Nokia N900 徐子珊分身有術 @ 明星靚相大分享☆

阿Kate（徐子珊）又唱歌、又上電視、仲要拍廣告、出Show，真係聲色藝俱全，而剛剛推出的Nokia N900在多工作業（Multi-tasking）方面亦都好耍家，一部機可以打Flash Game、睇片、仲可以玩微博、收發Email，一樣分身有術。

去年發表的Nokia N900，因為使用了Maemo這個全新的作業系統而一鳴驚人，搞到水貨炒貴幾千蚊都有人照入。事隔幾個月，行貨N900終於見街，當然唔止得個中文介面咁簡單，曾經心動的Fans們值得再次留意。

$4,998 （5月1日推出）

N900使用電阻式屏幕，用Stylus操作會比較方便。

機背有500萬像素蔡司鏡頭，而且鏡頭框同樣可以剔高作機座。

多工作業反應暢順

早於N900發表時，已經有多段關於佢支援多工作業的片段流出，今次使用的Maemo作業系統，屬於Linux平台，有別於其他Nokia手機，不過用落都唔難適應。介面主要分為「主畫面」、「Dashboard」同「功能表」，在介面空白地方篤一下就可進行切換。主畫面跟Android手機有啲似，設有橫向滑動的分頁，方便擺放Widgets；Dashboard就顯示正在運行的程式。小記試用時，連開十幾個Apps都不太影響操作流暢度，即使將播放中的YouTube短片縮小後，仍會見到它在小視窗中繼續播放，足以證明其多工作業的能力。

內置32GB記憶體，支援最高16GB記憶卡，放幾隻DVD落N900睇都夠位。

配備600MHz的A8處理器，並預留1GB記憶體，所以連開到11個Apps都咁順，抵讚！

用家可以事先設定好多個不同的IM帳戶，而視像鏡頭更加可以在使用Skype時當WebCam用。

支援Flash 玩FB Game

N900採用側滑蓋設計，有咗鍵盤打字更快，行貨版N900提供了中文外掛程式，有齊中文介面、倉頡、速成、手寫及筆畫輸入法，而且手機的Maemo瀏覽器全面支援Flash 9.4及AJAX，小記試開Restaurant City同埋Happy Farm都玩到，啱晒Facebook Game不離手的用家。雖然Maemo係一個新作業系統，但只要去「應用程式管理」介面或者行貨先有的Ovi Store「單撈」，一樣可以搵到大把免費好玩Apps同手機內容。