自訪問孫耀威的日子定下來後，每次看他的資料、想訪問問題時，腦海便會響起〈愛的故事（下集）—但願他珍惜你〉：「我但願他珍惜你，這顆心不忍看你落淚時，一串串令心酸酸，仍舊仍舊眷戀……」十幾年前的歌，仍然悅耳。

因為四大唱片公司與無綫電視的糾紛，看《勁歌金曲》已沒有人餵我聽四大唱片公司歌星的歌，得要自行上YouTube聽老孫新歌。情況如像，當沒有人為自己鋪平坦筆直的柏油路時，為到達終點，也得自食其力，那怕要自行搬石塊。

曾在中國內地和台灣飄泊多年，連老孫也叫自己做「冇腳嘅雀仔」。三年前，他主動扎根香港。

「嗰七年，三個月喺橫店，三個月喺無錫，三個月喺蘇州，三個月喺北京，個人好似冇根咁，個心好孤獨，好冇安全感，我覺得趁我仲後生，要返一返嚟香港，陪吓屋企人、住喺屋企，尋找番自己生活先。譬如今日早收工，蘭桂坊happy hour囉！今日突然間訪問cancel，同阿媽飲茶喇。甚至乎要拍拖，你交邊一度地方女朋友吖？你教我！」

世界無限大，他想尋找到東西，他該已找到。連沒有打算找的，也找到了。這隻叫老孫的雀仔，不止長了一對腳，相信牠會在此築巢，成家立室，開枝散葉……

神的意旨

孫耀威於一九九三年出道，這位香港小伙子，在四大天王紅到發紫之時，由台灣回流香港，為樂壇炮製另一口味菜式。〈我知道你在等我〉、〈愛的故事（上集）〉，堪稱七十後的經典，與真正台灣產品林志穎分庭抗禮。

「我同小志真係撼到七彩，我喺台灣出道，小志已經出道咗兩年，嗰陣佢好紅，我哋硬撼到爆炸。每次做電視節目就幾百人對幾百人，好似啲社團咁嘅氣勢，我哋架車一出，我啲fans就拍晒玻璃，另外一群人就怒目而視。

「我太過care每一個表演，啲現場音響又屎，好差嘅音響我又同佢鬥大聲；夜晚TVB嘅騷，或者去大陸賺錢嘅騷，見得到嘅騷，見唔到嘅騷，每個星期可能唱十幾廿次，其實係好傷！」

「一出道時我已經好鍾意做戲，但台灣公司老闆唔畀，約滿時我咪發癲咁狂接囉！」

當滿約台灣的唱片公司後，他瘋狂接拍台灣和內地的劇集與電影，過了近八年的飄泊歲月。

「自己唱咗七年歌拍過咁多MV，應該對鏡頭唔陌生，演技應該OK，一拍先知原來啲演技咁鬼屎，狂NG，發緊夢咁！我係咁同自己講：『你係個新人，唔好揀戲，又有得賺錢，何樂而不為？咩垃圾戲你都照接啦！』嗰時我都接咗幾多垃圾戲！

「我過去十幾年做娛樂圈好搞笑，我頭六、七年就全唱歌，後嗰六、七年就全拍嘢，○七年返嚟就全唱歌。」選擇了唱歌，老孫的聲帶卻在○八年出血，鼻裏長出瘤來，歌唱事業被迫暫停。依醫生吩咐，是先停下來兩年，再看聲帶狀況如何。一年多後，老孫奇迹康復，成為現在大家看到和聽到的他，早前推出了全創作新專輯。

「冇嗰個病絕對冇呢張大碟，可能上帝要我出呢張唱片，可能特登整到我要休息，搵番我唔見咗嗰把聲。有陣時有啲嘢要調番轉講，嗰陣時唱片公司又未必有咁嘅膽量，有咁嘅吉士放晒手畀孫耀威一個人去做。」

