忽然1周 737 期醫護員爆入院內幕　謝天華白車上乞求老婆：唔好話俾人打－明星靚相大分享☆

9月 9日黑面回應
謝天華 2時許由寓所出來時，被問到老婆自殺及被打的傳聞，他黑面回應話：「有證有據至好講。」
封面故事
醫護員爆入院內幕　謝天華白車上乞求老婆：唔好話俾人打
2009年09月11日
9月 8日，謝天華老婆 Tina突然被傳自殺入院，剛巧同一日有周刊爆謝天華偷嗒 o靚模王璐瑤。為免令人揣測兩者的關係，事後謝天華誓神劈願，指老婆乃因胃抽筋入院。
不過據醫護人員爆料，當日醫護人員到達謝家後，謝天華的老婆曾自稱遭人毆打。不過，有人喺救傷車乞求女傷者︰「唔好話俾人打。」
Laughing哥多番變節，但食住老婆心軟性格，依然可以繼續風流！
9月 8日下午 2時半，謝天華隨救護車，與躺在病牀上的老婆現身灣仔律敦治醫院。事有湊巧，天華老婆入院當日，剛剛有周刊刊登三級女星王璐瑤，大爆謝天華借玩魔術為名，摸手仔兼狂追她。
記者到達現場，當時已戴上口罩的謝天華看來神色凝重、眉頭緊皺，一改以往親善態度，見到記者拍照更怒目睜眼。當日晚上七時許，原本指老婆「冇咩事！好快出院！」的謝天華，突然安排老婆轉送到養和醫院留醫。

黐三級女星王璐瑤夜蒲
王璐瑤騷謝天華與她在夜店親熱合照，更指當晚謝天華借玩魔術為名摸其手仔。

晚上 7時許，謝天華在醫院探完病離去，其間他向傳媒表示，雖然面對種種不利傳聞，但無綫高層卻很信任他。

9月 8日送老婆入院
2時許，天華細心為卧病在牀嘅老婆抹汗，盡顯溫馨。

謝天華將老婆由律敦治醫院轉到養和醫院休養，其間 Tina全程用氈遮蓋面容，但手指卻發現貼上膠布。

被送入病房後， Tina曲起雙腳休息，看來她的肚子真是很痛。

雙眼通紅嗌肚痛
據醫護人員透露，當日的確有人報警 call白車，當時有人表示老婆「個肚唔舒服」要入院。當一眾醫護人員到達，女病人當時情緒好唔穩定，雙眼通紅，醫護人員循例問佢咩事，女病人表示︰「俾人打，依家個肚好痛……」
之後眾人上了救護車，有人跪在女方旁邊，不斷求情。「但個男嘅話：『對唔住，大家都係火遮眼啫，唔好話俾人打，我唔會有下次……』」還着她放他一馬，又話以後會改過云云。醫護人員透露：「咁女方俾個男人『唉』多兩『唉』，態度亦軟化咗。所以去到醫院嗰陣，就變咗話胃痛入院囉。」
聲稱胃抽筋入院
當日所見，謝天華顯得心煩意亂，對於兩人曾嗌交，導致老婆自殺及被打的傳聞，他一概否認，當晚更透過無綫做了個電話訪問，澄清老婆是因為空肚潛水，導致胃抽筋。
翌日下午 2時許，從跑馬地寓所出來的謝天華，明顯有備而來。記者追問他老婆被打及自殺的傳聞，他聞言十分激動︰「呢啲係你哋傳媒炒作，依家係咁 o架啦，只要有兩個人物，就會編一大堆故事出嚟。」
記︰點解要 call白車？
謝︰本來可以揸車送老婆入院，但因為停咗牌……可以搭的士，但如果落到街冇的士點算！我都係善用呢樣嘢（救護車）。
記︰胃抽筋好少需要住院喎？
謝︰老婆仲有少少感冒，你知啦！依家感冒菌咁犀利，入咗其他地方就唔好啦。所以咪同佢轉院，等佢休息吓！
記︰太太知唔知傳聞，佢依家心情點？
謝︰依家醫院（資訊）咁先進，佢梗知啦。我唔會當呢啲係笑話，因為件事好嚴重，搞到朋友、家人都打嚟問，唔清楚嘅人睇咗報道會信以為真。（咬牙切齒）
記︰會唔會澄清？
謝︰我諗唔會澄清，係自責！我會主動聯絡公司，交代番清楚件事。

