明星靚相大分享☆

孭住黑色 CHANEL小手袋，穿上便裝的朱慧敏，第二站就係 CHANEL，她在內約逗留近廿分鐘。


在《飛女正傳》擔當第二女主角的朱慧敏，飾演不惜騷長腿拋心口博上位姐仔，估唔到現實中，她對男人同樣有一手。
本刊收到消息，朱慧敏最近搭上大陸溫州一名王姓富商，經常中港兩邊走。自從被富商照顧後，原本底薪約萬二元的朱慧敏，衣、食、住即時三級跳。日前本刊發現她手持冇信用限額的 AE黑卡在金鐘太古廣場名店瘋狂掃貨。本身住銅鑼灣百德新街舊樓單位的她，更秘密進駐貝沙灣 3000呎海景豪宅。看來港姐再次締造另一個「神話」。
現年 29歲的朱慧敏， 04年港姐出身，正值事業起步之時，卻當上第三者，介入梁榮忠和鍾麗淇戀情。事發後她一度被雪藏，後來得到戚其義等監製扶持才有機會繼續拍劇，不過角色一直摵唔甩壞女人角色，工作量亦不多，連開幕剪綵都甚少，至今每月底薪僅約萬二元。

坐低狂掃 LV
4月 29日下午，朱慧敏甫到太古廣場，率先走入 LV，可能她明知自己有排買，索性坐低叫店員攞多幾個手袋和銀包讓她慢慢揀。

記者眼見朱慧敏至少購入四個銀包，盛惠約萬五元。她離開時剛巧有電話入，店員更為她攞住戰利品送到出門口。

晒黑卡
之後朱慧敏與一女友人到 Cova嘆茶，埋單竟以一張 AE黑卡簽帳，真係估佢唔到。

CHANEL豪買袋
朱慧敏在 CHANEL睇中了一個桃紅色，價值兩萬四千元的手袋。即使是最後一個，朱慧敏諗都唔諗就買，十分豪氣。

戰鬥格跑步
5月 3日，記者再發現身穿白背心橙短褲的朱慧敏，聽住 headphone，在貝沙灣範圍跑步，相當悠閒。

其間朱慧敏與一位相信是住客的女子傾談數句，看來她在貝沙灣已住了好一陣子，連街坊都識到幾個。

進駐貝沙灣
貝沙灣呎價近兩萬，住客非富則貴。據知朱慧敏所住的屬高層單位，面積 3千呎，月租至少 15萬元。

當日朱慧敏掃完名牌後，獨自坐的士直入貝沙灣，順利通過保安位置。

做財經節目撻着

在年多前，朱慧敏主持無綫收費台財經節目《創富坊》時，輾轉認識了一名來自溫州的富豪。男方得知朱慧敏父母離異，與她相依為命的母親其後亦因乳癌去世，對遺傳了家族乳癌基因的朱慧敏大表同情，經過連番追求，數月前二人正式撻着。
消息指朱慧敏背後的強勁水喉姓王，年約 45歲，未婚，家族原本做皮革生意。直至近年開始涉足房地產買賣，多次在國內和香港大手購入豪宅，由於眼光準繩，身家因此翻了幾翻，估計現時身家超過五億。
「呢個富商識咗 Queenie（朱之洋名）後，為咗見佢成日中港兩邊走，一得閒就嚟香港陪 Queenie。之後 Queenie患乳癌嘅阿姨病發（ 09年去世）， Queenie好唔開心，個富商仲專登放低工作半個月陪佢。到佢哋拍拖後，每次個富商喺深圳傾生意， Queenie都會上去見佢。」一知情人士透露。
這名富貴男友為了方便來港與朱慧敏共敍，月前更以每月 15萬租了貝沙灣一個接近 3000呎的海景豪宅讓她入住，另外亦給她一張附屬卡，相當體貼。
知情者說：「 Queenie有男友錫，老實講佢繑埋雙手都仲得，我哋班 friend見佢做親啲角色唔係情婦就係二奶，成日同佢講咪鬼做，不過佢就猛話自己鍾意做戲，佢男友又由得佢喎！」

