周五（四日）舉行的《萬千星輝頒獎禮》，視后之爭傳得鬧哄哄，聲勢一直領先的四奶奶鄧萃雯，獲各界粉絲在網上拉票力撐。

即使她心知自己形勢雖好，但隨着《宮心計》結局收視幾乎平了《大長今》的紀錄，楊怡所飾演的麗妃奸到出汁，演技被激讚，大有迎頭趕上之勢。加上她非常識做，近日頻頻宣傳造勢，並自動自覺提前續約，對於乖巧聽話的「親生女」，無綫當然有重賞，大有機會截胡。

身為基督徒的鄧萃雯，周日（廿九日）更返教會誠心崇拜和祈禱，將一切壓力交給上帝，希望祂幫助。

楊怡贏面大增

《宮心計》於周日（廿九日）播完，錄得四十八點高收視，令楊怡的聲勢有增無減，不少師奶粉絲對她的「奸險」刮目相看，紛紛轉軚支持。雖然楊怡表示看好鄧萃雯封后，並說：「如果雯女攞我會更加開心，我最想攞係最佳劇集。」不過，她絕非讓賽，反而步步進逼，早前已自動自覺秘密續約無綫，加簽了「賣身契」。

楊怡表示續約只因條件吸引，簽約一刻根本無諗獎項問題。但據其身邊人透露，無綫自《家好月圓》後，已開始游說她加簽新約，保證會力捧她，甚至在《宮心計》度身訂做麗妃一角，希望她繼鄧萃雯的如妃後，憑奸角上位。該圈中人說：「喺班姐仔中，擔櫈仔都應該輪到楊怡攞視后，而鄧萃雯就蝕底在唔肯簽無綫做經理人，所以楊怡都知自己有勝算。」

教友祈禱鼓勵

楊怡急起直追，那邊廂鄧萃雯則獲各界粉絲發動海票攻勢，多個討論區和Facebook均有撐她的組群，係威係勢。雖然粉絲給鄧萃雯不斷打強心針，但她仍心情忐忑，壓力十分大，所以周日（廿九日）她特別返教會崇拜。記者所見，她跟其他教友相當熟稔，期間又非常投入地唱聖詩和祈禱。崇拜後，她跟幾位教友到了教會旁的茶餐廳醫肚，眾人不斷鼓勵她，又謂會為她祈禱，令她頓時輕鬆起來。

對於教友支持，鄧萃雯笑說：「唔只教友，好多觀眾、街坊都好支持！」她說現在走在大街小巷，均獲途人打氣，「佢哋開口埋口都話投咗我一票，仲話投晒《巾幗》，呢啲交流好warm，好sweet。原來佢哋認為有權選擇自己覺得最好的，唔關乎鄧萃雯是否獲獎的問題，佢哋係要顯示力量，為自己討個公道，我好尊重佢哋嘅熱情。」

自認非親生女

近年鄧萃雯多次大熱倒灶，現在她對於視后獎項，不再強求，不想令自己太大壓力。「甚麼爭獎、換獎傳聞，我覺得知得愈少愈可避免麻煩，唔知、唔理、唔問，是我的態度。」雖然不強求名利，但她強調自己並非無欲無求，笑說：「我仲有欲有求o架，咁先有進步空間。以前我最大係購物欲，隨住人大咗，就減少咗好多。至於其他欲望，我好鍾意食嘢同瞓覺，點會冇欲喎。」

企硬不簽約做無綫「親生女」，鄧萃雯甘付代價，她指當年拋開一切去外國讀書，一別便三年半。回港後，她放下身段成就今日的發展，「好感激珍姐（曾勵珍）搵我拍《Loving You》，講真，你唔係自己人，人哋冇必要捧你，所以返嚟拍戲真係由零開始，當時我已經睇得好開，唔介意演阿婆同扮醜，豁出去做好每個角色。」

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