今年 3月，謝天華被控醉酒駕駛，判刑前天華拖老婆到大坑蓮花宮求神庇佑，判刑日兩公婆又十指緊扣上庭。

Tina與謝天華 05年結束 12年愛情長跑結婚，兩人的結婚相，謝天華更赤裸上身拍攝，十分搞鬼。

指被人擺上枱
說罷，謝天華步行到養和醫院探老婆，直至傍晚離去時又激動向記者發炮︰「依家好多揣測，不過唔使玩到咁大啩，仲寫到我打太太，咁對我影響好大，只不過胃抽筋入院就寫到我哋感情有問題……」
記︰咁你同太太感情有冇問題？
謝︰（斬釘截鐵）完全冇問題。太太都覺得啲報道過晒火位，佢都要出嚟做嘢，咁對佢有影響。
記︰係咪同三級女星王璐瑤嘅緋聞有關？
謝︰兩件事發生太近，至有咁多聯想。
記︰係咪俾人擺上枱？
謝︰唔係第一次，會唔會蒲少啲？咁好難啫，咁觀眾過嚟影合照，之後張相點用我真係好難控制喎。
謝天華與老婆 Tina識於微時，當年謝天華還是「風火海」，因為蒲夜店與任職唱片公司宣傳人員的 Tina邂逅。當年半紅不黑的謝天華，因為「風火海」解散，曾經歷過一段困苦的日子，尤幸 Tina對他不離不棄。

08年恩愛放狗
雖然謝天華桃色緋聞多多，但係佢定時向老婆交人，所以經常影到同老婆放狗及買餸。

新片票房千六萬
電影《 Laughing Gor之變節》收近千六萬，力壓《竊聽風雲》，爆冷成為港產片冠軍， Laughing哥果然人氣高企。

謝天華同海味拍《學警》而熟絡，現時 Tina更成為海味嘅經理人。

靠外母上位
加上 Tina的母親在無綫的藝員部嘅管理階層，謝天華在外母帶挈下，就算冇男主角做，在電視劇中總執到好籤，經多年努力，終於做到男主角，今年更憑住《學警雄心 3》的 Laughing哥一角紅起來，進軍影壇做男主角。
不過，人紅必驕，有藝員透露謝天華自從紅了後自恃身價不同，即時埋一線小生堆，唔騷昔日的奀星老友。知情者話︰「依家喺夜店見到佢都唔多騷人，佢份人不嬲都口花花，依家紅咗梗係大把女埋身。佢老婆好辣嘅，睇唔過眼就會同你反枱，你估佢次次都拆得掂嘅咩！」
就謝天華老婆傳自殺及被打一事致電其外母，她十分騰雞話︰「我唔識你，我唔識答，你直接問番啲有關人士，我係一個普通嘅職員，唔方便答你。」說罷匆匆收線。
據知事件搞大後， Tina知事態嚴重，加上老公在醫院連日照顧，她亦開始軟化下來，透過相熟傳媒向外公布：「我好介意傳自殺同天華打太太。傳天華去夜店獵艷？我唔 care呢樣嘢，但介意話佢打太太，咁對佢工作好影響。」老婆繼續為老公撐到底，謝天華今勻再大步檻過。

