企硬立場
在台上炮轟一輪後，志偉接受記者訪問時，繼續再爆大鑊，並表示自己身為「演藝人協會」會長，有必要將「事實真相」揭露出來。
封面故事
爆無綫拍戲賤待演員　志偉帶頭反枱
2010年01月08日
正當無綫和四大唱片公司就版稅問題鬧到火紅火綠，邵氏開拍的賀歲片《 72家租客》，同樣因無綫刻薄縮骨惹起公憤，張學友、袁詠儀等外援演員，紛紛暗寸無綫「出手低」。
而身兼導演、監製和演員三職的曾志偉，為了這部戲，碌爆人情卡搵外援演出，卻遭無綫再三「㩒」價不特止，有些只得象徵式的「 cheap皮」利是，仲老奉叫演員免費補 shot、拍宣傳片。唔少演員向志偉詐型，谷到成肚火的曾志偉，終於在周三（ 6日）電影慰勞宴中爆火：「攝張紙當利是？算咩？」
周三（ 6日），無綫在邵氏片場一廠設盆菜宴慰勞《 72家租客》全體演員。當志偉上台致謝，台下演員笑騎騎等開餐之際，冷不防曾志偉忽然收起嘻皮笑臉，神情嚴肅地說：「雖然今日有好多記者，但我覺得要講出嚟。其實拍完呢套戲，我唔希望下一部戲仲有拍膊頭、攝利是嘅情況出現。
「演員都有自己一個價，應該跟番市價。好多時佢哋應承客串一、兩日，轉頭你打俾佢，同佢講個 shot拍得唔好，要返嚟補拍，又要做呢個宣傳嗰個宣傳，到頭嚟只係俾封利是佢，攝張『無言感激』紙當利是，算咩？」 
cheap皮利是
據一位收過利是，不願開名的演員透露，志偉口中的 cheap皮利是，是用 TV Buddy利是封入住一張白紙黑字，用電腦字寫上「多謝參與，無言感激」八個字，裏面鈔票嘅銀碼大小因人而異，但有藝人連一蚊都冇。
 
車輪轉㩒志偉
志偉在慰勞宴上突然發難，數無綫以賤價利是刻薄《 72》的演員，學友雖然暗撐志偉，戥其他演員唔抵，但亦不忘為無綫打圓場。
 
志偉炮轟無綫縮骨，《 72》的製作總監黃家禧即上台反擊，強調無綫「唔會搵演員笨！」之後將「波」交俾負責藝員的樂易玲。
 
樂易玲緊接黃家禧一句：「唔係志偉拍膊頭，係其他演員參演到呢部戲都好光榮。」令志偉即時㷫爆扁嘴。

台下拍手起哄
志偉講完呢番肺腑之言，台下即時鴉雀無聲，隔幾秒即有人起哄帶頭拍手，以示支持，也有些邊拍手邊咬耳仔，氣氛十分尷尬。台下俾足反應撐志偉，坐在主家席的邵氏電影製作總監黃家禧，與站在台上的無綫製作資源總監樂易玲當堂面色一沉。
志偉講完，張學友緊接上台話：「唉！我唔識講嘢，不過我真係唔知佢哋咁慘，依家望住台下我都有歉意！希望下次佢哋收嘅唔止係『無言感激』，係『袋袋平安』啦！」炮轟完無綫的志偉，可能自知火氣猛，隨即打蛇隨棍上：「係呀，啲片酬俾晒你囉！」藉此打圓場。
外插內撐
無綫縮皮唔係新鮮事，不過身受其害的當事人卻各有講法，冇包袱的外援藝人大多肯企出嚟講出事實。至於無綫親生仔女，唔係局撐娘家，就係扮鵪鶉唔敢講多半句。
敢言派


袁詠儀：收半價片酬
「我收半價片酬咋！冇計啦！志偉嗌到，佢又叫埋 UFO嘅人，即係我保母搵我拍，咁 TVB都算係我娘家，佢哋打到嚟俾我咪拍囉！」
 
張學友：唔知佢哋咁慘
「哎吔！我都唔知佢哋（其他演員）咁慘，依家望住台下都覺得有歉意！」
 
許志安：都係俾面志偉
「我得 3個鐘頭戲咋！拍呢齣戲都係俾面志偉，因為嗰日我有嘢做。不過志偉都好好，先跳拍咗我嗰 part。當日係有封利是俾我，不過我就冇拆，仲叫助手俾番志偉，話請劇組啲同事飲嘢！」

