o靚模反擊戰寫真集忽然１周 779期 @ 明星靚相大分享☆

今年貿發局嚴禁o靚模喺書展搞簽名會，有人指係浸大咪神Carol玩冰陀衰家，仲引發百果園E神DaDa陳靜同Carol隔空罵戰。其實邊個衰都好，o靚模冇得入會展已經係事實，與其嘈交不如諗吓有咩辦法突圍仲好啦！
媽咪姐數數手指，今年約有三十幾個本地o靚模出寫真集，競爭咁大唔自我做宣傳拉客真係唔掂。據知幾間比較大嘅模特兒公司或者人氣較紅嘅o靚模都已經度晒計做宣傳。Rainbow同一班師妹組成嘅「Donut」，書展期間就會喺附近大派donut。而澳雪女Cat同翻版徐子淇Debby以及其餘3o靚模就會喺萬人空巷嘅旺角西洋菜街做宣傳。

咪以為佢哋得把口講，原來好鬼認真，早幾日呢兩班o靚模去現場視察環境兼做埋預演。當日雖然Rainbow冇到，但Ar Yu、Sweet同Vilian喺10分鐘內已經俾人搶晒五十幾個donut。而翻版徐子淇Debby同Kinki亦令旺角街頭氣溫上升，因為佢哋以「愛的抱抱」同錫錫嚟冧宅男。
波大冇腦？超錯囉！次文化堂社長彭志銘亦認為貿發局今次決定係超錯：「班o靚模書都未出、審批都唔使就ban咗佢哋，係以形象入罪。況且冇理由俾人賣又唔俾人宣傳嘅！」

《Inside》妄攝寫真集
女主角：Iris、Kinki、Norain、Cat、Debby（Pure Models LTD）
$98
全書128頁
發行商：青揚出版社
同期推出Debby比堅尼滑鼠墊（會展有售）及T恤（Life時裝店有售）

《Summer Diary》夏之日記寫真集
女主角：Vilan、Ar Yu、Irene、Rainbow、Caroline、Sweet （HK ModelHouse ）
$ 88
全書136頁
發行商：AIE Group LTD

群模對策
AngelaBaby 《Paradise》
$138
全書300頁
發行商：真源
Baby遭拒絕入場舉行簽名會，佢大叫無辜，「好無奈！啲評審都唔明我寫真內容，我要簽一本送番畀佢哋，證明我嗰本唔係低俗嘅圖書，唔係不雅嘅書刊。」工作排得密麻麻嘅Baby，已鐵定下月24日於海港城為告別寫真集舉行簽名會。

周秀娜《Les Vacanccs d' Amour Chrissie》
$128
全書188頁
發行商：紅出版
今年落重本飛往蒙地卡羅取景，更使出奇招「3D洞房」藍光高清碟，面對大會禁o靚模簽名會，Chrissie一於冇有怕，「我反而多謝貿發局幫我宣傳，我不會對號入座，相信貿發局不是只針對我一個。出版商都想宣傳本書，如果不可以在書展舉行簽名會，可能搵其他商場。我喜歡出席書展，但我不會硬闖，唔想將事情搞大。」

浸大咪神Carol楊梓瑤《Huge》
$98
全書148頁
發行商：青揚
未出寫真集就已經來勢洶洶嘅浸大咪神Carol就表示，冇得入場搞簽名會，怕會影響銷量，不過都另有對策，「書展嗰幾日我諗住以讀者身份入場，睇吓銷量好唔好，佢話唔俾開簽名會啫，冇話唔俾我入場嘛。」

Kinki同Debby異口同聲話只要fans支持佢哋嘅寫真集，就會送上愛的抱抱，睇佢兩個攬仔攬得幾興奮，搞到男fans Odem好尷尬，要交叉兩手護體防襲咁款。

Kinki同Debby喺旺角最多人流嘅西洋菜街高舉自己嘅寫真靚相，吸引男fans。