仔會專登講錯,叫Ella扮小老師教他,令女兒有更深刻印象。

合家同行萬里路

琦琦與華仔對晴佳奉行不打不罵的教育原則,華仔笑說:「晴佳好乖好講道理,我幾忙都好,都會抽時間同佢食飯傾偈,增強溝通。」

兩父女會在飯枱上傳授人生道理,媽咪琦琦就用信仰教晴佳正確價值觀,「星期日我哋會去教堂,我教佢畀粒糖人,媽咪可以再畀過一粒你,佢慢慢識得分享嘅道理。」

華仔兩夫婦最喜歡一家三口去旅行,晴佳小小年紀已經遊遍大半個地球,足迹遍布中日台法英和奧地利等,「小朋友要畀佢睇多啲個世界,培養佢廣闊嘅胸襟。」

不過,有次去北京騎馬,就嚇到琦琦至今仍有餘悸。「舊年去北京,Ella喺個果園忍唔住試騎馬,點知落馬時畀隻馬咬咗一啖手臂,成個牙齒印見到晒,仲流血添!」

當時琦琦見到個女傷成咁好心痛,難得晴佳仲識忍痛安慰媽咪,「佢眼濕濕同我講:『我都唔痛唔驚,你都唔好驚啦!』佢嗰時得四歲咋,打針時仲冇喊過添!」連醫生都讚她勇敢,絕非公主病之輩可表現出來的堅強個性。

剛過去的復活節假期,華仔一家去北海道度假,晴佳第一次玩雪,由媽媽拍照留念!

晴佳3歲時與父母到日本牧場親近大自然,並學爹哋充當攝影師。

粉紅帳篷講故事

除了爹哋媽咪,晴佳最愛的就是Barbie公仔,家中的Barbie收藏量過百,就連書包mp3都印有個Barbie嘜頭。「我好少買公仔畀佢,大部分都是朋友送的,佢仲鍾意喺上海Barbie旗艦店,為公仔設計衫仔,每次去上海佢都會好認真咁design,有啲衫都幾靚!」琦琦透露,Ella還遺傳了她時裝觸覺的因子,喜愛看時裝雜誌,有時會為家中的Barbie改變形象,逐個剪髮換髮型。

晴佳興趣多多,唱歌跳舞彈琴外,又會畫畫同游水,每個周末的活動都排得密麻麻,琦琦話:「自從晴佳出世後,我就減少工作,專心湊女,屋企個廳掛咗個粉紅色帳篷,係歐陽妙芝送嘅,Ella好鍾意,一放學就拖住我匿入去,佢讀吓古仔書我聽,我又講吓古仔佢聽,我同佢都好享受呢一刻。」

琦琦最後寄語:「晴佳個名代表開心開朗,Ella係個心地好,好單純的女仔,我同華仔都想佢每日開開心心!」

家中的公主帳篷,是晴佳的秘密天地,抱住Barbie聽媽媽講故事,是晴佳放學後的第一件事!

琦琦每天送晴佳返學,佢話一啲都唔攰,仲好享受同愛女邊行邊傾偈!

Oxford Reading Tree系列的故事書是晴佳至愛,講述Kipper和家人生活趣事,內裏所用的英文淺白,可幫晴佳打好英文根底。

 

任達華琦琦夫婦教女秘招 獎座放女兒床頭

揭任達華琦琦夫婦教女秘招
任達華憑《歲月神偷》首奪金像影帝,上台拿獎不忘多謝家人,“我好多謝我的家人,尤其是我兩個女朋友,琦琦和小女朋友(女兒晴佳Ella)。”

任達華夫婦只有晴佳一個女兒,平日當她是小公主,家中有過百個Barbie公仔與她作伴,又爲她安排唱歌跳舞彈琴興趣班,不怕女兒被寵壞,全靠琦琦的獨門秘方:“我同任達華都會多同她溝通,向她灌輸分享的可貴;又會帶她去不同地方體驗同鍛煉她的獨立性;還會借設計提高她的創意,不怕她會沾染公主性格。”

arrow
arrow
    全站熱搜

    stacylife 發表在 痞客邦 留言(0) 人氣()