保皇黨


鍾嘉欣：我信公司
「我有喺現場，以我所知就冇（志偉發炮）呢件事。個個人收片酬方式都唔同，相信公司會為我爭取好價錢，我冇去諗，亦冇問，年尾至會知收幾多，不過我就冇收過任何利是。（係咪補戲冇錢收？）套戲咁多演員，咁多人補戲，所以我都係自己 mark低補咗幾多場。」
 
佘詩曼：都算收足
「我……都算貼近自己嘅市場價……都算係收足片酬囉！」
 
林峯：唔知收幾多片酬
「志偉講嘅嘢我好感動，好多人都係象徵式收片酬，其實 TVB口頭上都有感謝啲藝人，而我真係唔知收幾多片酬，的而且確參與呢部電影係光榮！」

黃家禧樂易玲反擊
雖然志偉即時補鑊，在台上多謝方小姐肯出錢拍戲，但早已被志偉辣㷫的方逸華表弟黃家禧，立即上台反擊：「首先，頭先志偉所講嘅嘢，我有啲回應。一直以嚟，老闆（方逸華）同我講唔好難為 TVB嘅藝人，人哋俾幾多我哋就要俾幾多，要俾合理價錢。老闆仲話唔會為咗內地市場而拍戲，所以今次蝕三百、五百萬都冇所謂，總之志偉話去就去。老闆仲話，今時今日佢有咁嘅成就，都係因為電影起家，所以絕對唔會搵演員笨。」
說罷隨即指指學友︰「學友都收唔足啦！（暗指學友收唔足都冇詐型）老闆都有同樂小姐講，我諗樂小姐應該都有做啦！」
黃家禧忽然交波，企喺台邊嘅樂易玲醒目接口：「無綫嘅藝人個個都好有團隊精神，唔係吓吓講錢，係因為鍾意先參與。其實佢哋覺得有得參與已經好光榮。（講完拍一拍志偉膊頭加重語氣）唔係因為志偉你拍膊頭，而係佢哋真係想拍戲。」此時志偉苦笑聳一聳肩，然後嘴扁扁。
志偉：有責任講事實
當日盆菜宴完後，記者再追問志偉無綫縮骨一事，他勞氣說：「我身為『演藝人協會』主席，都要為演員爭取福利，所以要將事實講俾大家聽。（係咪無綫俾得好少錢啲演員？）當然唔係衰到乜都冇，但就唔係一個 market price（市價）。有好多人我係拍咗膊頭，所以一定要講出嚟，因為呢件事夠大，夠放射性，其實全部演員都係低於市價。（係咪有啲演員直情冇錢收？）唔係……佢哋都有錢收……咁最少都有四位數。今次我講出嚟，只係唔希望以後啲人一聽到拍無綫戲就驚囉！」


志偉隊酒發洩
當日是《 72》的慰勞宴，志偉心情欠佳，笑容欠奉，只不停周圍隊酒。
 
今年 7月，無綫投資的電影《 Laughing哥之變節》大打人情牌，找來同樣減一半片酬嘅吳鎮宇及黃秋生兩大影帝坐鎮，加上密集式電視宣傳，終令這部低成本製作的戲，榮升全年港產片票房第三位。

王祖藍默認開心價


吳啟華（右）因合約問題與無綫鬧翻，但因為俾面志偉，才接拍《 72》片。

至於身為無綫人又做過《獎門人》主持的王祖藍，則左右做人難。他說：「志偉係好激動，但係源於感動啫。我知呢部戲好多嘢都係佢一手一腳做，依家好似打完仗咁。不過我可以肯定講唔會有人冇錢收，至於我個價錢，係合理囉。一班前輩對邵氏好有感情，所以一吹雞個個冇所謂，收開心價囉！」
眾星賤價拍戲


