最搶眼的當然是天星碼頭，大大座夠震撼，仲有充氣飛機半天吊。 

太爛玩

港女 Hello Kitty

暑假旺季，商場布置規模一壇大過一壇，高達小忌廉姆明藍精靈 Hello Kitty……想當年嘅卡通人物全部被搬出場，大賣集體回憶。連 Hello Kitty都唔再一味扮可愛，玩復古六十年代老香港，重現昔日情懷，大人睇得興奮過細路。大家爭相懷緬昔日好時光，原因不用多講。

懷舊香港 sell共鳴

來到朗豪坊「 Hello Kitty走過獅子山下」展覽，以六十年代的老香港情懷作主題，似搭上時光機回到從前。雖然 Hello Kitty迷未必曾經親身經歷六十年代香港，但作為港人都必有共鳴。
主辦單位稱今次是香港歷年來最大規模的 Hello Kitty展覽，難得 Hello Kitty放下身段，換上十四個經典香港造型，第一次變身復古 look，確實驚喜，你有冇見過有頭髮的 Hello Kitty扮馬姐？或者穿上藍色旗袍校服做學生妹？ Dear Daniel的人力車夫及飛仔造型，同樣搞笑。尤其是中央高六米的獅子山，竟然變成 Kitty頭，有惡搞式的幽默！
商場四樓共七個懷舊場景，另外兩個分別在七樓及十二樓，尖沙咀火車站鐘樓、天星碼頭等熟悉地標夠經典，又有富庶民特色的茶樓及大牌檔，很有本土風情。場景細緻位多，晾衫架、魚骨天線，甚至紙皮石都有懷舊 feel，原來曾參考香港歷史博物館的文獻、請教博物館榮譽顧問鄭寶鴻先生等，經過認真的資料搜集設計。展期至九月，唔想同一窩蜂人潮爭位影相可以遲點來，如果你頂得順唔鬥快 upload上 facebook的話。

鐘樓旁邊有人力車，仲有 Dear Daniel扮車夫，希望唔會咁快坐爛。 

仿照大笪地戲棚，穿著大戲服飾的 Hello Kitty，都有幾分花旦英姿！ 

位於酒店接駁天橋的電車，可以走上去坐坐，有車長 Dear Daniel招呼你。 

布置隱藏不少 Hello Kitty元素，如店名 logo換上貓頭及蝴蝶結。 

五大影相位

展覽空間夠大，但時刻人頭湧湧，鎖定五個影相靚位，影完仲唔閃？未同人逼過咩？

吉記大牌檔位於 7樓， Hello Kitty做馬姐買麵，辮子造型再加一身傳統中式服裝，搶眼過空姐制服或珠光寶氣 look。 

旺記士多士多內有懷舊零食，仲有 Tippy拋飛機欖，似曾相識。 

涼茶鋪依足傳統字體由右至左，細節位似模似樣。涼茶賣一毫子，想當年你有冇幫襯過？

荷香樓舊式茶樓，有小熊 Tippy著住麻甩背心撚雀，加上 Hello Kitty造型的叉燒包，連月餅海報都做埋，最搞鬼！ 

美美照相館影樓在香港日漸式微，這裡重現以前上影樓影學生相的情景， Dear Daniel充當攝影師，細緻到真係有快門線。 

Hello Kitty走過獅子山下

地址：旺角朗豪坊 4樓通天廣場、 7樓及 12樓
查詢： 3520 2800
開放日期：即日至 9月 15日
時間： 11am-11pm

藍精靈襲港澳

今年 55歲的藍精靈，今次為電影造勢落足本，商場布置及攤位遊戲，香港同澳門都有。
《藍精靈 2》電影以巴黎為故事背景， Mikiki複製了迷你版巴黎，有仿照香榭麗舍大道的露天茶座及凱旋門，巴黎鐵塔仲特意塗上藍色襯番藍精靈家族。每隻一米高的論盡仔、美芝、精靈爸爸、智多星、廚師及阿靚散布場內，製作團隊稱：「公仔用玻璃纖維製造，不易爛但易花，預咗要晚晚補色！藍精靈的身體線條不難做，最難拿捏的是眼神，要逐條眼睫毛畫上。」草地及鐵塔上有 100隻一比一藍精靈塑膠公仔，只高八吋，隻隻一模一樣，勝在夠多夠壯觀。順道睇埋藍精靈迷 Kenneth的珍藏玩具，重拾當年親切感。同場食肆仲推出藍色食品湊熱鬧，荃錦中心、屯門卓爾廣場及錦薈坊亦有藍精靈布置，週末有藍精靈出巡， fans要密切留意！
至於澳門銀河的「藍精靈 2夏日樂園」雖然沒有百隻藍精靈坐鎮，但設有工作坊和遊戲攤位，論互動性，半點不輸蝕。廣場內有布置成巴黎名勝景點影相位外，還有五、六間蘑菇屋，屋內是攤位遊戲，玩方塊拼圖或者射籃球之類，成功過關就送扇仔或者帽仔。每日由十二點半至七點，成個人咁大的精靈爸爸會出場五次和遊客合照。好多小朋友見到精靈爸爸，即刻飛身撲上去。被冷落了的真爸爸呢？最開心應該係睇可愛韓妹扮藍精靈跳舞。

一百隻藍精靈在鐵塔上或草地上，樣子唔似電影版般寫實， cute好多。 

人偶都是最熟悉的角色如精靈爸爸、智多星等，造型可愛鮮明。 

藍精靈俾人攬攬錫錫，每晚都要由專人補妝，塗漆上色。 

藍精靈迷 Kenneth主要收藏歐洲及日本版小型 figure，這些都是六十年代尾出品，造型百變。 

由本地達人 Fei Wong設計的立體畫，將電影內藍精靈被加達活捉一幕重現眼前。

「藍精靈•愛藍天」巴黎精華遊

地址：新蒲崗太子道東 638號 Mikiki地下中庭
查詢： 3980 9930
日期：即日至 8月 25日
時間： 12nn-10pm

精靈爸爸變巨型，大過真人，極受小朋友歡迎。 

可以幫藍精靈填顏色，小朋友坐定定，父母有得抖。 

藍精靈 2夏日樂園

地址：澳門銀河綜合渡假城東翼廣場（戲院售票處旁）
查詢：+853 2888 0888
日期：即日至 8月 11日
時間： 12nn-9pm
精靈爸爸出巡時間：每日 12:30pm、 2pm、 3:30pm、 5:30pm、 7pm
遊戲券換領方法：於活動期間入住銀河酒店、澳門大倉酒店或澳門悅榕庄可憑有效匙卡換取兩張遊戲券。銀河優越會會員、於澳門銀河內任何商店或餐廳單次消費滿$200、或以兩張 UA銀河影院電影門票（當日有效），可換取遊戲券一張。

撰文：張頌婷、鍾琰
攝影：胡春輝、梁炳權、譚俊軒
模特兒： Celine Yeung