Alan Wake 自作自受靠光得救! @ 明星靚相大分享☆

PS3嘅《 Heavy Rain》大賣，證明呢類玩劇情，又有中文字幕嘅動作遊戲好受落。今次輪到 XB360出招！《 Alan Wake》唔係叫阿倫起身，而係講身為小說家嘅佢去到美國小鎮，發現自己寫過嘅驚嚇小說劇情陸續喺現實發生，而且仲面對一堆見光死神。文：阿洛

煲劇全攻略放大圖片
■唔係好信，訊號彈嘅殺傷力勁過鐮刀？

■唔係好信，訊號彈嘅殺傷力勁過鐮刀？

無綫翻播《天地豪情》都引到我晚晚追，證明有劇情打好個底，自然吸引。《 Alan Wake》故事就係講好耐未有新作嘅 Alan Wake為咗搵創作靈感，就同老婆嚟到太平洋西北部嘅一個小鎮度假，但嚟到無耐老婆就玩失蹤，而且仲有古怪而超自然嘅事發生，就係佢未動筆嘅小說竟然已經有原稿散落喺小鎮各地……呢隻 Game有中文字幕配英文語音，即係睇西片咁款，廠方更話會有以美劇嘅表現手法，即每一個章節都會有高潮位引你追落去咁話。

用電筒照爆敵人放大圖片
■有時都要靠把手槍，射到爆炸就夠晒光。

■有時都要靠把手槍，射到爆炸就夠晒光。

令我好放心嘅一件事係，呢隻 Game唔會用突然彈出怪獸或核突畫面嚟嚇死人，主要係以氣氛為主導；雖然呢隻遊戲都係以射擊為主要攻擊，有手槍等武器出現，不過原來裏面嘅敵人最驚係見光。呢班被黑暗魅影操控變成嗜殺嘅敵人，有移動速度快嘅，亦有體力勁嘅，而正如前文所講，打倒佢哋嘅關鍵武器就係電筒、閃光彈或訊號彈。

限定版畫中畫導賞

隻 Game同小說有咁大關係，限定版又點會唔食番呢個勢，首先包裝好似一本硬皮小說，而內容就有「 The Alan Wake Files」 144頁檔案，包含 Alan Wake所寫嘅小說同埋 FBI對事件嘅調查報告，另外亦有 Soundtrack。不過最重要係仲有導賞功能，就係喺遊戲進行同時，製作人會以畫中畫方式喺畫面左下角出現，喺一啲特別場景或劇情中親自講解，權威程度等於睇鬼古見到司徒法正。

放大圖片
■動作元素好強，不乏同敵人駁火場面。