宣萱雖不是無綫親生女，但近年仍努力拍劇搵銀，結果搞到積勞成疾，上月初要入院「割瘤」，近排更要全面停工，幸好養病期間，南非籍獸醫男友Ruan Bester經常陪她周圍去晒恩愛；如果男友唔得閒，她一樣自得其樂。
週一（26日），本刊就發現她獨自在中環行街買衫同化妝品扮靚，過住少奶奶般的生活，看來39歲的她終於蜜運成功有「嫁」期喇。
今年特別多中女演員回巢，繼關詠荷、張可頤和蔡少芬後，宣萱算是最把炮的一個，因為劇集《掌上明珠》於5月3日播出後，另一重頭劇《刑警2010》，早前又舉行記者會大肆宣傳，她在TVB依然有啲地位。
割5粒瘤
工作雖長有長做，不過她的身體就認真麻麻，早前她在「微博」中透露自己做了手術，她說：「手腕生了1個瘤，頭上也有4粒，一次全部Byebye了。」之後更於「微博」騷出成吋長的傷口相，並表示已好番好多，但如果可以，都想多一個禮拜至一個月不等。 
報告進展 早前宣萱在「微博」中透露自己做了手術，割了5粒瘤，最近再將成吋長的傷口相上載，又幾嚇人喎。 
難怪近排不見她開工之餘，經常被傳媒拍到她與男友Ruan高調拍拖，唔係行街，就係食飯。早前兩人更到日本旅行，Ruan還開心的將他們的甜蜜靚相放在 Facebook與友人分享，看來二人關係已十分穩定，這次似是預支蜜月。
睇衫扮靚
回港後，因Ruan仍要返荃灣的獸醫診所工作，所以宣萱一得閒無所事事，惟有自己去行街解悶。週一，她在置地廣場現身，雖然仍在休養期間，不過略施脂粉的她，算幾精神，買完蛋糕外賣，又急急腳去睇衫。
她經過商場地庫的時裝店Juicy Couture時，看見廚窗公仔着住的運動外套非常感興趣，於是唔理Sales睥住，即時要摸吓件衫的質地。研究完一輪，她才入舖頭內選購。她揸着件衫前睇後睇，然後又放上身量度，可惜最後都係得個「睇」字，冇買咗便離開。 
精明消費 宣萱入舖頭後，即時摸吓公仔件外套嘅質地，覺得幾好後，再去揀嚟睇，佢買嘢又幾醒喎。 
大舉入貨 雖然宣萱最後都冇買到件衫，但買化妝品就絕不留手，在化妝Counter一陣間，已掃成千蚊貨。
之後她行到老遠的長江大廈停車場取車，只見她平時揸開的黑色七人車不見了，換上一架近百萬的平治房車。據知，原本的七人車，她已轉贈男友Ruan作返工代步之用，認真體貼。 
病後初癒 Shopping完，她行咗成5分鐘到老遠的長江大廈停車場揸車打道回府，睇落佢做完手術後精神唔錯。 
豪女友 平時揸開黑色七人車，但當日卻以平治房車代步，據知，該七人車已轉贈男友，認真豪。
體貼男友
現階段Ruan雖然有份穩定職業，但講搵錢邊夠女友多，有指他連買杯二、三十蚊的咖啡都要女友俾錢。冇計啦，去年底他與賭王孫女何家華於澳門合資的獸醫診所，因股權糾紛對簿公堂，可能因為咁樣，乜都要慳住使，睇怕二人真係要結婚，都要一切從簡，不過以男友有咁多是非，宣萱對他都有讚冇彈，就算真係要宣萱貼錢結婚，佢都冇所謂，大家喺埋一齊開心咪得囉。 
保持低調 年初宣萱與男友Ruan齊齊睇首映，但最初宣萱不欲影合照，難得Ruan又唔介意，她也唯有接受。 
首演奸角 宣萱的新劇《掌上明珠》於5月3日播出，自入無綫17年，首次破天荒演奸角，真係要拭目以待。
崇洋女星
宣萱之前的男友都是中國人，不過今次突然轉口味識鬼佬，其實除了她之外，圈中都有不少「港女」戀上老外，大多是專業人士添。 
張曼玉
與德籍建築師男友Ole Scheeren相戀3年，男友雖長駐北京工作，但她亦甘願做「跟得女友」，隨男友往北京定居，非常體貼。 
梁詠琪
與法籍設計師男友Sly拍拖3年多，雖然她曾因工作太忙，遭男友設訴冇時間見面，不過二人感情依然穩定，更不排除即興結婚。 
周汶錡
與擔任首飾品牌高層的法籍男友Julien Lepeu拍拖近5年，雖然男友有「偷啜」前科，不過周汶錡卻給予百分百信任，早前更公開暗示佳期近。
混帳男友
宣萱自爆這段「寵物情緣」始於4年前，當年宣萱跟Ruan邂逅的獸醫診所是位於勝利道的「勝利獸醫診所」。原來Ruan由南非來港後便在那裏任職，幾個月後Ruan跟合資的朋友不歡而散，主動邀請賭王孫女何家華合資於澳門再開獸醫診所。 
「皇家獸醫中心」
有指08年初，何家華投資500萬開「皇家獸醫中心」，當時傾好Ruan會夾25％，豈料去律師樓簽紙前，Ruan突然改變主意想佔50％，又表示自己冇錢。當時雙方協議，Ruan頭兩年唔收人工當入股，大家同意才開業。
開業不足半年，何家華覺得帳目有問題，問會計師攞條數睇，點知俾Ruan阻止。之後Ruan話借錢買起晒何家華的股份，後來借唔到錢就發動護士罷工，逼何家華俾股權他，結果何家華被逼關閉「皇家獸醫中心」，查帳時發覺有異，懷疑Ruan利用診所的錢替自己交租，何家華因而入稟法庭追討賠償，但最後雙方庭外和解。
Ruan除了做生意惹糾紛外，更被人向「香港獸醫管理局」投訴，指他虛報專業會員資格，因Ruan向外宣稱取得「英國皇家獸醫學院院士」（MRCVS），事實上他沒此資格，據知，當時他曾被「香港獸醫管理局」調查。 
J與 Ruan合作開獸醫中心的何家華，去年年底曾在雜誌數臭Ruan，不過宣萱卻懶理。
留言列表
