3D電影大熱，戴起「型超」即時有特別效果，睇得過癮；當睇戲都咁講究，無理由開場前食熱狗、爆谷醫肚咁求其！應該學有線娛樂台主播譚凱琪（Zoie）去戲院內的新餐廳O3做大「蠔」客，慢慢歎齊新鮮生蠔、熟蠔及意大利飯，甚至買啲小食入去戲院，邊睇邊食！
新餐廳鄰近太古城中心UA戲院售票處，買完飛行兩步就可以開餐，佔盡地利優勢。店名用上生蠔英文Oyster的首個字母，因為主打生蠔，另還有不少揀手海鮮。而細問之下，得知店子屬炮台山Oyster3的姐妹店，因緣際會下跟戲院合作開店。 Zoie甫進餐廳即自稱夠「蠔」氣，原來小妮子最愛食海鮮，其中生蠔食之不厭：「我耐唔耐就會幫襯蠔吧，會揀有齊唔同品種的生蠔拼盤，鍾意食細細隻、質感爽的，雖然Creamy的都好好食，但好快膩。」 店主Felix跟Zoie一樣是蠔癡，餐廳不像一般蠔吧會將新鮮生蠔「曬冷」，但由他精心挑選的，肯定當造，現時每日約有十款生蠔供應：「今期最啱食法國、南非、愛爾蘭及蘇格蘭的生蠔，之後會按產地轉款。」見Zoie叉起生蠔時，生蠔裙邊即時縮起，證明非常新鮮，至於味道，她說食落滑溜溜，配杯白酒就最Perfect，Felix即時教路應配帶點酸味的白酒，因果香味太重的話，甜味便會蓋過蠔味，變成喧賓奪主。 若然不愛生蠔，大家可選「熟蠔系列」，其中「白酒乾葱蒸蠔」煮法創新，甚有中菜影子，蠔肉入味之餘，還帶點酒香，又沒有焗蠔、炸蠔般膩滯。其他美味選擇還有其他海鮮、沙律、湯、漢堡包、意大利飯、意粉及甜品等，見Zoie樣樣都試，心情興奮：「三色無骨雞搥好得意，一啖可以食落肚；馬拉蜆夠大隻，肉質爽甜，配啤酒汁，味道即時豐富咗。」 去睇戲，通常都有告示：「嚴禁帶非本戲院售賣食物進場」，可惜一般戲院的小食部選擇太少。不過今次則例外，大家除可在餐廳內開餐，亦可將食物買入場慢慢歎。戲院方面補充話：「只要食物沒有醬汁、沒有殼及沒有骨便冇問題，至於生蠔，當然係喺餐廳食最好。」
免治羊肉漢堡 $88自家製羊肉漢堡扒，以羊髀肉混合香草、洋葱，煎至七成熟後，加上番茄、生菜及青瓜變成巨型漢堡。
墨魚汁鮮墨魚意大利燴飯 $138以黑吃黑的一道菜，難得各方面都很配合，意大利飯煮得Al dente，是生蠔以外的心水選擇。
熟蠔$38/隻即使不嗜生蠔，亦有熟蠔選擇，包括菠菜煙肉焗蠔、白酒乾葱蒸蠔或天婦羅炸蠔等。
日選十款生蠔
墨魚波配香蒜蛋黃醬 $68墨魚膠混合甘筍粒及墨魚粒，搓成波形香炸，香脆彈牙。醬汁則以香蒜、芥末、橄欖油及香草等調製，蘸少少已夠味。
馬拉蜆 $88蜆肉夠大隻，難得入口爽甜不韌，啤酒汁則帶濃香啤酒味，只起吊味作用而不會「食醉」。
店子不算大，但勝在簡約舒服，而且佔盡地利，睇戲後可輕鬆開餐。 
譚凱琪近況
節目《精算俏佳人》、《美麗任務》主持人，另跟陳啟泰到印度拍攝的特輯《印度。千年一歎》正在播放當中，自言21日旅程感受良多，對當地留下深刻印象。
買小食去睇戲
新鮮生蠔 $34/隻起 店主Felix推介今期當造法國、南非及愛爾蘭等地靚蠔，每日約有十款精選，另有生蠔拼盤供應。
留言列表