片酬減完再減
據知飲無綫奶水大的志偉，今次忍無可忍爆大鑊，全因在三個月前開拍《 72家租客》時，無綫藝員除收「無言感激」利是焗拍公司戲外，大部分外援演員，統統由志偉親自打電話接洽，憑其江湖地位及與藝人的交情，最終游說到班演員減一半片酬。點知呢頭傾好條件，嗰頭無綫仍嫌貴，要將一半片酬再減半，甚至更少。
不過講到尾，無綫始終是大台，唔少藝人亦要靠此平台保持曝光率及谷人氣，無綫當然有籌碼與藝人講數，就算片酬唔高，一樣大把人肯做。
「公司講到明要控制 budget，套戲成百幾個演員，淨計大粒嗰啲都有三分一。為咗慳錢，班演員片酬全部都唔係用『組數』計，而係『全包宴』。即係拍幾多日都係硬倔收一個價。之前佢哋都有諗過搵周秀娜做狄娜，不過佢嚮出面拍一組戲都講緊收幾萬蚊。計過太貴，最後咪搵番阿佘（佘詩曼）頂囉，佢都係收唔夠一萬。」知情人士說。
《 72》演員硬倔收一個價，無「後顧之憂」的無綫便使人使到盡。「志偉係導演，佢成日覺得對唔住班星，所以好多時拍啲 shot唔會執得咁嚴，等班星可以準時收工。不過試過好多次條片返到公司，黃家禧就掟返出嚟，話拍得唔好要志偉重拍。志偉焗住打俾啲星要佢哋補拍。因為啲星冇錢收，志偉咪又要打人情牌囉！
免費宣傳狂補 shot
「除咗呢樣㷫，志偉最嬲嘅就係拍拍吓套戲，無綫又要做宣傳，『東張西望』嘅人無啦啦扯走一、兩個演員話要做訪問，搞到遲收工，又俾啲星詐型。志偉有同公司反映過，不過上面就話《 Laughing哥》都係靠勁多宣傳，票房先收得好，仲叫志偉睇開啲㖭！」知情人士說。
有冤無路數，一向愛飲杯中物的志偉，在除夕當晚被傳媒影到飲到爛醉如泥俾人抬出酒吧。「志偉拍咁耐就呻咁耐，成日話『對唔住』啲 friend，嗰晚除夕佢話全世界停廠，所以叫晒我哋班兄弟去，不過佢自隊一輪好快就冧咗！」本刊欲就此事再聯絡志偉，但他卻罕有地將電話飛到留言信箱，至截稿前仍未回覆。
無綫一向恃住大台，向歌手、演員發動友情攻勢，但藝人們怕得罪大台，惟有啞忍，尤其是無綫本身合約藝員，更加敢怒不敢言。今次志偉公然爆大鑊，釋放自己屈埋嘅谷氣，亦為同行出了一口烏氣！不過，無綫下一步唔知會點做呢？
多宣傳玩謝演員
《 72家租客》農曆年上映，賀歲檔對手特別多， TVB唔輸得，電影由開拍到煞科都谷行宣傳，就連幫手拍一兩個鏡頭嘅串星都要參與埋一份造勢。呢封「無言感激」嘅利是真係「大」！


10月 22日　開鏡拜神
《 72》片大部分在無綫古裝街及邵氏片場內拍攝，除了本台演員，共 174名演員拍攝，陣容龐大。
 
11月 12日　高層探班宣傳
當日的宣傳活動，樂易玲（圈）親自踩場。 12月無綫再安排兩次探班，宣傳活動一浪接一浪。
 
11月至 2月《東張西望》洗腦式宣傳
TVB為了令《 72》片成為賀歲票房冠軍，在電影拍攝兩個多月來，經常安排自己節目《東張西望》和收費台《娛樂新聞台》採訪探班。
 
12月 3日煞科新聞發布會
《 72》片中，就連宣傳活動，無綫也出動四大小生，認真大陣仗！

無綫縮皮有前科
多年來，無綫恃住大台，無論對旗下的藝員及其他歌手、藝人，都甚為刻薄，最經典是提出一蚊騷政策，賤價請藝人做主持或出騷。


拒加歌曲版稅
四大國際唱片公司（華納、環球、 Sony及 EMI）聯手的 HKRIA，向無綫提出加版稅建議，惟遭無綫斷然拒絕。雙方各不相讓，演變成互相封殺局面，歌手牽連甚廣。
 
侮辱價做主持
今年年尾，因為版稅事件影響，環球旗下劉美君被無綫飛出《超級巨聲》主持。事後，劉在 facebook炮轟無綫，寸無綫出手勁低：「哇，實在連一個特約演員都不如，我覺得有點（受）侮辱……」估計她做主持約三千元一集。
 
友情價做嘉賓
多年來，所有歌手上無綫做嘉賓，都是收「友情價」一百元車馬費，連化妝、髮型費都唔包。
 
北上改公園景
09年無綫拍大型台慶劇《宮心計》時，本來計劃到上海橫店取景，但為了慳皮，最後改在荔枝角公園拍攝，以致出現不少穿崩位。








arrow
arrow
    全站熱搜
    創作者介紹
    創作者 stacylife 的頭像
    stacylife

    明星靚相大分享☆

    stacylife 發表在 痞客邦 留言(2) 人氣()

    E-mail轉寄