身材高(身兆)的朱慧敏，曾與名攝影師葉青霖於泰國拍寫真。

 溫州隱形富豪
據消息指朱慧敏釣到的溫州隱形富豪年約 45歲，未婚，身高約 5呎 8吋，體形略胖，家族經營皮革生意，近年來港專炒豪宅，因而獲利不少。

AE黑卡掃名店

兩周前（ 4月 29日），本刊發現朱慧敏獨自在金鐘太古廣場瘋狂 shopping。當日揹住近三萬元 CHANEL 2.55經典款黑色手袋的她，先到 LV，只行了十五分鐘，便極速購買了四個銀包。之後她再走到附近的 CHANEL，睇中店內一個價值 2萬 4千元的粉紅色手袋，揹上膊照咗兩下鏡就叫售貨員替她取一個全新的。不過店員表示這個袋已是最後一個時，記者聽到朱慧敏豪氣地說：「算啦，就呢個啦！」前後未足半粒鐘，朱慧敏已豪花接近四萬蚊。
行名店行到腳仔軟，其後朱慧敏與一名打扮富貴的中年女人到「 Cova」 high tea。埋單時，記者發現朱竟手持一張 AE黑卡找數，之後便獨自乘的士離開，直駛到貝沙灣。當的士駛入更亭時，記者見到守衛與車內的朱慧敏熟絡地打了聲招呼，便准許的士司機駛入屋苑範圍，顯然朱慧敏是該處住客。

黑卡年費兩萬

American Express黑卡本身不能讓客戶申請，通常是銀行根據客戶經濟狀況和收入而個別邀請作為特選客戶的。黑卡沒有設信用限額，即是話隨時碌架車，甚至碌層樓都得。黑卡年費 19,800元，一張主卡可有 4張附屬卡。若客戶在外地有急切需要，銀行會協助以飛機接送客人返港。

背心熱褲街坊裝跑步

記者連日在貝沙灣守侯，再次發現朱慧敏蹤影。 5月 3日，身穿白色背心和橙色超短運動褲的她，與一名女友人在屋苑沿斜路跑落附近的數碼港，只見戴住 headphone的她，邊跑邊哼歌，跑了足足 45分鐘弄至身水身汗才返回香閨。
本周一（ 17日），記者在電視城外事部大樓外向朱慧敏求證搭上內地富豪一事，她照例否認，並對記者表示不會透露自己財政狀況。
記：你係咪同一個溫州富商行得好密呀？
朱：冇呀……我真係唔知你講邊個。
記：近排你好富貴，搬咗去貝沙灣。
朱：（猶疑數秒）我成日去打波做 gym啫，我唔係住嗰度……係我屋企人住喺嗰度，貝沙灣返工太遠啦。
記：當你男朋友係屋企人？
朱：哈哈！
記：見到你喺 LV同 CHANEL狂買名牌。
朱：幾耐之前呀？唔會，你見我今日都周身冇件名牌 o架，我諗係嗰排母親節，我買嚟俾人 o架。
記：但係見你用黑卡埋單。
朱：（瞪大雙眼）吓！係咩？你唔好要我講我嘅財政狀況啦！
記：怕唔怕有人話你被包養？
朱：我最憎呢啲嘢，我賺嘅每分每毫都係自己搵返嚟，連屋企人嘅錢都唔使。我性格好唔鍾意靠男人，男人才華緊要啲。
雖然答得振振有詞，但睇表面證據，話你冇人照顧，都冇人信啦！  

本周一（ 17日）下午，記者在 TVB問朱慧敏。對於忽然富貴，她表示唔想講自己財政狀況，但強調唔會靠男人。

05年，朱慧敏和梁榮忠被揭車震事件後，梁被封為世紀賤男，一度被雪藏，自此兩人畫清界線。《蘋果日報》圖片

近年朱慧敏飾演的角色離不開邪派。在電影《竊聽風雲》有幕與李子雄在辦公室偷歡，露出一副姣樣（右圖）。在《珠光寶氣》亦要做陳鴻烈情婦。

朱慧敏的緋聞不算多，去年初就傳與《畢打自己人》演員 Marco撻着，多次被拍下兩人行街和打邊爐。本周一，記者在電視城發現 Marco（右圖），問到朱慧敏忽然富貴，他說：「我哋一直都係好朋友，佢富貴咗梗係恭喜佢，唔通閉翳好咩！」