「我好掛住內地做嘢嘅生活，同埋我啲戲癮係痕到爆炸。放低大陸演戲嘅事業，唔係一個容易決定，唔係兒戲，要儲錢娶老婆o架嘛！」

看香港娛樂圈

有云每三年一個代溝，縱橫中港台十七年的老孫，穿梭往來多個年代，歷盡朝代變遷，寒暑交替。

「以前偶像都有自己王國，有自己fans；以前明星高高在上，好似唔需要友情，係國王嚟，明星好有星味。依家我哋日日喺度玩blog，大家都知道我哋做緊咩，好似朋友。」

時移世易，娛樂圈的生態和老孫第一次回流返港時已不盡相同。

「我話拎隻碟去美國做mastering，多幾萬蚊咋嘛，以前都唔係錢嚟嘅！我哋唱片公司日日餵我哋食貴嘢，都食幾萬蚊啦！依家唔係嗰支歌仔，全部揸頸就命。

「我哋唔可以眷戀以前，唔可以因為我哋以前風光就繼續排外，我哋只會變成井底之蛙，所以香港藝人要跳出呢個井，放眼呢個世界，因為我覺得我哋有嘅特質係其他地方冇，我哋嘅轉數快，我哋演戲方式係最接近國際，不慍不火。你見內地演員有啲做得好，但佢哋好over。」

隸屬環球唱片旗下正東唱片的老孫，新唱片推出，少了一個平台宣傳。

「香港喺呢幾年，有太多黨派，卡拉OK唱咗呢間唔可以唱呢間，電視台有呢間唔可以有呢間，你唔覺得好可笑咩？香港豆膶咁嘅地方，娛樂圈已經走緊下坡，點解仲要玩啲咁嘢？大家可唔可以將私心撇除，宏觀啲睇吓個樂壇？大家除咗喺呢塊地掘金，仲有義務令佢唔會變成爛地。」

無新聞是好新聞

罵我馬後炮也好，甚麼都好，老孫跟我做訪問時，常常笑容滿面，聲線跳躍，如果不是事業愛情兩得意，很難有這種風騷。男人直覺和個人愛情經驗告訴我，他和陳美詩就是一對，感情還不錯。此訪問於傳媒撞破他和女友遊台灣之前完成，且看他如何說愛情。

「周圍咁飄泊就一定搵唔到一個穩定嘅，返嚟香港係咪為咗要搵個固定嘅？當初絕對冇諗過呢個原因。

「有個女朋友等如你可以報告你發生咗咩事，聽吓人哋錫你嗰把聲，搵番你自己存在，所以我決定咗返嚟就係諗住咁樣。

舊愛應采兒已嫁陳小春，老孫也和陳美詩愛得甜蜜動L，老土一點說，就是「舊的不去，新的不來」，大家開心。

「其實我從來都冇公開過，我覺得公開好無謂，公開咗跟住失敗嘅時候又一大堆新聞，尷尷尬尬咁，男仔都冇乜所謂，始終中國人思想對女仔唔係好公平，失敗咗一次，佢好似又冇咁矜貴。除非有日真係搵到真命天女結婚，我就好樂意話畀大家知，呢段感情已經開花結果。

「新聞報道就希望有新嘢，你未拍拖時咩為之新嘢？就係你公開承認你哋拍拖嘞！當你公開咗拍拖咩係news？出事嘞，邊個紅杏出牆，邊個偷食，邊個戲假情真，呢啲就係新聞。所以我去到結婚嗰刻我會話畀大家知。」陳小姐，無論你在笑、在怕也好，我替他派幾粒定心丸給你。

「就算香港人想唔想我留低都好，我自己都想留低。頭先做做吓訪問，叫菠蘿油西多士嚟食，去第度做嘢你邊搵到呢啲？如果要我放棄香港，我諗我做唔到，我希望嚟緊事業可以兼顧到唱歌，演戲，香港市場同其他市場，我希望可以盡我嘅所能維繫，唔好有得就有失。」

看到沒有？我還有錄音為證，歡迎索取。

老

前文一直「老孫」前「老孫」後，三十七歲的Eric，並不老得到哪裏。

「班朋友叫咗好多年，我同車婉婉叫先，我叫佢老車，佢叫我老孫，Sammi都叫老sam，許志安都叫老鼠（普通話「許」和廣東話「鼠」發音相近）o架，個個都老乜老物咁！

「我覺得卅幾歲男人其實好後生，事業先開始發力。劉華四十幾歲，你睇吓佢仲咁後生！任達華、方中信仲繼續玩落去，唔會覺得咁樣叫老。香港藝人一定要有個花名，下下全名好見外，唔通叫我威威咩？」

Eric的保鮮方法很簡單。

「我覺得男人唔使搞咁多嘢，真係乾淨、健康、心境開朗，我唔可以建議食啲乜，搽啲乜，反而我覺得係洗面、做運動、乾淨。」

面對眾多八十後，甚至「超級巨聲」撲至，Eric如何對付？

「都係咁嘅死人樣o架咋！」

如果每個三十七歲的男人都可擁有如Eric般的「死人樣」，實在可以死而無憾、死得眼閉了。