明星靚相大分享☆

地點：尖沙嘴／時間：4月尾

林莉自從走番入娛樂圈做模特兒之後，即時工作急升，水漲就梗係船高嘅喇，早排辣妹先見到佢一個人行街街，喺尖沙嘴瘋狂Shopping。

當日辣妹見林莉一個人行咗入間飾物店到左揀右揀，辣妹忍唔住走埋去八吓林莉究竟揀乜嘢揀到咁入神，原來佢睇緊手錶，仲係諗住買嘢送俾媽咪作禮物，不過雖則話林莉喺模特兒界愈做愈好發財升呢咋，但其實佢都好慳家，唔會亂咁使錢。

第二站辣妹發現林莉走咗去買衫，不過見佢試條褲試咗鬼咁耐，以為佢嘅慳家本色又發作，但係點知原來係林莉高得滯，試勻都冇條褲啱佢身形，認真搞笑。辣妹後來聽番林莉講，原來佢自小已長得好高，成日買褲都吊晒腳，好唔容易先買到合適嘅褲，所以咪話囉，有時做邊行都係整定嘅，生到咁高，做模特兒日日有又靚又合身嘅衫着，唔做咪盞搵嚟搞！


林莉成個星 Look咁出巡尖沙嘴，行唔夠幾步已經惹嚟全城男人嘅注目。


林莉為咗買隻手錶送俾媽咪，左揀右揀，終於買咗隻白色靚錶，呢個孝順女真抵錫。


林莉睇首飾扮靚，一啲都唔馬虎，揀到最啱心水先肯俾錢，係喇，做個精明消費者嘛。




林莉由細到大成功買到褲嘅經驗少之又少，睇佢個表情，就知佢心知不妙。


女仔生得高原來都唔係十分着數，睇林莉買褲就知，腳長冇條褲着，真係試到日落西山，睇見佢都累呀。