記得幾年前第一集《Lost Planet》以韓星李秉憲做主角，以第三身射擊模式上雪山打雪賊，到《Lost Planet 2》就實行大變革，玩四人組隊打超巨大嘅怪物，玩法似足「芒亨」，難怪會被稱為「未來版芒亨」。
以遊戲畫面同打怪物時嘅刺激度嚟計，《LP2》比「芒亨」有過之而無不及，可以用盡各式現代武器向幾架巴士咁大嘅怪物開火，同朋友夾檔玩前後掩護就最爽！ 連剛剛推出嘅PSP大作《Metal Gear Solid Peace Walker》都要同「芒亨」玩Crossover，《Lost Planet 2》呢隻「未來版芒亨」當然唔例外，PS3版會加入《Monster Hunter》嘅火龍裝，而Capcom都冇偏心，Xbox 360版就加入招牌作《Gears of War》嘅Marcus同Dom服飾；除此之外，兩個平台都有追加Capcom自家王牌作《Biohazard 5》嘅Wesker服飾，以及《Dead Rising》的Frank服飾，睇嚟Game界都會繼續大吹Crossover風。 講到最吸引嘅地方，當然係遊戲中出現嘅巨大怪物，正如大家玩「芒亨」都會先留意各式魔龍一樣，《Lost Planet 2》所出現嘅怪物都被稱為Akrid（AK），係棲息在「EDN-3rd」行星上的原生物，不過形態方面就有好大差別，由細到好似一排飛天魚骨，到會不斷噴出小型AK的食人花；甚至成架航空母艦咁大嘅Red Eye都有，愈打愈大。呢隻超大嘅Red Eye非常難打，會又咬又撞玩家駕駛嘅戰車，惟有使用武裝車上的超大口徑長炮攻擊佢隻紅眼，至於其他怪物嘅打法都差唔多，總之對準佢哋身上發紅光嘅地方開火就得。 正如「芒亨」一樣，《Lost Planet 2》嘅多人模式同樣受歡迎，最多仲支援到16人對戰，而Capcom之前都已經推出過兩個多人模式試玩版畀玩家下載。無論係連線打怪物或者互毆時，都要識得利用地勢做掩護，再決定點樣攻擊，而且可以走去Data Post附近狂按按鈕啟動雷達地圖，不過期間完全唔郁得兼冇晒防守力，所以記住搵隊友幫手睇水。 類 型：射擊 開 發：Capcom 平 台：Xbox 360、PS3 推出日期：5月14日 售 價：$318 查詢：2366 1001
連《Biohazard 5》中嘅反派Wesker都有得在《LP2》上一展身手。
Xbox 360版獨佔嘅《Gears of War》服飾。
好熟口面？佢咪係《Dead Rising》嘅Frank囉！
角色服裝大兜亂
PS3版就可以下載《Monster Hunter》嘅火龍裝。
怪物設計得好有霸氣，畫面水準亦遠勝前作。
瞄準怪物身上嘅紅色地方嚟打就最有效。
瞄準紅點狂轟
呢啲好似魚骨嘅小型AK，俯衝落嚟攻擊時都幾得人驚。
多人模式時最緊要識走位，亦要掌握空中Reload同在移動中補血嘅技巧。
遊戲設有水底版圖，不過角色唔識游水，都可以在水中行走自如。
16人上網互揪
遊戲檔案
留言列表