Tina為撐老公，就算自己唔係幕前都甘願陪謝天華拍牙膏廣告。

Tina的母親（左）是無綫藝員部高層，難怪謝天華在電視劇的角色甚有發揮。《蘋果日報》圖片

胃抽筋一般唔使留院

家庭科醫生關嘉美指：「胃抽筋會標晒冷汗、作悶作嘔、食唔落嘢，有時會嘔啲黃膽水出嚟，犀利過頭會暈倒。情緒最易導致胃抽筋，情緒不穩俾人嚇一嚇，個胃都會抽筋 o架，心理影響到生理嘅毛病。（空肚潛水會否引起胃抽筋？）都會 o架！個肚好餓，成個胃都係胃酸，潛水嘅壓力好大，引起胃抽筋都唔奇。」
問到胃抽筋係咪要即時召救護車，她說︰「咁好多時病人唔係有醫護常識嘅人，咁冇醫學知識嘅人打 999，都唔可以話佢濫用急症室。（一般胃抽筋要留院幾耐？）要睇吓公立醫院定私家醫院，公立醫院醫生同你驗過，打支針同驗胃指數，一般情況冇事就即日要走，唔使留院，唔可以濫用資源嘛。不過，住私家醫院就冇所謂，你有錢當嗰度酒店住都得 o架。」
謝天華緋聞女爆︰佢不嬲都花弗
本周三（ 9月 9日）下午，王璐瑤（ Louise）接受本刊訪問時表示，跟謝天華於今年 3月認識，當時她跟兩名女友人，凌晨 1點幾到夜店 Fevar夜蒲時遇到謝天華。王坦言覺得謝天華花弗︰「佢（謝天華）不嬲都花弗 o架啦！我有時都會同張達明同 Sunny Wong（排舞師）出嚟飲嘢。佢哋感覺正經好多，完全唔會有咩身體接觸。」
王璐瑤更透露，夜蒲翌日下午，謝天華主動打電話給她，她對記者表示：「我哋當晚冇交換到電話，可能佢問我啲朋友攞啦！佢打嚟話：『我係 Laughing呀！你依家有我電話啦，得閒再約出嚟傾啦！』我冇諗過打俾佢，不過佢約我都會出去見吓面，大家做個朋友啫。（覺唔覺得佢追你？）應該唔係啩！就算係，我都唔會接受。一嚟佢有老婆，二嚟佢太花弗輕挑！」
王璐瑤表示知道謝天華太太 Tina入院消息好震驚，「我冇諗過一張合照會搞到咁大件事，但係我要澄清，我唔係第三者。（有冇打電話慰問謝天華？）佢實以為我放料啦！我打俾佢講咩好呀！我問心無愧，總之希望佢太太唔好誤會啦！」
王璐瑤雖然不相信謝天華會打太太，但就不能接受打女人的男人，「我同之前個男朋友分手，就係因為佢脾氣大，小事都會郁手郁腳，成個將我推咗落地，雖然佢之後都會好內疚，對我會仲好啲，但係唔可以忍一世，所以最後都係要分開。」

王璐瑤最近簽約奧斯卡電影公司，還擔正電影《我要做 o靚模》，跟森美、趙碩之合作。

4月 25日，本刊拍得鄧肇堅曾孫鄧程澧（ Timothy）在中環夜店 Sugar客串打碟，「 Tim係有追過我，但我見到佢啲閃卡（淫照）之後都疏遠咗佢。佢對愛情唔專一，唔啱我囉！」

在王璐瑤的網上日誌及 facebook內，有大量她跟明星藝人的合照，連車震男梁榮忠都有。

現年 20歲的王璐瑤，兩年前拍獨立電影《明媚時光》時大膽露點，雖然她沒有後悔，但卻十分介意別人視她為三級脫星，「呢套戲唔係為咗露而露嘅三級片，香港國際電影節都有播，係藝術片嚟！」

王表示最怕男人用情不專，又話謝天華唔係佢杯茶。

被爆偷食見招拆招
演「賤 Man」演得入型入格的謝天華， 05年同 Tina拉埋天窗後，未有修心養性，更愈來愈愛蒲，不過，每次偷食斷正後，天華都好識處理危機，化險為夷，力保好男人形象！
突爆生仔論

06年 5月，謝天華單拖到夜店 EDGE參加 Music Dance Party，當晚謝與 cap帽索女孖住 um舞池，就連索女去廁所，佢都戙在女廁門口等。事後，謝天華摺埋自己半個月，待事件淡化後，便以「生豬仔」論轉移視線。高調拖老婆

07年 10月，謝天華到台灣錄影《味分高下》，收工後隨曾志偉到夜店 Room18玩，謝被傳媒影到與雜果賓治（陳宛蔚）喺舞池中又攬又錫，之後仲摸住 pat pat返酒店。偷食新聞一出，謝天華即十指緊扣拖 Tina去飲茶兼買餸，謝更解釋當時音響太大聲才面貼面，更話與雜果賓治入酒店的照片係電腦加工。
推說舊朋友

 09年 3月，謝天華被發現在酒吧攬着一位身材惹火的索女，謝與索女癡纏後，更連體嬰般消失於人群中。事後，謝解釋是與舊朋友攬一攬，太太明白到娛樂圈的遊戲規則，所以冇嬲。
強撐為套劇