港姐富貴之路

不少城中富豪專吼選美姐仔。做藝員收入有限，要即時「升呢」，唔少港姐亦希望釣到金龜乘機脫貧。

04年冠軍港姐徐子珊，今年 2月被傳搭上坐擁二十億身家的「殼王」陳國強，極速升呢，由將軍澳居屋單位，改而進駐貝沙灣千呎豪宅，父母亦換了豐田 Alphard 350星級七人新車，但她否認有人照顧。

05年港姐季軍林莉，以「港版林志玲」外號殺入 model界，有傳獲內地富商揼本開 model公司力捧，林亦由青衣公屋搬到大埔比華利山別墅，有二百萬瑪莎拉蒂接送。

05年港姐冠軍葉翠翠， 08年與內地富商黃有龍拍拖，後來黃更送上 5卡鑽戒向她求婚。當時月薪只得萬三蚊的她，在一星期內連掃兩間賽西湖豪宅，共值三千一百萬。

網友力撐

現年 29歲的朱慧敏，為 04年港姐亞軍，入行 6年，最為人知可謂 05年被拍到與梁榮忠的車廂火辣片段，轟動全城。 4年來她努力洗底專心拍劇，不過天生惹火的她，總離不開飾演壞女人、情婦、姣秘書等角色。
身為監製戚其義愛將之一的她，曾參與《 CIB刑事情報科》、《珠光寶氣》及《天與地》等劇，而於《飛女正傳》中，她更擔任第二女主角，飾演 36D索爆 OL，獲得好評，近日更有唔少網民留意她，讚她身材正，亦戥她常演壞女人而不值。

《飛女正傳》飾演巨胸女。

結局篇必睇位

24集的《飛女正傳》已到尾聲，性感女超人 Janet Bin（蔡少芬飾）亦正亦邪，結局篇更見緊湊，篤胸、啜咀、露底樣樣齊。

第 22集（ 5月 20日）　 Janet Bin望入豪門
Janet Bin為入豪門，出招冧掂容生（陳鴻烈飾），最後成功加入容氏。為免阿芝（蔡少芬飾）有機會現身， Janet Bin無時無刻向暉（曹永廉飾）索吻。

Janet Bin為免變回阿芝，不時向暉索吻，風騷到暈，咀完仲講︰「 Thank you baby！」

Janet Bin對住中風的卿（馬海倫飾），不諱言表明企圖︰「我只要搞得掂你老公，再搞掂埋你契仔，呢度仲唔係我嘅！」

第 23集（ 5月 21日）　黃德斌兩次扮女人
Janet Bin在醫院被假扮護士的阿然（黃德斌飾）偷襲，她出席記招時，然再次出手，假扮病人跳樓，趁 Janet Bin相救期間，篤她胸上的圖案，與她同歸於盡。

為了消滅 Janet Bin，阿然再扮病人跳樓， Janet Bin救他期間，被狂篤胸上紋身。
Janet Bin︰「你次次都扮女人，悶唔悶啲呀！」

暉拒絕 Janet Bin索吻，她即轉到親吻軒（陳豪飾），但最終發現軒已不再愛自己。

第 24集大結局（ 5月 22日）　改邪歸正
容生告知暉是自己的私生子，二人糾纏間跌落海，之後當 Janet Bin知暉仍愛阿芝，便設法令芝失蹤。 Janet Bin暗中觀察發現家人因芝失蹤而傷心，加上三淫魔亦發奮工作，令她若有所悟，最終主動承認偽造證據陷害芝。

得知 Janet Bin將會永遠消失，阿芝難捨難離。

暉在大結局才知自己是容生親生仔。

明星靚相大分享返回主業☆娛樂八掛週刊雜誌★明星靚相大分享(04月刊)★ 明星靚相大分享(05月刊)★ 娛樂八掛大放送★ 為食譜識飲識食街★ 任逍遙旅行萬里路 ★ 科技電玩一線通 ★ 寵物地帶 ★ 潮流男女打扮★ 健康之道★ 財經投資★ 五行玄學八卦風水★ 娛樂猛片放送站★ 週刊 及 雜誌(6-11月刊)☆ 週刊 及 雜誌(10-5月刊)☆